Read Khiamniungan Naga Nianlom Jih 78 Bible Online

Nianlom Jih 78 - Khiamniungan Naga bible

Nianlom Jih 78

¹Jü khaiuniaso, ngo atsandetsün tü anglu, naiuso ngo ti ngioji nung ta mong lükiu.

²Ngo athatlu ngio nouso kankeikü jüngio yalou-e naiuso ayanan taoko tsangtaiukü noitsün ngio nouso chite-e.

³Ti sübao samüh lula naiuso ngen, naiuso sam paosiposoüh sam hau chiten.

⁴Sam thsoso khako samüh nungso tsangkü tsüwane; lüko samüh APAOU ün oukong naiuso apa chhisiya asong nouso naiuso apaüh athanga chhitsün chhi nouso chikü ashiau noitsün vetaohau chite-e.

⁵Apaüh Israelhai hau ngiokhem nouso naiuso Yokob thsaosithsoso hau athoilut nouso kium. Sam paosiposo tü apa ngiokhem nouso ngüso thsoso hau tsandeau apaüh ayam nou han,

⁶nungtiphe nungthan vetao nou nung ngiokhem nouso ngeloküta ngüso thsoso tü lelutkü chiteshi-e.

⁷Nungli ngüsoüh ngüso amonglam Goa da taiu-e naiuso apaüh ti chhin nung tsübeane, lüko apa athoilut nouso asaita angio ange.

⁸Ngüso paosiposo to akhengshi naiuso angio tsüangkün khaiuniahoi, Goa da ngüso amonglam tilaitso mongkü tsütaiu, nung khekkü to ngüso thsoso tsüthe-e,

⁹Efraim hai, ehliau uokoppai naiuso uokopchon nou khemlou, küta ehli ajekhaiu nai laokü khuwan.

¹⁰Ngüsoüh Goa ko, athalou-e tsükankei; ngüsoüh apa ngiokhem angio tsü-ang.

¹¹Apaüh ti chhin nung ngüsoüh bean, apa athanga chhisiya ngüsoüh epkü shitsün bean.

¹²Ngüso paosiposoüh thapkü noitsün taoko Zoan tsamei nai naiuso Ijip goumchi nai Goa nou athanga chhi nouso chhin.

¹³Apaüh khiamnok nou janthat naiuso ngüso nung yankü niashi; apaüh khiam nouso dioai khekkü tsakü noi-i.

¹⁴Anyih apaüh ngüso thengmia tsak ko naiuso asoh chikü inkheam awon nou apaüh ngüso niakei.

¹⁵Apaüh liutsa nai lung nouso lopai naiuso akhei ainou khiam ngüso hau ashiu-au kium.

¹⁶Apaüh lung ainou khiam chetsan-i naiuso nung haiu tsak khekkü tsang-in.

¹⁷Lüko ngüsoüh Goa thako angei tsülaokü chhin, naiuso liutsa nai ngüsoüh Akhengting Goa thako khengshikü noiküla.

¹⁸Ngüsoüh aiutsün eheshiu saotsün tsangkü ngüsoüh Goa tü lilu.

¹⁹Ngüsoüh Goa khako chite naiuso ngiom, “Liutsa nai Goa nou eheshiu kiu-au shio-e süne?

²⁰Atsüoting apaüh lung nou tü shiuhkü, khiam nou saiukü tsangshi; lüko apaüh sam hau themtsai kiuao; naiuso apa khaiuniaso hau nyih kiuao shio-e süne?

²¹Nungtiphe tilai apaüh ngüsoüh ngiotsün lula; APAOU mongmatkü noiküla; apaüh apa khaiuniaso tü in tsangkü puo, naiuso ngüso thako apa amongmat sungh,

²²tiautenai ngüsoüh apa da amonglam tsütaiu naiuso apaüh ngüso kipsane ta tsümonglam.

²³Lüko apaüh khütha nai maou nousotü chitekü ngiom, naiuso kou nouso sopanau thoilut;

²⁴apaüh ngüso hau aün ainou eheshiu kium, apaüh ngüso khako eheau thaiutha manna hongin.

²⁵Nungtiphe ngüsoüh honghoi chihsikhiam nou heshiu, naiuso Goa nou ngüsoüh mongchiotsün chikü ngüso hau kium.

²⁶Apaüh loüh shingan ahsheih shei-i, naiuso apa oukong tsangkü apaüh shingmi ahsheih sungi;

²⁷naiuso haiusai nai singtso tü piakü apaüh apa khaiuniaso hau liuwaio nouso hongikium.

²⁸Nungso nejenkhio nouso chikü lemkü ngüso saothang awemting nouko salin.

²⁹Nungtiphe khaiuniahoi nou he naiuso ngüso mongchio thasangkü noiküla; Ngüsoüh mongchiotsün Goa nou ngüso hau kium.

³⁰Lüko ngüso loüh achinek mongtsam mothasangkü ngüso loüh hekü noi nai,

³¹Goa ngüsoko mongmatkü iula naiuso ngüso akongting khaiuniahoi, Israel hai ameiting nouso loatkü wan.

³²Nungti chhi lüko khaiuniahoi nou angei chhilutkü noiküla; apa athanga chhisiya nouso chhi lüko ngüsoüh apa da amonglam tsütaiu.

³³Nungtiphe apaüh ngüso ajekhaiu nouso ilo tsak khekkü naiuso ngüso aa nouso alekta akuothe nai thonani.

³⁴Tilai apaüh ngüso ajantso loatkü wan, nailu nungai apoi nouso apa dongai laokü shin; ngüso mongphokle naiuso apa tü mongkiukü misao.

