Read Khiamniungan Naga Ngiopung Ngiothi 11 Bible Online

Ngiopung Ngiothi 11 - Khiamniungan Naga bible

Ngiopung Ngiothi 11

¹Khaiunia sauüh atsüotsü- dekün tsoithat kankeiji APAOU nou apa chinyanji. Saitha tsoithattsün tü apa monglingji.

²Khaiunia sauhai bülomji nungso shakta amiam nai shi-e. Lüko atsamlou nouko mongthat mongsai nou noin.

³Ni mei naito, asio nou ayam nia-e. Khaiunia sauhai da among- lamau tsüshio, nung khaiunia nouso ngüso tsüsiokün tsangkü mowanji.

⁴Eantsün ajekhaiu nai amemei nou nihau ti amei tsüchhikiu-e, lüko asio nou aa nou kipsanji.

⁵Mongsaitha nou khaiunia tsak ün aakih siukü shanji, lüko akausai khaiunia meshen tsümeikün nou sali-ane.

⁶Asio nou mong saitha khaiunia nou kipsanji, lüko sau da amonglamau tsünoi apato meshen anengneng tsangkü mowane.

⁷Tilai akausai khaiunia tsak eanji, apa ayangtaiu apako aikü eanji. Naiuso memei jengtsaiutü ayangtaiu noitsün yaangau iulaji.

⁸Asiohoi angja ainou kipsanji, lüko akausaihoi dongaibao nung angja nou shiji.

⁹Goa tsühatkün khaiuniahoi ngio tsangkü ni lotheanau shiom, lüko asiohoi mongthat mongsai nou ni kipsanau shio-e.

¹⁰Tilai asiohoi tsüomeikü khuji noknio tsak monglingji, naiuso akau- sai khaiuniahoi tilai eanji nungko sangh asong nou wekü amongling- tsün noin.

¹¹Asiohoi oukkiutsün nou noknio tsak loksanji, lüko akausai nouso ngio tsangkü noknio tsak lotheanji.

¹²Amaohai thaiutha asuhat tsünoikü chitetsün khaiunia mainga. Ni iilatsün khaiunia naito ni nyankü noian-e.

¹³Khaiunia sauüh amaohai tsak thaiutha ngio kankeiji, apa da amonglam taiuau tsüshio, lüko amonglam noitsün khaiunia tsak da ni monglamtsün thumkü taiu au shiom.

¹⁴Ayam hantsün tsünoikü naito mele tsak loian-e. Lüko alotsüo saiukü noitsünko aalo noin.

¹⁵Mesanhai tsak ün chailaiu thamkiuau ni thalou naito, ni nung ngetkü yangshi-e. Nungtin ko tsüthsomeha naito ni mei-e.

¹⁶Amongwon suntsün nyiuhai tsakto asuhat epji, lüko saisile amei tsüsunkün menyiu tsakto amiam noin. Cholak khaiunia tsaküh tilaitso chai tsütaiu-e, lüko bumsiwom khaiunia tsak memei-e.

¹⁷Tilai ni atsüojinyang noiji, ni apim thaiutha amei chhilouji. Lüko ni atsüojinyang tsüsunkü naito, ni apim da lu tawailouji.

¹⁸Akausai khaiuniahoi nou atsüoting to ti alesan tsüepji, lüko ni ayamtha nou chhisiya naito, amai tsüphiokü epaulu noin.

¹⁹Ajantso ayam atha nou chhisiyaau kongkü noitsünsoüh aa nou eppe, lüko ajantso ayam tsüthakün kojakü chhisiya nai nung eane.

²⁰Mongai tsümeikü yangtsün khaiuniahoi APAOU nou chinyanji, lüko ayam atha nou chhisiyatsünso da apaüh tsüojinji.

²¹Tsümeikün khaiunia nouso tilaitso alohat tsükiukü tsülao-e, lüko asio khaiuniahoito thakhu-e ta ni meikü lüngetaiu.

²²Ayangloutsün amei tsüsunkün menyiu tsakto, yah sontham nai chaiou khiapthso the-itsün tsak khekkü.

²³Asio khaiunia nousoüh aiutsün- to amei lu noin; lüko tilai akausaihoi nousoüh ngüsoüh aiutsün eppe, khaiunia chikü nou mongmatji.

²⁴Khaiunia ajantsoüh ngüso chai tsümechekkü wanji, lüko loüh tekkü memei iulaji. Amaohai ajantsoüh meshenüh kiuau noitsün lolaokü taiuji, lüko tekkü tsosilu iulaji.

²⁵Mongchiokü lükiu, naiuso ni tsüomeikü noi-e. Amaohai lühachu naiuso ni lüko hachu shi-e.

²⁶Amai apia thaiutha taiukü sauüh khülam kamtaiuji, nung khaiuniatü amaohaiüh athesan kiuji, lüko sauüh jankiuji nung khaiunia ngüsoüh lomsanji.

²⁷Awatthat nouso mei naito, ni asuhat noi-e, lüko angja losanau yamnaito, ni lüko nunglu eppe.

²⁸Sauüh meshen memei jengtsaiu da amonglam taiu-e, apato paithsam thuk taoko thsamsa thukkantsünli noi-e, lüko asiohoi nousoto asaiu paithsam khekkü shinge.

²⁹Khaiunia sauüh apa tsam- khaiuko angja omhe kankü shiji, apaüh aphiteng nai titso tsütaiu-e. Maingahoi asaita a-nge a-monhai tsamki the-e.

³⁰Asiohoi eiu nung aa paidong, lüko atsüojin tsühakün chhisiya nou nung kankü khuwanji.

³¹Khaiunia ameihoi hau nung goumchi nai amai kiuji, lüko akausai naiuso angei khaiuniahoito tsülo- hatkü tsülao-e ta ni lüyang.