Read Khiamniungan Naga Nianlom Jih 66 Bible Online

Nianlom Jih 66 - Khiamniungan Naga bible

Nianlom Jih 66

¹Khaiunia chikü, amongling sangh asong nou Goa alomsan!

²Apa nian ajinka ta jih lüjih; alomsan ajinka nou apa hau lükiu

³“Ni chhisiyatsün chhi nouso titi athanga, ta Goa tü lüngio. A-oukong thatü song nou shioko a-ehso ahat nou akhako kaukü napji.

⁴Goumchi ko khaiunia pungkü nou ni amkhamji; ngüsoüh ni lomsantsün jih jihji, ngüsoüh anian ta alomsantsün jih jihji.”

⁵Ashi naiuso Goa nou ti chhin nung athap, khaiunia ongko apa chhisiya nouso titi athanga.

⁶Apaüh khiamnok nou gohwai au iula-i sam paosiposoüh nung haiu hokjeüh yankü khu. Nungko apa chhi epkü sam monglingkü noiküla.

⁷Apaüh meshen oukong nou asai nokshing shingji naiuso apa nioveiüh mele nouso ta thapji, apa thako ti akhengshi lasungi.

⁸Mele chikü, nou sam Goa lülomsan; apa lomsantsün sang lasungi.

⁹Apaüh sam aa taiukiuji naiuso sam tsükhia-aniji.

¹⁰Goa, ni sam tü in nou tangkason losangtsünli thelukü noiküla.

¹¹Ni sam jin nai mon-i naiuso sam ta thsa alethsang nou kanlutkiu.

¹²Ni sam ehso hau sam khaiu ai ngamkei-i sam in si khiamthe yankü khu, lüko ni sam aalo athang tsak ai nialokü shin.

¹³Ngo atsamai ajahtsün chaithio kankü shi-e; Ngo ni hau athaloutsün chaithio kiu-e.

¹⁴Tilai ngo angja nai noiküla ngo ti ta ngiokü noiküla ngo nung nihau kiu-e.

¹⁵Amthang nai jah-au ngo onnemok nou chaithio kiu-e; Ngo jangtsopong naiuso won nouso aloat chaithio kiu-e, naiuso inkhao nou maou nai sungkhu-e.

¹⁶Goa hattsünso chikü ashi, naiuso anglu, naiuso apaüh jü thaiutha ti chhin ngo nung chite-e.

¹⁷Ngo apa tü ahachu thaiutha jon; Ngo apa jih nouso ko lomsan.

¹⁸Ngo jü angei nouso tsangtaiu tünto, APAOU nou ngü ta tsü-anglu-ela.

¹⁹Lüko Goa nou atsüoting ngü ta anglu; apaüh jü misao lulakü noiküla.

²⁰Goa nou jü misao tsüthalakü tsüwanan apa asai atsüojin ngü ainou laokü tsüluwanphe, ngo Goa lomsanji.