Read Khiamniungan Naga Nianlom Jih 73 Bible Online

Nianlom Jih 73 - Khiamniungan Naga bible

Nianlom Jih 73

¹Goa nou atsüoting Israel tü meikü noin, sauhai mongpem sanglingkü noin ngüso tü meikü noin

²Lüko jü amonglamtsün mowanao shimkü noiküla jü amonglam khemankü noiküla.

³Tiautenai ngo tsümeikünso atsüomei nai ep nai ngo abülomhoi nouta niovei kiakü noiküla.

⁴Ngüso kiasiyakü naiuso omhekü tsünoi; ngüso kongsimongkü naiuso meileikü noin.

⁵Amao khaiuniahoili ngüso omhekü tsünoi; amaohai angja noitsünli ngüso angja tsünoi.

⁶Nungtiphe abülom nou lak tsak khekkü naiuso alothe chhisiyatsün neshe-e tsak khekkü ngüsoüh tholokü noin;

⁷ngüso mongpem nousoüh tsümeikün phushiji, naiuso ngüso mong akausai mongthat nou tsükengtingkü noin.

⁸Ngüso amao khaiuniahoi tü nyailutji naiuso tsümeikün singioji; ngüso abülom nou amaohai thangmangau yam yamji.

⁹Aün Goa thaiutha ngüsoüh tsümeikün chiteji naiuso goumchi nai noitsün khaiuniahoi hau atsüojin tsülepkü ngiokhem kiuji.

¹⁰Nungtiphe Goa ün khaiuniahoi lüko ngüso tü mongkiukü ngüsoüh tilüsong ngioji nung ta mongchiokü angji.

¹¹Ngüsoüh ngioji, “Goa nou tsünge-e; Akhengting Goa nou nung tsüepsane.”

¹²Nungti tsümeikünso nung khekkü noin. Ngüsoüh saiukü taiu naiuso asaita piakü epji.

¹³Nungaito, ngo jüpem sanglingkü taiutsün naiuso angei tsüsunlokü noitsün nung yaang süne?

¹⁴O Goa, ajekhaiu thathonkü ni ngü angja-in nyaptso tsütokü ni ngü hau angja kiu.

¹⁵Ngo nungti nou ngiokü noikü thanaito, ngo akhaiuniaso tsaklito chhisiyakü tsünoi-ela.

¹⁶Ngo nung thsale nouta thonekü yanglu au kowekü noiküla, lüko ngo ni Amkham Tsamai monapkün lektso

¹⁷jü thaiutha nung thatü achek noiküla. Nungai tsümeikünso tü ti thawao-e nung ngo ngela.

¹⁸Ni ngüso yamai anyinchei nouso taiu-e naiuso ngüso salikü mowan-iji.

¹⁹Ngüso jamaolu lomowaniu; ahat athsüoting tsak nouko ngüso thonaniu.

²⁰Ahom tsüepshikü mowantsün miamian tsak khekkü ngüso noin; O APAOU, tilai ni apem thsüo-e, ngüso tsüepshikü mowanji.

²¹Tilai jümongyang khosakkü naiuso tawaikü noiküla,

²²ngo mongyang tsünoikün thainian tsakli; ngo ni tsüngelakü noiküla.

²³Lüko ngo asaita ni shimkü noiji, naiuso ni ngü tü pha nai helo.

²⁴Ni amongyang nou ngü niakei-e naiuso athon nai ni ngü asuhat nouko waolo-e.

²⁵Ni tü shimkü aün nai ngo ti taim? Ngo nitü shimkü goumchi nai ngo aiutsün sau noishin?

²⁶Jümong naiuso jüshesinyih tsaosilaokü iulaau noin, lüko Goa jü oukong noin; Ngo potsün apem nouko apem apalu noin.

²⁷Sauhaiüh ni wananji ngüso tongtü mowane; sauhaiüh nitü tsümonglamji ni ngüso lomowane.

²⁸Lüko jü thaiutha to, Apem khaiuko APAOU ko aalo epau naiuso apaüh chhisiyakü noitsün chikü wepengkü, Goa dongko simkü noiau titi athanga!