Read Khiamniungan Naga Nianlom Jih 89 Bible Online

Nianlom Jih 89 - Khiamniungan Naga bible

Nianlom Jih 89

¹O APAOU, ni nou asai atsüojin thaiutha ngo jih hange; Ni mongkiutsün thaiutha ngo asaita wepenge.

²Ni atsüojin atao chiküko noi-e ta ngo ngeji, ni mongkiutsün nung maouli asai tsülemlemkü noi-e.

³Ni ngiom, “Ngü chosantsün khaiuniahoiko ngo athalou-e tsak shaniu; jü tsamki David tü ngo nung thalou-iu.

⁴‘Athsaosithso ongko tsak asaita hau nokpao the-e. Ngo amele asaita uosankü taiukiu-e.’”

⁵Aün nousoüh ni athanga chhitsün jih jihji. Asio nousoüh ni mongkiutsün jih jihji, APAOU.

⁶APAOU, aün nai ni khekkü tsaktso tsünoi; aün ainouso niko wekü tsaktso tsünoi.

⁷Asiohoi ajeiaikam nai ni asuhatji; naiuso ngüso chikü ni hau asuhat kiukü tsaji.

⁸Apemshiotsün APAOU Goa, ni li oukongkü tsaktso tsünoi; O APAOU, ni mongkiutsün alumai noin.

⁹Akongting Khiamnok khako ni nok-shingji; ni nung amongmat khiampek nouso lotsamji.

¹⁰Ni ahatau lümeikün thainian Rahab shiolo naiuso loat; ni a-oukong nou eh nouso shiolou-iu.

¹¹Aün naiuso goum lüko ni nou noin; ni goumchi nou naiuso nungko noitsünso alum shan.

¹²Ni ajepekki naiuso ajenapki nou shan; Tabor king si Hermon king neüh ni tü koikü jih hanglutji.

¹³Ni titi oukong noin! A-oukong titi asong noin!

¹⁴Anokshing nung asio naiuso ngiotsüo chiai tsakü noin; ni chhisiyatsün chikü nai atsüojin naiuso amongkiutsün hanji.

¹⁵Jih hakü sauhaiüh ni amkhamji ngüso to thaiumei, ngüso ni atsüojinyang awon nouko tsakeiji!

¹⁶Ni shioko ngüso ajekhaiu thathonkü monglengatji, naiuso ni mei nou thaiutha ngüsoüh ni lomsanji.

¹⁷Ni samhau ashiolotsün asong kiuji, atsüojin nai ni samhau ashio nou epiji.

¹⁸O APAOU ni, sam sokiuao achosan; ni, Israel Goa Asio nou, sam nokpao theau kium.

¹⁹Atao laiukü khu-iu ni yathsüotsün atsamki tü ni atsangshei nai ngiokü noiküla, “Ngo süpai atengting tsak hao ahachu kiu-iu; Khaiunia ainou chosantsün tsak hau ngo nokpao noikham nou kiuwaniu.

²⁰Asio khaiutsom tsomkiukü ngo jü tsamki David nokpao theau shaniu.

²¹Jü oukong apako asaita noi-e, jü oukong nou apa lomonge.

²²Apa ehsoüh apa thako laitso ashio tsü-eppe; Tsümeikünsoüh apa tsüshio-e.

²³Apako tsaotsünso ngo shiokiu-e, naiuso apa chinyantsünso chikü loate.

²⁴Ngo apa tsüojine naiuso apako ngiotsüo noi-e; Ngo apa asaita ashioloutsün hau shane.

²⁵Ngo apa nokshing Mediteranean khiamnok ainou Eufrates Haiu saokü losunge.

²⁶Apaüh ngü tü ngio-e, ‘Ni jüPo naiuso jü Goa noin; ngo kiploutsün naiuso kipsantsün noin.’

²⁷Ngo apa jü melothso yamchong naiuso nokpao nouso chikü khako asongtingau shane.

²⁸Ngo apako jü athalou-etsün asaita taiu-e, naiuso jü athalou-e apako athontsüyangkü noi-e.

²⁹Apa nokshing maou nouli asaita noi-e; apa thsaosithsoso ongko tsak asaita nokpao-e.

³⁰“Lüko apa thsaosithsosoüh jü ngiokhem tsüangkü naito naiuso ngü thoiluttsün tsangkü tsükihkü naito,

³¹ngüsoüh jü ayamhan nouso tsüwesankü naito naiuso jü athoilut nouso tsükankei naito,

³²nungaito ngo ngüso angei thaiutha angja kiu-e; ngüso tsüthakün thaiutha ngo omhe-i-e.

³³Lüko ngo David tsüojintsün tsülao-e tsüdekünai apako jü athalou taiutsün tsülao-e.

³⁴Ngo apako jü athalou taiutsün tsülothe-e tsüdekünai ngo thaloutaiutsün tsak lüko tsünanloshi-e.

³⁵“Asaita hau thaiutha jamnailu ngo jü asio nian tsangkü thalouwaniu: ngo David tü tilaitso yaang tsüngio-e.

³⁶Apa ta asaita thsaosithsoso noi-e, naiuso aje jetsün molaokün lektso ngo apa nokshing khako thapkü noi-e.

³⁷Nung maou nai alei nouli asaita, nung monglamao thaiutha nou noi-e.”

³⁸Lüko ni chosantsün nokpaoko ni mongmatkü noin; ni apa leaniu naiuso wananiu.

³⁹Ni yathsüotsünko ni athalou-e lotheaniu naiuso apa nokpao kandeo puchet nai yakkan.

⁴⁰Ni apa noknio Pe nouso ngeksatkü wan, naiuso apa ehüpuo nouso lothekü wan.

⁴¹Nungko yankeitsünsoüh apa jengtsaiu kaulowanji, naiuso apa phaosiposo chikü apatü nyailutji.

⁴²Ni apa ehso hau ashioloutsün kiuwaniu; ni ngüso chikü monglengi-iu.

⁴³Ni apa ehli jengtsaiu nouso yaang iula-i naiuso apa ehli nai shiolouwan-in.

⁴⁴Ni apa nokpao pailai kankü khuwaniu naiuso apa nokpao noikham goh ai loiani-iu.

⁴⁵Ni apa meshen atao khako sonan-i naiuso apa amiam nou mian-in.

⁴⁶APAOU, ni achija asaita pamkü noi-e süne? Ni tilektso innyai khekkü mongmate?

⁴⁷Jü aakih titi letkü noin ayangsan; ni sam chikü eanao nai shan ta lüyangsan.

⁴⁸Tilaitso tsü ekü sau kih au shio-e? Ee bekhan ainou khaiunia sauüh loyangau shio-e?

⁴⁹APAOU, ni pe nai tsüojintsün mitha nouso tiai noin? Ni David ko athalou-e shantsün tiai noin?

⁵⁰Ni yathsüotsün ngo, titi lochilotsaokü noin, Goa tsüngekünsoüh athesan kiutsün ngo titi jeilo, nung labean.

⁵¹O APAOU, ni ko tsaotsünsoüh ni chosantsün nokpao lochilotsao-iu! Apa khutsün apemai ngüsoüh apa lochi lotsaoji.

⁵²Asaichi APAOU lülom! Amen! Amen!