Read Khiamniungan Naga Nianlom Jih 69 Bible Online

Nianlom Jih 69 - Khiamniungan Naga bible

Nianlom Jih 69

¹O Goa, ngü akipsan! Tiautenai khiam nou jüsang ngoikü limaniu.

²Ngo puchet a-aouting nai limthiowanji, naiuso nungko gohtsüo tsünoi. Ngo khiam a-aouting nai nappaniu, naiuso khiampek nousoüh ngü kankü khuwanaulu noin.

³Ahachu thaiutha wetsün nou ngo oukia-aniu, naiuso jü aiukhan kiaji. Ni ainou ahachu thaiutha athaplut noi nou jü nio aou nouso kia-aniu.

⁴Sauhai ngü ko ti thaiutha ta tsüdekü tsaoji ngüso jü khaiuo tü phopkü piakü noin. Jü thako jü ehsoüh yaang ngio chiteji; ngüso kongkü noin naiuso ngü loatau aiuji. Ngo tsükaukün jengtsaiu nouso ngüsoüh ngü hau laokü kiuwaniji.

⁵Oh Goa, jü angei akhako tsangankü tsünoi; ngü titi mainga noikü shin nung ni ngeji.

⁶Akhengting Akongting APAOU, ni da monglamtsünso khako ngü hau amiam kankü lashi-i! O Israel ün Goa, ni da amkhamtsünso khako ngü hau amiam kankü lashi-i!

⁷Akothako ngü lochi lotsaokü noiküla naiuso amiam nou jükha lopokkiu.

⁸Jü deinioso ko ngo mesan tsak khekkü noin, naiuso jü tsammongso ko ngo gohmao khaiunia tsak khekkü noin.

⁹Ni nou Amkham tsam thaiutha jümong kiutsün nou ngü tü mong nai in nouli jekji; naiuso ni da lochi lotsaotsün nung ngü shisao-iu.

¹⁰Keithon loutsün tsangkü ngo jüpem thatsamlou, naiuso khaiuniahoi nou ngü lochilotsaoji;

¹¹Ngo amongsaiutsün neshe nouso tholonai, ngüso ngü tü nyailutji.

¹²Yamkheng nai ngüso jü thaiutha chiteji, naiuso thengtuk hai thaiutha ngo jihangau the-an.

¹³Lüko jü thaiutha to, APAOU, ngo ni ta misao-e; atao tongtü nouko, ngü tü athala, Goa. Ni atsüojin asong shioko ngü da atha, tiautenai ni akipsanau thaloutaiutsün ni kankeiji.

¹⁴Puchet nai limthiowantsün ainou ngü akipsan; Jü ehso ainou ngü kipsankü ataiu, khiam a-aouting ainou ngü akipsan.

¹⁵Khiamthe nou jü khako lashi shiolo-i; Gohkhei a-aouting nai tsüdekünai ekhan nai ngü lasathio-i.

¹⁶Ni nou asai atsüojin amei nai ngü tü athala, APAOU, ni atsüojinyang nai ngü tü asheilut!

¹⁷Ni yathsüotsün ainou akha latsangan; tiautenai ngo angja asong nai noin- ngü ta lo athala!

¹⁸Jüdongai ashi naiuso ngü akipsan; jü ehso ainou ngü ahalou.

¹⁹Ngo titi lochi lotsaoji, titi lomiamji naiuso asuhat tsünoikü kankeiji nung ni ngen, ni jü ehso chikü epji.

²⁰Alochi lotsao nou jümong lotheankü ta ngo ayang mowankü nai noin. Ngü tü tsüojine saota yangkü noiküla, lüko atsüojin tsühan; naiuso ngo aaloau thaiutha yam, lüko tsaktso tsüepsan.

²¹Tilai ngo naiukü noiküla, ngüsoüh ngü hau sheh nou kium; Tilai ngo lekü noiküla, ngüsoüh ngühau ehejek khiam nou shen.

²²Ngüso shithsokam tsangkü ngüso lüsappati; ngüso ün asio sümai nouso ngüso thaiutha jin tsak lü-iula-i.

²³Ngüso niopek lü-iula-i! Ngüso san asaita tsükongkü lünoi-i!

²⁴Ni nou amongmat ngüso chiai lühonglut; ni nou amongthe nou ngüso lüthalouwan.

²⁵Ngüso saothang nou aodangkü lü-iula-i; ngüso nejenkhio nai tsaktso aa lanoi-i.

²⁶Ni shiotsünso ta ngüsoüh aangja kiukü kankeiji; ni tawaikü noitsünso omhetsün thaiutha ngüso chiteji.

²⁷Ngüso angei chikü tsakko satkü ataiu; ngüso ni nou akipsan haoson nai laha-i.

²⁸Aa thsam ainou ngüso nian atsomankiu; akhaiuniaso ling nai ngüso lahoilutha.

²⁹Lüko ngo angja naiuso amongkia nai noin; O Goa, ngü atenchu, naiuso ngü akipsan!

³⁰Jih tsak jihkü ngo Goa lomsane; Apa hau nianlom kiutsün tsangkü ngo apa asong nou wepenge.

³¹Apa hau thainian chaithio kiutsün tü shimkü nungüh APAOU nou mong lengi-e, nungto jangtsopong thumkü aa chaithio kiutsün tü shimkü noi-e.

³²Tilai thangmangkü noinsoüh nung eppe ngüso monglingkü noi-e; sauhaiüh Goa amkhamji ngüso monglosonge.

³³Pokü nai noitsünso tü APAOU nou angji naiuso aketsam nai noitsün apa khaiuniaso tsübeanji.

³⁴O aün naiuso goum, khiamnok nouso naiuso nungko aa noitsün chikü nou APAOU lülomsan.

³⁵Apaüh Yirusalem kipsane naiuso Yihuda ün noksong nouso shanshi-e. Apa khaiuniasoüh nung gohthang thalou-e küta nungko kihe;

³⁶apa yathsüotsün thsaosithsosoüh nung teng kame, naiuso sauhaiüh apa tsüojinji ngüso nungko kihe.