Read Khiamniungan Naga Ngiopung Ngiothi 10 Bible Online

Ngiopung Ngiothi 10 - Khiamniungan Naga bible

Ngiopung Ngiothi 10

¹Nungso Solomon ün ngiopung ngiothi nouso noin: Mongthat mongsai noitsün thso tsaküh apa po monglingiji; lüko mainga tsaküh apa nyiu hau mongkia kankü shikiuji.

²Ayam tsüthakü nai eptsün jengtsaiu nou nihau ti alesan tsükiu-e, lüko ngiotsüo nou aakih kipsane.

³APAOU nou khaiunia ameihoi naiukü tsütaiu-e, lüko apaüh akausai nousoüh aiutsün tsüthalou-i-e.

⁴Acholak nou ni tsosilu iula-i-e, lüko kongkü chhitsün nou ni memei iula-i-e.

⁵Athsümon khaiunia tsaküh chihsikhiam atao nouko kamshiji; lüko be-eiuyam taoko saikü noian- tsünto amiam tsak noin.

⁶Khaiunia amei tsaküh ouk nou eppe. Lüko akausai khaiunia tsak ngio nousokoto amongthe saisile nou tsangpokkü noiji.

⁷Khaiunia ameihoi nousoto ouk tsakli wesankü yangsanshi-e, lüko tsümeikünsoto shakta be-ane.

⁸Athsümon khaiuniahoi nousoüh ayamhan amei nou lou-e. Lüko khaiunia sauhaiüh ayang tsünoikü chiteji ngüsoto loian-e.

⁹Saitha tsakeitsün khaiunia angja ainou thakhuji, lüko saitha tsüdekün khaiuniato thalouwan-i-e.

¹⁰Ajantsoüh ngiotsüo nou lolao nai apaüh angja nou losanji, lüko khaiunia sauüh khakhakü lochi lotsaoji apaüh nokmei thaiutha chhiji.

¹¹Khaiunia amei tsak ün ngio nousoto aa khiamchettsün noin, lüko akausai khaiunia tsak ngio nouso ko amongthe saisile nou tsangpokkü noiji.

¹²Achinyan-etsün nou angem lousanji, lüko atsüojin nou aphio nouso chikü wankiuji.

¹³Angelatsün khaiunia nou ayang noikü chiteji, lüko angela tsünoikün khaiunia hauto angjakiu au pokü noin.

¹⁴A-nge khaiunia nou ngüsoüh shiotsün lektso ange nou kamtaiuji, lüko mainga nou tilai singio-e angja nou shimkü noin.

¹⁵Memei khaiunia nou memei jengtsaiu nou kiplouji, tsosilu nou angja hai lotheanji.

¹⁶Amei chhisiya mai nouto aa noin, lüko angei nouto loüh tekkü angei chhisiyaaulu nialükhunji.

¹⁷Alothatsün taoko sauüh anglou-e nung khaiunia nou aa kih-e, lüko sauüh phiowaniu ta tsüngio- some, nung khaiunia nou angja nai noin.

¹⁸Khaiunia sauüh apa achinyan tsangpokji, nung khaiunia atsüo- tsüdekün. Atenlam ngio lopengtsün khaiunia nou mainga noin.

¹⁹Ni ngio tititso piakü chiteji, nungti thatso ni angei piakü sunhe-e. Ni angela noi naito ni nyankü noi-ane.

²⁰Khaiunia mei tsak ün ngio nousoto asangling tangkason khekkü noin; lüko akausai khaiunia ün mongyangto athe au athang tsünoi.

²¹Khaiunia mei tsak ün ngio nouko apia nou alesan noin, lüko mainga nouto ni achija loatlo-e.

²²APAOU nou oukkiutsün tsangkü ni memei iula-iji. Kongkü chhitsün nou ni tekkü tsümemei-e.

²³Tsüthakü chhisiyatsün nai monglingatau nung mainga noin. Angelatsün khaiuniahoi nou mongthat mongsai nai amongtsamtsün epji.

²⁴Asiohoi nousoüh ngüsoüh aiu- tsün epji, lüko akausaihoi nousoüh ngüso tilon tekkü hatji nung waohe-e.

²⁵Ah-ou-ahsheih shinai, akausai nousoto shipkü khuwanji, lüko asio nousoto asaita kipsankü noiji.

²⁶Athaiutha cholak khaiunia tsak mephaiu tilaitso lalou, tiautenai apato ahuo thaiutha ehejek naiuso aniovei thaiutha inkhaoli noi-e.

²⁷APAOU tü angio lü-ang, nungaito ni aakih nou laiu-e. Lüko akausai nousoto ngüso a-etao mosaokü eanji.

²⁸Khaiunia ameihoi ayangtaiu nou amongling nai niaji, lüko akausaihoi nou khaai ti ta thapau tsüshio.

²⁹APAOU nou saitha khaiuniahoi kiplouji, lüko sauhaiüh tsüthakün chhisiyaji ngüso lomowanji.

³⁰Asio khaiuniahoi nouso asaita ousankü noi-e, lüko akausai khaiu- niahoi nousoto goumchi nai tsüpoisane.

³¹Asio khaiuniahoi nousoüh mongthat mongsai ngio nouso chiteji, lüko tsümeikü chitetsün leikhaio nouto laolouwane.

³²Asio khaiuniahoi nousoüh atsüojinyang ngio ngioau ngeji, lüko akausai nousoühto asaita atawai ngio nouso ngioji.