Read Khiamniungan Naga Nianlom Jih 77 Bible Online

Nianlom Jih 77 - Khiamniungan Naga bible

Nianlom Jih 77

¹Goa tü sangh asong nou ngo weji; ngo sangh asong nou weji, naiuso apaüh ngü wetsün lulaji.

²Angja taoko ngo APAOU tü misaoji asoh chikü misao nai jüpha loksanji, lüko ngo aalo epau tsüshioji.

³Ngo tilai Goa yangji, ngo mongyang piaji; tilai ngo aokü yangji, ngo outsükongkü iulaji.

⁴Asoh chikü apaüh ngü tsüsaila-ikü taiuji; Ngo thatü yangelat nou ngo ti chiteau tsüshioji.

⁵Ngo akhuwan ajekhaiu nouso yangshiji naiuso laiukü yankü shitsün pon nouso yangshiji.

⁶Ngo asoh nou aokü monghentsün nai wanji; Ngo yangheji, naiuso ngü jü chija nungti in ta sangji:

⁷“APAOU nou sam asaita wanane süne? Apaüh tilaitso samko monglengkü tsünoishi-e süne?

⁸Apa athaloutaiu nou tsünoishi süne? Apaüh sam tü tsüojintsün laowaniu süne?

⁹Atsüojinyang kiuau Goa nou beaniu süne? apa atsüojinyang liko amongmat sungji süne?”

¹⁰Nungai ngo ngiom, “Ngo athsüoting yangelattsün nung noiküla- Goa loto oukong ti tsünoishi.”

¹¹APAOU, achhisiya asong nouso ngo yangsane; Ayanan taoko ni athanga chhitsünso ngo yangsane.

¹²Ni chhisiyakü shitsün chikü thaiutha ngo yanghe-e; naiuso a-oukong chhi nouso da ngo aoukü yange.

¹³O Goa, ni chhitsün to alum asio noin nitü songkü ti goa tsünoi.

¹⁴Athanga chhi nouso chhitsün Goa nou ni noin; mele nouso ongko ni a-oukong haniu.

¹⁵Yakob naiuso Yosep thsaosithsoso akhaiuniaso a-oukong tsangkü kipsan.

¹⁶O Goa, tilai khiam nousoüh ni ep, ngüso hatkü noiküla, naiuso a-outeng khiamnok nou ngaongaokü noiküla.

¹⁷Thengmia nousoüh ah-ou nou hongin; maou nai ahmok nouso khuowe, naiuso aniokün pungkü nai ahsalap nou lapkü noiküla.

¹⁸Ahmok ngem nung lailokü khuwan, naiuso ahsalap awon nou goumchi awon-in; goh nou ngaongao naiuso haiuhaiukü noiküla.

¹⁹Ni khiampek nouso tsangkü tsakei; ni a-outing khiamnok nou yankü khu, lüko ahokngamthang epau tsüshio.

²⁰Ni akhaiuniaso onnemok jimtsün nou niakeitsün khekkü, Mosa si Aron ne tsangkü niakei.