Read Khiamniungan Naga Nianlom Jih 81 Bible Online

Nianlom Jih 81 - Khiamniungan Naga bible

Nianlom Jih 81

¹Sam kiplotsün Goa tü sang asong nou monglingkü lüwe; Yokob Goa tü alomsan jih lüjih!

²Jih nou lüyalou naiuso son nou lükhowe, poipoi naiuso kokiang nouso hakü jih amei lüjihlut.

³Alei Yan taoko naiuso alei ngoi taoko nai, sümai thaiutha jongong lümat.

⁴Nung Israel nai ngiokhem noin, naiuso Yakob Goa ainou don yam noin.

⁵Tilai apaüh Ijip goumchi kumkü noiküla apaüh nung ngiokhem Israel khaiuniahoi hau kiu. Ngo tsüngekün sangh tsaküh ngiotsün lula,

⁶“Ngo angamtha ainou thsale nouso kanloukiu; Ngo ni nou lung thsa nouso kan-ikiu.

⁷Tilai ni angja nai noiküla ni ngütü jon, naiuso ngo ni kipsan. Tsangkü noitsün jü noithang ainou ngü nitü thalan. Meriba haiuthso ko nai ngo ni thelu.

⁸Jü khaiuniaso, ngo lotsüotsün tü anglu; Israel, asamüh ngütü ang-etünaito!

⁹Ni amao goa tilaitso la amkham.

¹⁰Sauüh ni Ijip ainou niasan, nung Ngo APAOU a Goa noin. Asun songkü akopeng, naiuso ngo ni tsade.

¹¹“Lüko jü khaiuniasoüh jü ngio tsü-angla, Israelüh ngütü angio tsü-ang.

¹²Nungtiphe ngo mongkongtsün yamai khu-i naiuso ngüsoüh mongchio nou chhi-in.

¹³Jü khaiuniasoüh ngütü anglu auya ta ngo mongchioji; ngüsoüh ngü ngiotsün ngiotü angau ya ta ngo yangji!

¹⁴Ngo ngüso ehoi shakta shio-ela naiuso ngüso ehso chikü shiohe-ela.

¹⁵Sauhaiüh ngü chinyanji ngüso jü khako ahat nai kauthio-e; ngüso angja eptsün athontsüyange.

¹⁶Lüko ngo wheat tso ameiting nou tsade naiuso liuai noitsün liukhiam nou among tsami-e.”