Read Khiamniungan Naga Nianlom Jih 55 Bible Online

Nianlom Jih 55 - Khiamniungan Naga bible

Nianlom Jih 55

¹O Goa, jü misao alula, ngü kojatsün ainou ni phoklekü lakhuwan!

²Ngo tü anglu naiuso ngo tü athala; jü ayangelat nou tsangkü ngo uochaniu.

³Jü ehso mongthat tsümeikün tsangkü ngo nyomaniu. Ngüsoüh jü khako angja kankü shiji; ngüso ngoko mongmatji naiuso ngü tü chinyanji.

⁴Ngo lekkat, naiuso eau hattsün nou ngü ta nyopji.

⁵Ahat naiuso angaongao nou ngo ta shisaokü noin; naiuso alekkat nou ngo shiolowaniu.

⁶Mükham khekkü ngo akoipotsün tsak tünto ngo jeikü khuküta aalu epela ta ngü yangji.

⁷Ngo laiukü nai jeikü khuküta liutsa nai kih-ela.

⁸Athsüoting ahsheih naiuso ah-ou-ahsheih ainou jü chija ngo liukü asolo epela.

⁹O APAOU, jü ehso ngio pülaikü a-iulakiu! Tititenai noknio nai ngü ehli ngem naiuso alothe chhisiya epji.

¹⁰Anyih si asoh nung noknio ngüsoüh aloat naiuso angja nou hau meaniji.

¹¹Nungko alumai alothe noin; akausai naiuso athangmang chhisiya nou sonyam nouso miankü noin.

¹²Ngü lochilotsaotsün nung ehoi tsak tünto, ngo kiploau shio-ela; nung ngü khako khengshitsün tsak abülom tünto, apa ainou ngo chija pamkü noi-au shio-ela.

¹³Lüko nung ni noin, jü baiusihai, jü hoi naiuso jü haimeiting.

¹⁴Samüh tsaksitsak ko thatü thsao-ekü chiteji naiuso Amkham Tsamai aikü kamkü amkhamji.

¹⁵Jü ehso ngüso e-etao mosaokü lü-ean; ngüso eantsün goumchi nai aa lüsaowani! Tsümeikü nou ngüso tsamai naiuso ngüso mongpem ai noin.

¹⁶Lüko ngo APAOU Goa tü ahachu thaiutha jonji, naiuso apaüh ngü kipsane.

¹⁷Ahom, anyiwem naiuso asoh ngü namnamtsün naiuso ngettsün apa dongai süngkhuji, naiuso apaüh jüsangh lula-e.

¹⁸Ngo ehoi piaküko ehlitsün athang ainou kipsankü apaüh ngü kankü shi-e.

¹⁹Goa, sauüh athontsüyangkü ainou nokshingji, apaüh jüsangh lula-e naiuso ngüso shiolo-e; tiautenai ngüso ali-eshiau tsümongchio, naiuso ngüso apa lon tsühat.

²⁰Jü akeng baiusihai nousoüh apa hai thako tsaji; apaüh apa athalou nouso lotheaniu.

²¹Apa ngioyak nouso to ünge tü shethop, lüko apa mongpemai achinyan nou noin; apa ngio nouso khaiutsom tü matchai, lüko nungsoüh sah amounting khekkü heji.

²²Athsa APAOU hau lülekiuwan, naiuso apaüh ni halou-e; apaüh asaitha khaiunia tilaitso tsühenyi-i-e.

²³Lüko ni, O Goa, aloattsünso naiuso yaang ngio chitetsünso meshen aakihlaiu apaitso tso mokhukünai etamkhan nai kankü shi-e. Lüko jü thaiutha to, ngo ni da amonglam taiu-e.