Read Khiamniungan Naga Nianlom Jih 50 Bible Online

Nianlom Jih 50 - Khiamniungan Naga bible

Nianlom Jih 50

¹Apemshiotsün Goa, APAOU nou, chiteji; apaüh goumchi athum ajepek ainou ajenap saokü ta jonji.

²Aleng amei nou saiukü noitsün Zion noknio ainou Goa nou ajinkaji.

³Sam Goa shiji, lüko angem tsüngemkü nai tsüde; apa khako innyai asong noin, naiuso apa lemkü ah-ou-ahsheih athsüoting nou noin.

⁴Apaüh meshen khaiunia mikhem kiutsün ko apa tü thapkü mitha theau aün naiuso goum nou ta jonji.

⁵Apaüh ngioji, “Jü asio khaiuniahoi nouso chikü sauhaiüh chaithio tsangkü ngüko athalou-e shaniu, ngüso jüdongai aikü akamshi.”

⁶Aün nousoüh Goa to asio ta wepeng, tiautenai Goa apa pem mikhem kiutsün noin.

⁷“Anglu, jü khaiuniaso, ngü chite-e; Ngü athako mitha kiu-e, Israel. Ngo Goa, asam Goa.

⁸Achaithio shioko naiuso ni asaita jüdongai ajahtsün chaithio kankü shitsün thaiuthako ngü ni tü tsüthutji.

⁹Nungti lüko ngü asam tsam ainou jangtsopong tsüdekünai a-onhoi ainou onthso tsüpoji;

¹⁰liutsa nai noitsün thainian chikü naiuso king nai hengsiheng thainian nouso ngü nou noin.

¹¹Liu ai noitsün waio chikü naiuso kengpun nai noitsün aa nouso chikü ngü nou noin.

¹²“Ngo naiukü noinai, ngü nitü eheshiu thaiutha tsüsao-e, tititenai goumchi athum naiuso nungko noitsün alum ngü nou noin.

¹³Ngü jang nyih nouso heji süne? tsüdekünai onhoi she shiuji süne?

¹⁴Ni nou nianlomkiu chaithio nung Goa dongai achaithio lünoi-i; naiuso ni thaloutsün chikü Akongting nou hau lükiu.

¹⁵Tilai angja shiji ngo tü ajon; Ngü ni kipsane, naiuso ni ngo lomsane.”

¹⁶Lüko akausai nouso ta Goa nou ngioji, “Jü athoilut nouso ni tiauta we-e? Jü athalou-e thaiutha ni tiauta chite-e?

¹⁷Ni ngo hau alothakiu-iau tsümongchio; ni jü athoilut nouso wanan.

¹⁸Ni eptsün kau pungküko ni hai iula naiuso ni ajisiwop chhitsünso ko haoson janelotsün iula.

¹⁹Ni tsümeikün chiteau asaita khemlokü noin; ni yaang chiteau tilaitso henyikü tsünoiji.

²⁰Ni adeisinioting nouso hau mi kiu-au, naiuso ngüso ta aphio thaloau khemlokü noin.

²¹Ni nungso chikü chhi-iu, naiuso ngü titso tsüngio; nungtiphe ni yang, ngo lüko ni khekkülu noin. Lüko lo ngü ni thutji naiuso nung mi nou akhako tsangsheikü hanko.

²²“Nungtü a-anglu, asam Goa tsüwesankünso, tsüdekünaito ngü asam lomowane naiuso asam kipsanau nungko tsaktso tsünoi-e.

²³Nianlom kiutsün nung ngo hau asuhat kiutsün chaithio noin, naiuso sauhaiüh jüngio angji ngo ngüso chikü atsüoting kipsane.”