Read Khiamniungan Naga Nianlom Jih 72 Bible Online

Nianlom Jih 72 - Khiamniungan Naga bible

Nianlom Jih 72

¹O Goa, ni nokpao hau asio nou mikhemao atsande; ni nou ngiotsüo apa hau lüjanekiu,

²nungti naito apaüh akhaiuniaso khako ngiotsüo nai nokshinge naiuso athangmang nai noinso tü asio nou nokshinge.

³Goh nou atsüomei nai lünoi-i; naiuso nungüh asio nou atsangshei-i.

⁴Nokpao nou angjahai phaphiphamong tsüyangkü lüthaisan; naiuso apaüh apotsünso tü lühachuko küta ngüso thangmangtsünso lüshiolowani.

⁵Aje jelutkü noitsün lektso naiuso ashiau nou vetao nouso thaiutha alei nou awon kiukü noitsün lektso akhaiuniasoüh ni amkhame.

⁶Nokpao nou eiu nai ah-ouluttsün khekkü, naiuso goh chiai ah-ou haoluttsün khekkü lüthe.

⁷Apa aakihlaiu taoko asio nou shingkü lükhu-i, naiuso alei nou awon kiutsün lektso atsüomei nou shingkü noi-e.

⁸Apa nokshing nou khiamnok tsak ainou khiamnok tsak saokü, Eufrates haiu ainou goumchi athon saokü noi-e.

⁹Aodangkünai noitsün khaiuniahoi nou apa khako kauthio-e; apa ehso ngüso chija goh ai yaktaiu-e.

¹⁰Spain hai nokpao nouso naiuso khiamjet nokpao nousoüh apa hau paopei nouso kiu-e, Sheba si Seba nokpaohoi nousoüh apa dongai chaithio nouso kankü shi-e.

¹¹Nokpao nouso chikü apa khako kauthio-e; naiuso mele nousoüh apa yathsüo-e.

¹²Angja khaiunia sauüh apa ta jonji, naiuso sauhai apotsün nai si tsüwesankü nai noin apaüh kipsanji.

¹³Tsaosilao naiuso tsosilu nouso khako apaüh atsüojin yangkiuji; apo nai noitsünso aa nou apaüh kipsanji.

¹⁴Apaüh ngüso athangmang naiuso shelopengtsün ainou kipsanji; ngüso aa nung apa thaiutha chaiou noin.

¹⁵Nokpao aakihlaiukü lünoi! Arabia ainou chaiuo lakkeng apa hau lükiu; asaichi ta apa thaiutha misaokü anoi-i; Goa ün ouk nouso apa khako asaita anoi-i!

¹⁶Goh nai khülam saiukü noi-e; Lebanon nai eiusantsünli choi nouso ahesishiu nou thapokkü lünoi. Kengpun nou khengliu nou meankü noitsünli, noknio nouso khaiunia nou meankü lünoi.

¹⁷Nokpao ün nian tilaitso labean-i; aje noitsün lektso apa niansong nou lünoi-i. Apaüh nokpao ouk kiutsünli mele chikü nou Goa tü ngüso ouk kiu ao sange.

¹⁸Israel Goa, APAOU nou lülomsan! Nungso athanga chhisiya nou apaühlu chhiji.

¹⁹Apa ajinka nian athontsüyangkü lülomsan! Apa ajinka nou goumchi apem miankü lünoi. Amen! Amen!

²⁰Jese thso David misao nouso nungko thonlouji.