Read Khiamniungan Naga Ngiopung Ngiothi 12 Bible Online

Ngiopung Ngiothi 12 - Khiamniungan Naga bible

Ngiopung Ngiothi 12

¹Sauüh angeloutsün tsüojinji apaüh ayam tsüthakünko nou lotha-iau mongchioji, lüko alotha- tsün tü chinyantsün to mainga noin.

²Khaiunia amei nouko APAOU nou monglingji, lüko angei mongyang kantsün khaiuniahoi apaüh phio-iji.

³Akausai nou alokü noiau tsükiuji, lüko asio khaiuniahoito mongkü tsaji.

⁴Tsammongnyiu amei tsakto apa tsammongpo nianlom naiuso among- ling; lüko tsammongnyiu sauüh apa tsammongpo khako amiam kankü shiji, apato apa tsammongpo ou mongai jiothekia tsak khekkü noin.

⁵Asio khaiuniahoi nou nitü ngiotsüo nai kankei-e; lüko akausai khaiunia nouto ni sapthio-iau lu aiu-e.

⁶Akausai khaiuniahoi ngioto she- lopengau mongmat sungtsün noin, lüko asiohoi ngio nousoto athang- mang nouso kipsanji.

⁷Akausai khaiuniahoi nou ngüso nyaplüshi-antsün waoheji, naiuso thsaosithso tsüpoitaiuji, lüko asio khaiunia tsamkhaiu to tsülaokülu kihji.

⁸Ni ilatsün khaiunia tsak naito, ni lomsane; ni ila tsünoikün khaiunia tsak naito khaiuniahoi nou ni tsülusane.

⁹Asong khaiunia tsak saisileli hanküta naiuattsünkoto khaiunialon thekü meshen thaiutha eheshiu chhisanhe nou chen.

¹⁰Khaiunia amei tsaküh apa ün thainian nouso paotsangji, lüko tsümeikün khaiuniahoi nouto ngüso thainiansotü atsüojinyang tsünoikü chhiji.

¹¹Chhisiya kongkü chhitsün eiu-a khaiunia tsaküh eheau saiukü taim, lüko sauüh asapat chhisiya nai atao wanji apato angela nou tsüsaiu.

¹²Tsümeikün khaiunia nousoühto tsümeikü chhisanau lu mongchioji, lüko asiohoito mongkü tsakü noiji.

¹³Tsümeikün khaiunia tsak nung meshen ngio nouko monanji, lüko mongsaitha khaiunia nouto angja omhe ainou thakhuji.

¹⁴Ni alesan eptsün nung ni ti ngioji naiuso chhisiyaji nung chiai noin; ni ti epau maikü noin nung ni eppe.

¹⁵A-aiu khaiuniahoi nou asaita ngüsolu ayam thakü noin ta yangji; lüko mongthat mongsai noitsün khaiuniahoi nou ayamhan kiutsün tü angji.

¹⁶Mainga tsak tilai mongmatji apaüh shakta ngela-aniji; lüko angelatsün khaiuniahoi nou alochi lotsao nou wesankü tsünoi.

¹⁷Tilai ni ngiotsüo chite-e, mitha atsüoting nou chhi-aniu, lüko yaang chitetsün nou mitha atsüotsüde- künai niaji.

¹⁸Ayanglu tsünoikün ngio nousoüh sah nou hetsünli aokü heji, lüko ayang noikü chitetsün ngio nou nung mou lomeiji.

¹⁹Atsüotsüdekü chitetsün aakih to letletkü, lüko ngiotsüo nouto athon- tsüyangkü kihji.

²⁰Sauhaiüh tsümeikü thatji ngüso lekkat-e; lüko sauhaiüh amei thaiu- tha chhisiyaji ngüsoüh amongling eppe.

²¹Asiohoi da tsümeikü ti tsü- thawaoji, lüko tsümeikünso thaiutha to aangja lu noin.

²²APAOU nou yaang chitetsünso chinyanji, lüko sauhai ngiotsüo nai noiji ngüsotü monglingji.

²³Angela khaiuniahoito ngüsoüh ti ngeji nung thaiutha nyankü noianji; lüko a-aiu khaiuniahoi nou ngüsoüh tsüngekün hanji.

²⁴Chhisiya kongkü chhitsün nou nihau oukong kiu-e, lüko cholak nou ni sua tsak iula-i-e.

²⁵Ayangelat nou ni ainou amongling kankü khuwane, lüko atsüojinyang ngio nousoüh ni mongling-i-e.

²⁶Asio khaiunia nouto apa hai thaiutha yamnia noin, lüko tsümei- künso yamaito ngüso aphio nai nialükhune.

²⁷Ni cholak naito ni ti yamji nung tilaitso tsü-eppe; lüko ni kongkü chhisiya naito, ni aküo amei nou eppe.

²⁸Aa epau asio nou nung yam noin; akausai nung eantsün nai khutsün yam noin.