Read Khiamniungan Naga Nianlom Jih 90 Bible Online

Nianlom Jih 90 - Khiamniungan Naga bible

Nianlom Jih 90

¹O APAOU, ni asaita sam kihthang noikü shin.

²King nouso moshankün khako tsüdekünai goumchi nou mosungkü naita, Ni to asaita Goa noiküla, naiuso athontsüyangkü Goa noi-e.

³Ni khaiunia noutü apa ti noiküla nung khekkü laokü khushiau ngiom; ni apa pu au iula-ishiji.

⁴Athaiutha pon heng tsak nou ajekhaiu tsak khekkü noin; nungso yanlükhuntsün münyi ajekhaiu khekkü naiuso asoh atao letletkü tsak khekkü noin.

⁵Ni sam khiamthe tsak khekkü kankü khuji; sam miamian tsakli letletkü. Ahom sangpon tsak samsantsün khekkü sam noin;

⁶nung samsanküta thukpunkü punsanji, küta asham nung wonkü khukü eanji.

⁷Ni mongmat nou tsangkü sam mowanji; ni mongthe nou tsangkü sam lekkatji.

⁸Sam angei nouso akhako taium, samüh akau ai chhitsün angei nouso akhako epkü noin.

⁹Ni mongmattsün tsangkü sam aakih loletanji; nung ilo tsak khekkü yankü khuwanji.

¹⁰Sam aakihlaiu apem nai pon aochinyatlu, kongkü naiüh pon aopetjeilu; lüko nungüh sam hau angja naiuso amongkia kankü shiji; aakih nou shakta yananji naiuso sam khuwanji.

¹¹Ni mongmattsün sauüh apem ngeau shio-e? Ni mongthetsün nou ti ahat kankü shi-e ta sauüh ngeji?

¹²Sam aakih ajekhaiu ta linglukü theao sam hau atsande, nungai sam mongthat mongsai noikü iula-e.

¹³Ni tilektso laiukü mongmate? O APAOU, ni yathsüotsün khako atsüojinyang anoi!

¹⁴Sam aakihlaiu chikü sam monglingkü jih hangau, ni asai atsüojin nou ahom pungkü sam amongtsami.

¹⁵Sam aküothe pon atao nouso lektso naiuso ni sam hau mongkia kiutsün liko lo sam hau amongling saiukü akiu.

¹⁶Sam ni yathsüotsünso hau ni nou oukong chhisiya nouso a-epi; naiuso sam thsaosithsoso hau ni nou ajinka oukong a-epi.

¹⁷APAOU sam Goa, ni nou ouk samko hakü anoi-i. Sam chhisiya chikü nai ashio nou akiu!