Read Khiamniungan Naga Nianlom Jih 42 Bible Online

Nianlom Jih 42 - Khiamniungan Naga bible

Nianlom Jih 42

¹Jinchai tsak haiuthso khiam atang thaiutha mongchettsünli, nungti O Goa, Jü onthsoüh mongchetji.

²Jü onthsoüh ni aa Goa thaiutha leji, tilai ngo khukü akhako amkhamau shio-e?

³Anyi si asoh ngo shapji, naiuso niochekhiam noulu jü eheshiu; atao pungkü jü ehsoüh ngü tü, “A Goa tiai noin?” ta sangji.

⁴Tilai ngo hoi nouko Goa tsamai khu, ngüso khutsün ko amongling hoi asong nouso jih naiuso sangh asong nou wekü Goa lomsankiu. Tilai ngo nung ayanan tao yangshiji jümong lotheji.

⁵Ngo tiauta nungti mongkiaji? tiau ngo nungti angjaji? Ngo jü ayang Goa da taiu-e, naiuso loüh tsülaokü ngo apa lomsan-e, jü akipsantsün naiuso jü Goa.

⁶Nung akoman nai noitsün ko jü mong lotheji, nungtiphe ngo jü ayang nouso apa dongai phokleji. Hermon King naiuso Mizar King ainou khiam shing ngaokü Yordan ai saotsün khekkü apülai ngem jüdongai khiamthe tsak khekkü, jü onthso khako apaüh amongkia khiampek tsak hongshikü noiküla.

⁸Jü aa ün Goa dongai misao tsak naiuso ngo asoh taoko jih tsak taiu au APAOU nou apa atsüojinyang anyi taoko ahan.

⁹Goa, jü asolotsün ta ngo ngioji, “Ni ngo tiauta bean? Jü ehso angja kiutsün ainou ngo tiauta tsülaokü omhe-e?”

¹⁰“A Goa tiai noin?” ta ngüsoüh ngü tü sanglutkü noitsün ko ngüso alochi lotsaoüh ngo thathsüluwaniu.

¹¹Ngo tiauta nungti mongkiaji? tiau ngo nungti angjaji? Ngo jü ayang Goa da taiu-e, naiuso ngo apa tsülaokü lomsan-e, jü akipsantsün naiuso jü Goa.