Read Khiamniungan Naga Nianlom Jih 37 Bible Online

Nianlom Jih 37 - Khiamniungan Naga bible

Nianlom Jih 37

¹Akausaihoi thaiuthako tato yangelatkü lanoi; tsüdekünai sauhaiüh tsüthakün chhisiyaji ngüso tü mongngeikü lanoi.

²Khengliu wonantsün khekkü ngüso laiukü tsünoikü mowane; ngüso paisam wonantsün khekkü eane.

³APAOU da lümonglam naiuso amei lüchhi; naito goumchi nai ni aakih nou laiu-e naiuso alokü noi-e.

⁴Ni APAOU nou da mong lükiu, naiuso ni aiutsün apaüh kiu-e.

⁵Ni apim APAOU hau lükiu; apa da lümonglam, naiuso apaüh ni hachu-e;

⁶naiuso apaüh ni ün asio anyiwem aje awon khekkü je-i-e.

⁷Mongau laiukü athe naiuso APAOU nou chhiau taiukü anoi; sauhai tsüomeiji ngüso thaiutha tsüdekünai tsümeikü thattsün nai ashio eptsünso thaiutha layangelat.

⁸Ayangelat tsüdekünai amongmat hau atao lakiu; tiautenai nungüh to angja nailu niaji.

⁹Sauhaiüh APAOU da monglamji ngüsoüh goumchi teng kame, lüko akausai nouso to nung ainou komshiane.

¹⁰Atao intsolu noiphiai to akausai nouso mowane; ni ngüso tü yamao shiom, lüko ni ngüso tsüepshi-e;

¹¹atsamloutsünsoüh nung goumchi teng kame küta atsüomei naiuso nokmei nouko monglinge.

¹²Akausai khaiunia nou khaiunia amei thako akhengshi mongthat thatji naiuso apa tü chinyankü thapji.

¹³Lüko APAOU nou akausai khaiuniahoi tü nyailutji, tiautenai ngüso shakta mowane ta apaüh ngen.

¹⁴Akausai nousoüh angja naiuso omhe nouso loatau naiuso ayamtha nou chhisiyatsünso chaoatkü wanau ngüso sah tensanji naiuso ngüso uokop pai kenshiji;

¹⁵lüko ngüso sahsingio tsangkülu ngüso eane, naiuso ngüso uokoppai lotheane.

¹⁶Khaiunia amei tsaküh thsaothsaokü thahtaiutsün to akausaihoi chhi piakü nou thahtsün chaiou tü meijeng,

¹⁷tiautenai APAOU nou akausai nouso oukong kankü khuwane, lüko sauhai amei noin ngüso kiplo-e.

¹⁸Sauhaiüh apa ngio angji APAOU nou nungso paotsangji, naiuso goumchi nou asaita ngüso tengkam noi-e.

¹⁹Tsümeikün atao nouso shinai ngüso tsüangja-e naiuso naiusile taoko ngüsoüh saiukü taiu-e.

²⁰Lüko akausai nouso eane; APAOU ün ehoi nouso liutsa taopon khekkü mowane; ngüso inkhao khekkü yankü khuwane.

²¹Akausai khaiunia nou laiuloji lüko tilaitso tsütham shiji, lüko khaiunia amei nou amaohai hau kiuhaau mongsaji.

²²Sauhai APAOU nou oukkiuji ngüsoüh goumchi teng kame, lüko sauhai apaüh atheshan kiukü noin ngüso to nung goumchi ainou komane.

²³APAOU nou khaiunia tsak apa khuao yam nai niaji naiuso sauhaiüh apa mongtsamiji nungso kiploji.

²⁴Ngüso salian lüko, ngüso nungailu tsünoi-e tiautenai APAOU nou ngüso tsa-ishi-e.

²⁵Loto ngo paohai tsak noin; ngo aakih laiukü kih-iu, lüko khaiunia amei tsak Goa nou wanantsün tsüdekünai apa thsosoüh eheshiu saohetsün ngo tilaitso tsüep.

²⁶Atao chikü nouko apaüh amai tsüyangkü kiuji naiuso amaohai hau laiukiuji, naiuso apa thsoso ouk tsak iulaji.

²⁷Tsümeikü ainou lüpunge naiuso amei lüchhi, naiuso athsaosithsoso asaita goumchi nai kihe;

²⁸tititenai APAOU nou ayamtha nou tsüojinji naiuso apa tü monglamtsün khaiuniahoi apaüh tsüwanji. Apaüh ngüso asaita kiploji, lüko akausai nouso thsaosithsoso to goumchi ainou komane.

²⁹Asiohoi nou goumchi teng kame naiuso nungko asaichi kih-e.

³⁰Khaiunia amei ün ngio nouso tü mongsai sunkü noin, naiuso apa asaita thakü noiji.

³¹Apaüh Goa ün ngiokhem apa mongai taiuji naiuso nung ainou laitso tsüpungeji.

³²Akausai khaiunia tsaküh khaiunia amei tsak ta jioji naiuso apa loatau koweji.

³³Lüko APAOU nou apa ehso phamongai apa tsülethiowane tsüdekünai tilai apa tü mi kheme apa hau aphio tsükiu-e.

³⁴Ni nou ayangtaiu APAOU tü lütaiu naiuso apa ngiokhem nouso angio lüang; apaüh ni hau goumchi nou teng kamitsün tsangkü losunge, naiuso ni akausai nouso goumchi ainou komantsün eppe.

³⁵Ngo atao tsak ko akausai khaiunia tsak thatü tsaokü ngekü noiküla Apa Lebanon nai Cedar pai khekkü khaiunia apem chiai khenglokü noitsün tsak noiküla;

³⁶lüko atao intso noikütün phiai ngo yanlükhun nai, apa nungko tsünoiküla. Ngo apa tü yam lüko apa tsüepshi.

³⁷Khaiunia amei naiuso asio khaiunia akuo ta lüthalu; nokmei aiutsün khaiunia tsak thsaosithsoso to piakü noi-e,

³⁸Lüko angei nouso to thumkü lomowanji, naiuso ngüso thsaosithsoso moisemkü mowani-e.

³⁹APAOU nou asio khaiunia nouso kipsanji naiuso ngüso angja taoko kiploji.

⁴⁰Apaüh ngüso hachuji naiuso kipsanji, apaüh ngüso akausaihai ainou kipsanji, tiautenai akiplo thaiutha ngüso apa dongai khuji.