Read Khiamniungan Naga Nianlom Jih 68 Bible Online

Nianlom Jih 68 - Khiamniungan Naga bible

Nianlom Jih 68

¹Goa nou tsalounai apa ehso pengkü khuji. Sauhaiüh apa chinyanji, ngüso apa khako ashio tsüepkü khulükhunji.

²Inkhao shipkü khutsünli, apaüh ngüso komanji; in khako yap nou khiamantsünli, nungti akausai nouso Goa khako mowane.

³Lüko asiohoi apa khako monglingatji; ngüso koikü amongling nou weji.

⁴Goa ta jih lüjih, apa nianko alomsan jih lüjih; thengmia chiai sau mok noin apa thaiutha yam tsak lükhemtaiu. Apa nian APAOU noin- apa khako lümonglengat!

⁵Goa sau apa asio Amkham Tsamai noiji, apaüh mejetthso nouso paotsangji naiuso jihihoi kiploji.

⁶Aodangkü noitsünso hau apaüh akihtsam kiuji naiuso aketaiu nouso apaüh sokshiji, lüko angio tsülukünso to goh tsümeikünai kih-e.

⁷O Goa, tilai ni akhaiuniaso nialokü khu, tilai ni liutsa lang yankü khu,

⁸goh nou haiuhaiu, naiuso maou nou ah-ou nou sao-in, tiautenai nung Sinai Goa, Israel Goa shitsün noiküla.

⁹Ni ah-ou saiukü sao-in naiuso goh tsümeishikü iulatsün nou lomeikiu.

¹⁰Akhaiuniasoüh nungko kih au ngüso tsam shan; ni mei nou ni angjahai hau nung khemtaiukiukü noiküla.

¹¹APAOU nou ngiokhem nou kium, naiuso menyiuhoi piakü nou nung ngiongem kankü khu:

¹²“Nokpaohoi naiuso ngüso süpaiso wonpenganji!” Naiuso tsamai noitsün menyiuhoi nou ngüsoüh nokkum taoko thaloutsün jengtsaiu janelou:

¹³tangkason nou chujeikü noitsün mükham, sübao ekuk nouso chaiou lakkeng oukü jekü noitsün khekkü, (Ehli ajekhaiu nouko nai asam ajantso onnemok tsam tiauta noin?)

¹⁴Tilai Apemshiotsün Goa nou nokpao nouso Zalmon King ai kumponkü noiküla, apaüh nungko nyin nou sao-in.

¹⁵Bashan king nung titi asong noin naiuso kingchong piakü suntsün tsak noin!

¹⁶O king atsok nouso, Goa nou apa noiau chosantsün king nou ta asamüh tiauta niovei kiakü thapji? APAOU nungko athontsüyangkü noi-e!

¹⁷Apa ko akongting ehli tsamkei nouso hengsiheng hakü APAOU nou Sinai ainou asio athang nai saoji.

¹⁸Apako sua nouso piakü nialoukü kingkhaiu nai sungji; apaüh akhengshitsün khaiuniahoi ainou paopei louji. APAOU Goa nungko noi-e.

¹⁹APAOU lülomsan, sauüh ajekhaiu pungkü sam thsale kankiuji, naiuso sam kipsanji apa Goa noin.

²⁰Sam Goa to akipsantsün Goa noin; sauüh sam ee ainou kipsanji, apa to APAOU, sam APAOU noin.

²¹Goa nou apa ehso ngüso angei chhisiya ainou tsülaolokünso khaiu lopai-e.

²²APAOU nou ngiom, “Ngo a-ehso Bashan ainou laokü niajikane; Khiamnok akheiting ainou ngo ngüso nialokü shishi-e,

²³nungti ngüso sheloppengtsünso, naiuso jih nousoüh ngüsoüh aiutsünli nung shiheau thaiuthako.”

²⁴Jü Goa, jü nokpaoüh ashio epkü, asio amkhamthang nai ahoi nou niakü shinaptsün khaiunia apemüh epji.

²⁵Menyiuthsohoi nou sondan patkü lomtsün ongko, jihanghoi nou chongkü khu ngüso phiko poipoi mattsünhoi nouso hoilut.

²⁶“Apa khaiuniaso kam nouko Goa lülomsan; asam Yakob thsaosithsoso chiküüh APAOU lülomsan!”

²⁷Ehenthsoting kau nou, Benjamin chongau thekü, nungthan ko Yihuda aheiso ngüso hoi hakü, nung ta Zebulun si Napthali hai ahei nouso hoilut.

²⁸O Goa, a oukong ahan, ni sam thaiutha ko kankeitsün oukong nou ahan.

²⁹Yirusalem nai ni nou Amkham Tsam noiphe, nokpaohoi nousoüh adongai paopei nouso kankü shi-e.

³⁰Ngüso chikü kauthioküta ni hau ngüso tangkason chaithio mokiukün lektso shechei nai kihtsün liu thainian khekkü nou Ijip tü lüthut!, jangtsopong pin khekkü noitsün mele nouso tü lüthut! Angem losanau tsüojintsün mele nouso to lükomponan!

³¹Paiusihong nouso Ijip ainou shi-e; Sudanhaiüh ngüso pha loksankü Goa tü misao-e.

³²Asam goumchi nokshing nousoüh Goa ta jih lüjih; APAOU nou ta alomsan jih lüjih;

³³apung anyim nai yakü noi nou maou nai sau tsakeiji, apa nian lülom. Apa sang asong nou wetsün tü lüanglu.

³⁴Goa ün oukong lüpungpeng; apa akongtsün Israel chiai noin, apa oukong maou nai noin.

³⁵Goa, nou apa asiothang ainou shinai titi ahatau tsak- Nung Israel Goa noin! apaüh meshen khaiuniaso hau oukong nou kiuji. Goa lülomsan!