Read Khiamniungan Naga Nianlom Jih 57 Bible Online

Nianlom Jih 57 - Khiamniungan Naga bible

Nianlom Jih 57

¹Ngü tü atsüojinyang anoi, O Goa, atsüojinyang anoi; tiautenai akiplo au ngo adongai shiji. Nung athsüoting ahthe moyanlükhunkün lektso ngo ni nou ekuksoh khemko asolo epji.

²Jü apotsün alum kiutsün, Atsokting Goa ta ngo jonji.

³Apaüh aün ainou thala-e naiuso ngü kipsane; apaüh ngü thangmangtsünso shiolo-e. Goa nou apa atsüojin naiuso ngiotsüo nou ngü hau hane.

⁴Khaiunia heantsün chongkhao nouso khekkü noitsün jü ehsoüh ngo lemjeikü noin. Ngüso hou nouso lai naiuso uokopchon khekkü noin; naiuso ngüso lei nouso sah amonting khekkü noin.

⁵O Goa, ni asong nou maou nai ahan, naiuso goumchi chikü khako ni nou ajinka ahan.

⁶Jü ehso ngü thalouau nyao nou sapeng-iu; Ngo omhe nou shioheaniu. Ngüsoüh jüyam ko khan tsak thaiu, lüko nung khan nouko ngüso pem sathiowan.

⁷Ngo thumkü monglamji, O, Goa; Ngo jih jih-e naiuso ni lomsane!

⁸Achu, jü onthso! Achu, jü poipoi dongdong, naiuso kokiang! Ngo aje nou lochu-e.

⁹O APAOU, mele nouso ongko ngo ni hau nianlom kiu-e. Khaiunia nouso ongko ngo ni lomsane.

¹⁰Ni atsüojinyang aün saokü ngioji; naiuso angiotsüo nou maou nou ta thankü noin.

¹¹O Goa, ni asong nou maou nai ahan, naiuso goumchi chikü khako ni nou ajinka ahan.