Read Khiamniungan Naga Ngiopung Ngiothi 14 Bible Online

Ngiopung Ngiothi 14 - Khiamniungan Naga bible

Ngiopung Ngiothi 14

¹Menyiuhoi mongthat mongsai tsangkü tsam nou shanji, lüko mongyang tsünoikün menyiu tsangkü nung lotheanji.

²Mongsaitha sau tsakeiji apa APAOU lon hattsün noin; lüko mong kausaikü tsakeitsün nou apa chinyanji.

³A-aiu khaiunia tsak bülomtsün nou apa ngiosingio pia-iji; lüko ange- latsün khaiunia tsak ngio nousoüh apa lolaoji.

⁴Eiu-a-au jangtsopong titso tsühakünai abei akeng noi-e; lüko jangtsopong nouso hakünai abei khülam nou meankü noi-e.

⁵Amonglam mitha tsaküh asaita ngiotsüo mitha kiuji; lüko amonglam tsünoikün tsaküh atsüotsüdekü chitetsün chiai titso tsünoi.

⁶Meshenlu yangtsün khaiunia tilaitso angela iulaau tsüshio, lüko ilatsün khaiuniahoi nou siukü ngelowanji.

⁷A-aiu khaiuniahoi ainou soikü lünoi; tiautenai ngüsoüh ni hau ti tsande au tsünoi.

⁸Tsüoloukü noitsün khaiunia tiauta angela noiji? Tiautenai apaüh ti chhisiya-e nung ngeji. Mongyang tsüpungkün khaiunia tiauta a-aiu noiji? Tiautenai apaüh apaühlu ngen ta yangji.

⁹A-aiu khaiuniahoi nou angei sunhe lüko ti ayangelat tsünoiji; lüko khaiunia ameihoi nousoühto awanlouau aiuji.

¹⁰Ni monglingattsün nung ni nou noin; ni mongkiaattsün nung lüko ni nou noin. Nungso niko nou sauüh janelu au tsüshio.

¹¹Khaiunia amei tsak ün tsamto khaiunia tsümeikün tsak ün tsam lotheankü phiai lüko loüh tsakülu noi-e.

¹²Ni ti yam atha ta yangji nungüh eantsün yamai nia au shiom.

¹³Anyai nou mongkia tsangpok au shiom. Tilai amongling nou mowanji nungko asaita amongkia noin.

¹⁴Khaiunia tsümeikünsoüh ngü- sotü waokü amai eppe. Khaiunia amei nousoüh ngüso chhisiya thaiutha paopei nouso eppe.

¹⁵Mainga tsaküh tilünou mong- lamji; lüko angela khaiunia nousoüh ngüso tsakeitsün tü jiokü thapji.

¹⁶Angelatsün khaiuniahoi nouso angja omhe thaiutha tsüoloukü noiji; lüko angela nou tsüsaiukün khaiu- niahoi nousoüh ayanglu tsünoikü liuliukü chhisanji.

¹⁷Mongseng khaiuniahoi nousoüh ayang tsünoikün mainga chhisiya chhiji; lüko angelatsün khaiuniahoi tsamloukü noiji.

¹⁸Tsüngelakün khaiuniahoi nou ngüso mainga mai epji; lüko athsü- monhoito ange nou paopei eppe.

¹⁹Khaiunia tsümeikü nousoüh asiohoi khako kauthio-e, naiuso ngüso atsüojinyang tü koja-e.

²⁰Omhe khaiunia tsakto phaosi- pohaiüh sauüh tsü-aiu; lüko memei khaiunia nouto haimei piakü taim.

²¹Ni monglingkü theau aiu naito, tsosilu haitü atsüojinyang lünoi; tsak lüko lochitsünto angei noin.

²²Ni amei thaiutha chhisiya naito, ni amaohai amonglam naiuso asuhat nou lesan-e. Ni tsümeikün thaiutha chhisiya naito, ni aphio tsak chhisiyaji.

²³Lüchhi naiuso ni aakih au lesane, ni ngiolu singiokü moknoian naito, ni tsosilu iula-e.

²⁴Angelatsün khaiunia nouso kandio ngüso ange amon noin; lüko mainga nouso ngüso mongyang tsünoikün tsangkü ngeji.

²⁵Ngiotsüo mitha nou aa nouso kipsanji; tilai apaüh atsüotsüdekü chiteji, apaüh khaiunia janheanji.

²⁶Khaiunia tsak naiuso apa tsammong thaiutha APAOU hau asuhat kiutsün tsangkü amonglam naiuso aalo kiuji.

²⁷Eantsün jin ainou thakhuau ni aiuji süne? APAOU hau asuhat kiutsün nung aakih haiuchetkhan tsak noin.

²⁸Nokpao tsak ün niansong nung apaüh khaiunia titso khaiuko nokshingji nung chiai noin; ngüso tsühakünai apa titso tsüde.

²⁹Ni sangloukü noi naito, ni angela khaiunia, lüko ni mongseng naito, ni titi ayang tsüpungkün tsak ta nilu hanji.

³⁰Mong aalo noitsün nou pem ameili noiji; lüko nioveikia nouto jiothekia tsak khekkü noin.

³¹Ni tsosilu khaiuniahoi thang- mang naito, ni ngüso shantsün Goa lochilotsaoji; lüko tsosiluhai tü atsüojinyang hantsün nungto amkham chhisiya tsak noin.

³²Akausai khaiunia nousoüh ngüso chhisiya tsangkü ngüso chija tenthiowanji; lüko khaiunia ameihoi ngüso mongsaitha tsangkü kiplouji.

³³Ilatsün khaiunia tsak ayang alumko mongthat mongsai noin; mainga haiüh mongthat mongsai thaiutha titso tsüngela.

³⁴Asio nou mele tsak lotsokji; lüko ti mele lünou angei nouto amiam noin.

³⁵Nokpaohoi mong lengtsün nung amonglam asonghoiko noin; lüko amiam chhisiyatsün khako apa amongmat noin.