Read Khiamniungan Naga Nianlom Jih 5 Bible Online

Nianlom Jih 5 - Khiamniungan Naga bible

Nianlom Jih 5

¹O APAOU, jü ngio nouso tü tsüokü anglu, naiuso ngü yanghetsün alula.

²Jü nokpao naiuso jü Goa, ahachu thaiutha wetsün tü anglu! O APAOU, ngo nitü misaoji.

³Ahom ni jüsangh lulaji; ajepek taoko ngo jü misao hongji naiuso ni thalatsün thaiutha taiuji.

⁴Ni tsüthakü chhisiyatsünko monglingtsün Goa tsüde; adongko tsümeikün titso tsütaiuji.

⁵Abülom khaiuniahoi tü thapluau tsüaiuji; ni akausai khaiuniahoi chikü chinyanji.

⁶Atsüotsüdekü chitetsünso chikü ni lomoji, naiuso ajee naiuso akausai khaiuniahoi chinyanji.

⁷Lüko ni atsüojin asong shioko ngo atsamai shiau shioji; Ni nou asio Amkham Tsam nai ngo amkhamau shioji naiuso nitü asuhat nai kauthioau shioji.

⁸APAOU, jü eh piakü noin! ni mongchio nou chhiau ngü ania. Ngü khuau jükhako ayam lukü anoi-i.

⁹Jü ehsoüh ti ngioji nung laitso monglamau tsüshio; ngüsoüh alotheaulu mongchioji. Ngüso ngio nouso akhunnat naiuso anyaothing noin, lüko thatü akausai noulu meankü noin.

¹⁰Aphio naiuso angja ngüso hau lükiu, O Goa; ngüso kausai noulu ngüso lüloian-i. Adong ainou ngüso lükoman, tiautenai ngüsoüh nitü khengshi, naiuso ngüso angei piakü noin.

¹¹Lüko sauhaiüh ni ko aalu epji ngüso monglinge; ngüso asaita amongling nou jih hangau shio-e. Sauhaiüh ni tsüojinji ngüso akipsan, tiautenai ngüso atsüoting monglingkü noin.

¹²APAOU, sauhaiüh angio angji ni ngüso oukkiuji; Shikhao khekkü ni ün atsüojinüh ngüso soujeikiuji.