³⁵Goa nou ngüso solotsün noiküla ta, naiuso Akongteng ngüso haloau shin ta ngüsoüh yangsan.

³⁶Lüko ngio chikü yaang noiküla; ngüsoüh ngiotsün saitha tsünoiküla.

³⁷Ngüso mong apako saitha tsünoiküla; apa ngiomongshinge ngüsoüh tsüokü tsütaiu.

³⁸Lüko Goa nou apa khaiuniako atsüojinyang noiküla. Apaüh ngüso angei wankiu naiuso ngüso lomoko tsüwan. Piaküjam apaüh apa mongmattsün lolao, naiuso apa mongmat sung thatsamlou.

³⁹Naiuso ngüso nung shesinyihlu ta, ahsheih sheitsün naiuso yanlükhuntsün tsak ta apaüh yangshin.

⁴⁰Titsojam liutsa nai ngüsoüh apa tü khengshi; naiuso ngüsoüh apa titsojam mongmati!

⁴¹Ngüsoüh Goa tü thelulutkü noiküla naiuso Israel ün Asio Goa mongkia-i.

⁴²Ngüsoüh apa oukong asong naiuso ngüso ehso ainou ngüso kipsantsün ajekhaiu

⁴³naiuso Ijip goumchi Zoan tsamei nai apaüh athanga chhitsün bean.

⁴⁴Apaüh haiu nouso she iula-in, naiuso Ijip haiüh khiam ashiu-au tsünoiküla.

⁴⁵Apaüh ngüso ongko chinyih nouso hong, naiuso nungüh ngüso hau angjakiu, naiuso ngüso goh lothekiu au lekiu nouso hong.

⁴⁶Apaüh ngüso chihsikhiam heanau naiuso ngüso eiu nouso lothekiuau jongku nouso hong.

⁴⁷Apaüh ngüso sainaoshep eiu san nou naiuso phiopai nouso atangsep nou loatan.

⁴⁸Apaüh ngüso thainian san nou naiuso ngüso onnemok hoi ahsalap nou loatkü wan.

⁴⁹Apaüh ngüso khako apa athsüoting amongthe, amongmat, amongkia naiuso ean ngiongem kantsün hong nouso hongshin.

⁵⁰Apaüh meshen amongmat tsüjeitaiu tsüdekünai ngüso aa tsüpoitaiu, lüko imkia tsak nou ngüso loatkü wan.

⁵¹Apaüh Ijip hai tsamkhaiu chikü nai melothso yamchong nouso loatkü wan.

⁵²Nungai apaüh apa khaiuniaso onnemok jimtsün tsaküh niasantsünli niasan naiuso ngüso singtsogoh yankü niakei.

⁵³Apaüh ngüso tsühatikü meikü niasan; lüko ngüso ehoi khiamnok nouko limatan.

⁵⁴Apaüh ngüso apa asio goumchi nai, apaüh shioloukü shitsün king nouso saokü niakü shin.

⁵⁵Apa khaiuniaso khutsün taoko, kihtaiukü noitsün khaiunia nouso apaüh koman; apaüh ngüso goh Israel hai kau mongko janekium naiuso ngüso tsam nouso apa khaiuniaso hau kiuwan.

⁵⁶Lüko ngüsoüh Akongteng Goa thako khengshikü tsalou naiuso apa ta thelu. Ngüsoüh apa athoilut nouso angio tsü-ang,

⁵⁷lüko ngüso paosipoüh lilukü khengshi naiuso mongtsükiukü tsalou, mongtsülamkü siangkü khutsün uokopchon tsak khekkü ngüso noiküla.

⁵⁸Paisilung amthang nousoüh apa mongmat in, naiuso ngüso sotsom goa amtsünko ngüsoüh apa nioveikia sung-in.

⁵⁹Tilai apaüh nung ep Goa mongmatkü noiküla, nungtiphe apaüh apa khaiuniaso thumkü lean.

⁶⁰Sam ongko apa kihtsün tsam, Shiloh nai noitsün nejenkhio nou apaüh lean.

⁶¹Apaüh sam ehso hau Athalou-e Ngiokhem Paidan thaloukü khuwanau sopkiu, nung apa oukong naiuso ajinka ii nou noiküla.

⁶²Apa meshen khaiuniasoko mongmat sungh naiuso ngüso ehoi hau ngüso loatkü wani.

⁶³Pühehoi nouso ehli nai loatan, naiuso mesohoi tsamsigoh yangau pühe tsaktso tsünoishiküla.

⁶⁴Mesonhoi nouso sahsingio ngem nai ean, naiuso ngüso tsammongnyiu nouso hau mia tsüshapi.

⁶⁵Saikü noi ainou chutsünli phikükü APAOU nou chu; apa akong khaiunia tsak theng tsangkü monglingitsün khekkü noiküla.

⁶⁶Apaüh apa ehoiso tsüshiolokün amiam nai asaita hau koman.

⁶⁷Lüko apaüh Yosep thsaosithsoso wanan; apaüh Efraim mele tsüchosan.

⁶⁸Nungliko apaüh thatü tsüojinkü noitsün Yihuda mele naiuso Zion king chosan.

⁶⁹Nungko aün nai apa tsam khekkü apaüh apa Amkham Tsam lahsan; apaüh nung goumchi mongkü noitsün khekkü asaita thaiutha aalokü noi-au shan.

⁷⁰Apaüh apa yathsüotsün David chosan; David apa onnemok hoi jimkü noitsün ainou shingsan,

⁷¹apa meshen onnemok jimkü noitsünko, apaüh David Goa ün khaiuniahoi jimau Israel nokpao theau shan.

⁷²Nungtiphe Davidüh thumkü ngüso paotsang naiuso apaüh a-nge amon nou ngüso niakei.