Read Khiamniungan Naga Nianlom Jih 9 Bible Online

Nianlom Jih 9 - Khiamniungan Naga bible

Nianlom Jih 9

¹APAOU, jümong apemüh ngü ni lomsane; Ni athanga chhisiya chikü thaiutha ngo chite-e.

²Ni shioko ngo amongling nouko jih jihko. Akongteng Goa, ngo ni tü nianlom jih jih-e.

³Tilai ni tsangsheikü epji, jü ehso kha phokleküta ngüso loikü eanji.

⁴Amikhem saitha naiuso ngiotsüo noin, naiuso ni ngü jungloukü mi khemiu.

⁵Ni ti tsüngekünso wananiu; naiuso tsümeikünso lomowaniu; ngüso loto tsüyangsanshi-e.

⁶Sam ehso asaita thaiutha khemiu; ni ngüso noknio nouso lomo-iu, naiuso ngüso thumkü beaniu.

⁷Lüko APAOU athontsüyang nokpao noin; Mikhem thaiutha apaüh meshen nokpao noikham khemiu.

⁸Apaüh goumchi nou asio nai nokshingji; apaüh mele nouso ngiotsüo nai mi khemji.

⁹Thangmangkü noitsünso thaiutha APAOU asolotsün noin, angja taoko apa akipsanloutsün thang noin.

¹⁰APAOU, sauhaiüh ni ngeji, ngüsoüh ni da amonglam taiu-e; adongai shitsünso saulünou ni tsüleanji.

¹¹Zion nai nokshingtsün APAOU, tü nianlom jih lüjih! Apaüh ti chhikü noin nung mele nouso hau lüchite!

¹²Sauhai omheji Goa nou yangsanji; ngüsoüh wetsün apaüh tsübeanji, sauhaiüh ngüso tü tsüthakü chhiji apaüh ngüso angja-iji.

¹³Ngü tü atsüojinyang anoi O APAOU! Jü ehsoüh ngü hau angja kiutsün tü athap! Eantsün ainou ngü akipsan, O APAOU.

¹⁴Nungtiphe Yirusalem khaiuniahoi khako ngo tsaküta ngo ni loksantsün chhisiya chikü thaiutha ngüso hau chite-e. Ngo koi-e tiautenai ni ngü kipsaniu.

¹⁵Ti tsüngekünso meshenüh thaiutaiutsün khan nai sathio-iu; ngüsoüh jintaiu nai ngüso monniu.

¹⁶Apa asio mikhem tsangkü APAOU apa pem tsangsheikiu-iu, naiuso tsümeikünso meshen chhisiya tsangkü mowaniu.

¹⁷Goa tsüloutsün akausaihoi thaiutha eantsün nung athon.

¹⁸Tsüsaiu tsüomkü noitsünso asaita to tsübeane; naiuso angjahai thaiutha ayangtaiu asaita hauto tsülomowane.

¹⁹Ashi, APAOU! khaiuniahoi hau ni lashiohean-i! Ti tsüngekünso akhako niakü shiküta ngüso tü mikhem nou lüwelut.

²⁰O APAOU, ngüso ahat nai ataiu; ngüso hau ngüso lüko eantsün khaiunia ta lüngela-i.