Read Khiamniungan Naga Nianlom Jih 94 Bible Online

Nianlom Jih 94 - Khiamniungan Naga bible

Nianlom Jih 94

¹APAOU, ni Goa sau pha nai athamshitsün noin; ni nou amongmat tsangsheikü hanji!

²Ni khaiunia chikü mi khemtsün noin; atsalou naiuso abülom nouso hau ngüsoüh epau ti maikü noin nung akiu!

³Tsümeikünso ti lektso monglingate? APAOU, ti lektso monglingati-e?

⁴Tsümeikü chhitsün ti lektso bülome, naiuso tsümeikün chhisiya thaiutha mongsonge?

⁵APAOU, ngüso akhaiuniaso ta poji ngüsoüh akhaiuniaso thangmangji.

⁶Ngüsoüh jihi naiuso mejet nouso loatji, naiuso sam goumchi nai kihtsün mesanhoi loatji.

⁷Ngüsoüh ngioji, “APAOU nou sam tsüepji; Israel Goa nou tsüngelaji.”

⁸Jü khaiuniaso, asam titi nungti tsüngelakü a-aiu noi-e? Asamüh tilai ngela-e?

⁹Goa nou sam noukhanso shan — apaüh lulaau tsüshio süne? Apaüh sam niovei nouso shan — apaüh epau tsüshio süne?

¹⁰Apaüh mele nouso tü thutji — apaüh ngüso tsülohate süne? Apa khaiunia chikü ün atsandetsün — apaüh ti tsünge süne?

¹¹APAOU nou ngüsoüh ti yangji nung ngeji; apaüh ngüso ayang tsüpungtsün ngeji.

¹²Ni lothakiutsün khaiunia titi thaiumei, APAOU, khaiunia sau hau ni angiokhem tsandeji apa thaiumei!

¹³Tsümeikünso khan nai mothaiuwankün lektso ni apa hau angja ajekhaiu nouso taoko aalo kiuji.

¹⁴APAOU nou apa khaiuniaso tsüleane; naiuso sauhai apa ün noin ngüso tsüwanane.

¹⁵Mikhem tsam nai loüh jam ngiotsüo nou epshi-e, naiuso nung ta asio khaiunia chikü nou hoilute.

¹⁶Jü thaiutha tsümeikünso ta khengshikü sau tsa? tsümeikü chhitsünso tü khengshikü jü thangko sau tsa?

¹⁷APAOU nou ngo tsühachu tünto, ngo liukü atsamlou goumchi nai khuwankü noi-ela.

¹⁸Ngo ngiom, “Ngo sali-anji”; lüko O APAOU, ni nou asai atsüojin nou ngü loksan.

¹⁹Tilai jümong ayangelat nou mianji, ni ün aalo nou jü onthso monglingiji.

²⁰Alothe mikhem kiutsünsoko ni tiko we-eau tsünoi, ngüsoüh ngiotsüo tsüdekü nou ayam thakü iula-iji,

²¹sauhaiüh khaiunia mei nouso thako kausaikü thatji naiuso aphio tsülepkünso eau shanji.

²²Lüko APAOU nou ngü sojeikiuji, jü Goaüh ngü soloji.

²³Apaüh ngüso tsümeikün thaiutha angja kiu-e naiuso ngüso angei thaiutha ngüso lothe-e; APAOU sam Goaüh ngüso lomo-e.