Read Khiamniungan Naga Nianlom Jih 56 Bible Online

Nianlom Jih 56 - Khiamniungan Naga bible

Nianlom Jih 56

¹Ngü tü atsüojinyang anoi, O Goa, tiautenai ngü ahat nai noin; jü ehsoüh atao chikü nai ngü jeiat kiuji.

²Ajekhaiu thumkü jü akhengshihoi nousoüh ngü thako tsalouji. Ngü thako ehlitsün nungko piakü noin.

³Ti taoko ngo hate, Akongting O APAOU, Ngo jü amonglam ni da taiuji.

⁴Goa da ngo jü amonglam taiuji naiuso ngo tsühatji; Apaüh ti thaloukü noin nung thaiutha ngo apa lomsanji. Khaiunia lon nou ngü da ti chhiau shio-e?

⁵Ajekhaiu pungkü jü ehsoüh jü thaiutha angja shanji; ngü titi tawai-e ta ngüso asai ayang noin!

⁶Ngü loatau yangkü, ngo chhisiyatsün alum da jiokü ngüso akau athang nouso nai kamshiji.

⁷Ngüso tsümeikün thaiutha ngüso hau angja lükiu O Goa; ni amongmat nai nung khaiunia nouso lüshiolowan!

⁸Ngo titi angjaji nung ni ngeji; jü niochekhiam ameng ai aleitaiu. Nungso athsamai tsüsat taiu süne?

⁹Ngo ni tü jontsün ajekhaiu nai, jü ehso lapkü shi-e,

¹⁰APAOU sau athalou nouso ngo lomsanji. Goa ngoko hakü noin nung ngo ngen.

¹¹Apa da ngo jü amonglam taiu-iu, naiuso ngo hatkü tsünoi-e. Khaiunia lon nou ngü da ti chhiau shio-e?

¹²O Goa, ngo thaloutsün ni hau ngo chaithio kiu-e; nianlom kiutsün chaithio ngo ni hau kiu-e,

¹³tiautenai ni ngo ee ainou kipsan naiuso ashioheantsün ainou ngü hejei. Nungtiphe aawon sübao aa noitsün chikü khako jelutji nung Goa khako ngo tsakeiji.