Read Khiamniungan Naga Nianlom Jih 40 Bible Online

Nianlom Jih 40 - Khiamniungan Naga bible

Nianlom Jih 40

¹Ngo APAOU ün ahachu thaiutha mongau laiukü taiu; nungai apaüh ngü tü anglu naiuso ngü wetsün lula.

²Apaüh ngü ahattau lümeikü temchei ainou tensan. Naiuso apaüh jühok lung chiai tsa-ikü ngü hau aalou-i.

³Apaüh ngü hau jih ayan tsak jih au tsande, nung sam Goa tü alomsan jih tsak noiküla. Nung eptsün piakü nou hate naiuso ngüso amonglam APAOU da taiu-e.

⁴Sauhaiüh APAOU da monglamji, sotsom goa nouso dongai phoklekü tsükhu tsüdekünai atsüotsüdekün goa nouso tü amtsünso ko tsüha ngüso thaiumei.

⁵O APAOU, sam Goa, ni sam thaiutha au chhisiya amei piakü chhikiukü noin; ni khekkü tsaktso tsünoi! Ni sam thaiutha chhikiuau piakü thattaiukium. Ngo nungso chikü thaiutha tsüchite kheme- nung haove au thatü piakü noin!

⁶Ni aa chaithio naiuso chaithio nouso tsü aiuji; ni thainian amthang nai thumkü jahtsün tsüdekünai angei kankü khuao aa chaithio nouso thaiutha tsüsangji. Nunglikoto, ni ngü hau alulaau noukhan nouso kium,

⁷nungtiphe ngo thalakü ngiom, “Ngo nungai noin; jü thaiutha ni nou ayamhan nouso Ngiokhem thsam nai noin.

⁸Jü Goa, ni mongchiotsün chhisiyaau ngo tsüojinji! Ni nou atsandetsün ngo jümongai taiuji.”

⁹APAOU, akhaiuniaso kamtsün ajeiaikam khako ni sam kipsantsün ngem amei ngo chite-iu. Ngo nung chiteau tilaitso tsülao-e ta ni ngeji.

¹⁰Ngo akipsan ngiongem nou tsangkü tsüwan; Ni mongmeitsün naiuso ahachu ngo asaita chite-iu. Ni nou ngiotsüo naiuso atsüojin thaiutha akhaiuniaso chikü ajeiaikam khako ngio tsüchitekü nyankü tsünoian.

¹¹APAOU, ni atsüojinyang ngüko tilaitso tsülao-e ta ngo ngeji, Ni nou atsüojin naiuso ngiotsüo nou ngo asaita kipsankü noi-e.

¹²Aweau tsüshiokün angja piakü nou ngo lemlowankü noin! Jü angei nousoüh ngo thalouwaniu, naiuso loto ngo athapsan shiau tsüshioshi; nungso jükhaiuo tü piakü noin, naiuso ngo mong tsüsongshikü iula-iu.

¹³APAOU, ngo akipsan! lo ngo ahachu!

¹⁴Sauhaiüh ngo loatau koweji ngüso shioloküta henyikü lü-iula an-i. Jü angja shioko sauhai monglingji ngüso lomiamatkü phiai laolokü akhuwan-i.

¹⁵Sauhaiüh ngo tü olutji ngüsoüh ashio tsüepkü lülomiaman.

¹⁶Sauhai adongai shiji chikü lükoi-i naiuso lümonglingati. Ni nou akipsan nianlomkiutsünso chikü nou, “APAOU titi asong noin!” ta asai lüngio-i.

¹⁷O APAOU, ngo tsaosilao naiuso tsosilu noin, nungti lüko APAOU nou ngo tsüpean. Ni ngo kipsantsün naiuso jü Goa- ngo halouau liukü athe!