Read Khiamniungan Naga Ngiopung Ngiothi 1 Bible Online

Ngiopung Ngiothi 1 - Khiamniungan Naga bible

Ngiopung Ngiothi 1

¹Israel hai Nokpao David thso Solomon ün ngiopung ngiothi ngio nouso:

²Nung ngiopung ngiothi ngio nousoüh mongthat mongsai naiuso ayamhan amei, naiuso alat aokü hakü ngiotsün ngio nouso ngela au asam tü hachu-e.

³Nungsoüh mong- yang noikü, ngiotsüo nai, saitha nai, naiuso atha nai titi kih-e nung tsande au shio-e.

⁴Nungsoüh mongekün khaiunia hau angelatsün kiuau shio-e, naiuso pühehoi hau shakta ayangloutsün monkü theau tsande-e.

⁵Nung ngiopung ngiothi ngio nousoüh ange amon khaiuniahoi hau loüh angetsün naiuso thsamngehoi hau ayamhan nou kiuau shioji,

⁶nung tsangkü ngüsoüh ngiopung ngiothi akhei alat nouso naiuso ange amon khaiuniahoi nousoüh lousan- tsün achek ngio nouso ngelaau shio-e.

⁷Ni ange epau aya nai APAOU lon asuhatau noin. Lüko a-aiu khaiuniahoi nousoüh mongthat mongsai chinyanji naiuso angelouau tsümongchioji.

⁸Jüthso, apo si anyiu neüh nitü ti thiji, nung tü mong lükiu.

⁹Ngüsoüh tsandetsün nou alengmei kandio tsüdekünai lakkom tsaküh ni lotinkiutsünli asakshi lomeikiu-e.

¹⁰Jüthso, angeihoi nou nitü paiu nai, ni lahoilutha.

¹¹Ngüsoüh, “Ashi, samüh ajantso loat au yamko! Samüh ti aphio tsüsunkünso ajantso tü pha poh ko!

¹²Samüh ngüso eploutsün taokoto aa amei noikü tha au shiom, lüko tilai samüh ngüso yankü khu-e ngüso ee noi-e!

¹³Jengtsaiu apia mai samüh in pungkü eppe, naiuso a-aploutsün jengtsaiu nou samüh sam tsam thameane!

¹⁴Ashi, küta samko aha, naiuso samüh ti kaoloukü noin nungko samüh haoson kiuha-e” ta ngionai.

¹⁵Jüthso, nungtin khaiuniahoi ko lakhuha. Ngüso ainou soikü lünoi.

¹⁶Tsümeikü chhisiya au ngüso khaolaoji. Ngüso asaita aloat au khemkü noin.

¹⁷Ni thalouau aiutsün waio nou jiokü noi taoko jin jintsün nung üou noin,

¹⁸nung khekkü khaiuniahoi nousoüh meshen thaiutha jin jintaiuji; nung jin tsak nouko ngüso eane.

¹⁹Nungti aplokü thetsün tsangkü aa nou mowanji; nungti chhi tsümeikü chhitsün tsangkü aa kihtsünso pungkü tü thawao-e.

²⁰Anglu! mongthat mongsai nou sunkeng nai naiuso chaikamthang nouso ainou wekü jonji.

²¹Noknio bekhan nouso dongai naiuso khaiu- nia kamshitsün nai sangh asong nou jonji.

²²“Maingahoi nouso! Asam tilektso mainga noiau mongchioji? Angelou nou tü lochilotsaotsün nai tilektso monglinge? Asamüh tilaitso tsüngela-e süne?

²³Ngü tilai asam thut-e anglu; Ngü asam hau ayamhan amei kiu-e naiuso asamko jü a-nge sonkiu ha-e.

²⁴Ngü asam shiau nyungkü jonlutkü noiküla, lüko asamüh tsü-anglu. Asamüh jü ngiotü mong tsükiu.

²⁵Asamüh jü ayamhan nouso chikü tsüwesan naiuso ngü hau asam lothakiu-iau tsümongchio.

²⁶Nungtiphe tilai asam angja nai nappe, ngü asam tü nyailute. Tilai asam tü alekkattsün thawao-e,

²⁷tilai nung ah-ou-ahsheih tsak khekkü asam khako shi-e, angja athsüoting ahsheih nou kankü shi-e, naiuso asam kiakü naiuso omhe ang- jakü noi-e, ngü asam lochilotsao-e.

²⁸Nungaih asamüh mongthat mongsai nou tü jone, lüko ngü tsüthala-e. Asamüh ngü tü alumai yam-e, lüko asamüh ngü tsü eppe.

²⁹Asamüh angeloau tilaitso tsükowe, naiuso APAOU ngio nou tü ang-au asaita nankü noiküla.

³⁰Asamüh jü ayamhan tilaitso mongchiokü tsünoi tsüdekünai ngü tilai asam lothakiukü noiküla nungko asamüh tsümongkiu.

³¹Nungtiphe asamüh ti maikü noin nung asamüh eppe, naiuso asam nung chhisiya nousoüh akia iula-i-e.

³²Ti tsüthawaokün khaiuniahoi eanji tiautenai ngüsoüh mongthat mongsai nou shanan. Tsüngelakün khaiunia nouso ngüso chija thsale tsünoitsün shioko mowanji.

³³Lüko sauhaiüh ngü tü ang-e, ngüso kipsankü noi-e. Ti thaiutha ahat au tsünoikü ngüso kipsankü noi-e.”