Read Khiamniungan Naga Nianlom Jih 71 Bible Online

Nianlom Jih 71 - Khiamniungan Naga bible

Nianlom Jih 71

¹APAOU, ngo adongai asolo thaiutha shikü noin; ngü laitso lashioheani!

²Ni asio tsangkü ngü halokü ajuosan. Ngü tü anglu naiuso akipsan.

³Ni jü thaiutha au ni aalokü pamlo-itsün tsak lüthe naiuso ngü kiploau pe amongting tsak lüthe; tiautenai ni ngü solotsün naiuso kiploutsün.

⁴Jü Goa, tsümeikün khaiuniahoi ainou ngü ajousan, atsüojin tsülepkün naiuso tsüsiokün oukong ainou ngo akipsan.

⁵Akhengting APAOU, ngo jü ayangtaiu ni da taiuji; Ngo methso tao aida ngo ni da amonglam taiuküla.

⁶Jü aakihlaiu chikü ngo ni da niolut; ngo chettsün ajekhaiu aida ni ngü solo-ikü noiküla. Ngo ni asai lomsane.

⁷Jü aakih piakü thaiutha athatluau thekü shin, tiautenai ni jü amongting akiplotsün noikü shiphe.

⁸Ajekhaiu thathonkü ngo ni lomsanji naiuso ni nou ajinka wepengji.

⁹Lo ngo sonanphe ni ngü lawanan; lo ngo outsükongphe ni ngü lalean.

¹⁰Jü ehsoüh ngü loatkü wanau mongchioji; ngüso ngü tü mongkhemkü chiteji.

¹¹Ngüsoüh ngioji, “Goa nou apa leaniu; sam apa phiai khuküta apa thalouko; apa kipsanau nungko tsaktso tsünoi.”

¹²O Goa, ngü ainou laiukü soikü lanoi; jü Goa, ngü haloau liukü ashi!

¹³Sauhaiüh ngü tü khengshiji ngüso ashioheani naiuso lomokü awan. Sauhaiüh ngü tawai-ao koweji ngüso hau amiam lü-epi.

¹⁴Ngo jü ayangtaiu asaita ni da taiu-e; Ngo ni tekkü naiuso tekkü lomsane.

¹⁵Ngo ni titi amei nung thaiutha chite-e; naiuso ni nou akipsan ngo ngelatsün tü shimkü noilüko, ajekhaiu thathonkü thaiutha singio-e,

¹⁶Akhengting APAOU, ngo a oukong lomsane; Ngo ni amei thaiuthalu wepenge,

¹⁷Ni ngü da ngo oum tao ainai da tsandekü noiküla, naiuso ngo lo saokü ni nou athanga chhisiya nouso chiteji.

¹⁸Lo ngo sonankü noin naiuso jü khaiu thaiuwaniu, O Goa, ni ngü lalean! Ngo ni nou akong naiuso oukong ashiau nou vetao chikü hau chitenai ni ngüko hakü anoi.

¹⁹Goa, ni asio nou aün nouso yapkü noin, ni chhisiya asong chhi-iu; nungko ni khekkü tsaktso tsünoi.

²⁰Ni jü dongko angja naiuso omhe nouso hongkü noin, Lüko ni jü oukong müjam kiushi-e; ni ngü etam ainou lolaokü taiu-e.

²¹Ni ngü nung khako nou tü tekkü losunge; ni ngü loüh aalo-i shi-e.

²²Ngo ni kokiang hakü atsüoting lomsane; Jü Goa, ngo ni mongkiutsün lomsane. Jü kokiang khongkü ngo ni, Israel ün asio Goa nou tü jih hanglute,

²³Ngo ni hau jih hangdenai akoi-i nou ngo sangh asong nou we-e; jüpem athumkü kiukü ngo jih jih-e tiautenai ni ngü kipsankü shin.

²⁴Ajekhaiu thumkü ni asio nou thaiutha ngo singio-e, tiautenai sauhaiüh ngü tawai-ao kowekü noiküla ngüso shiolowaniu naiuso miammatiu.