Read Khiamniungan Naga Ngiopung Ngiothi 15 Bible Online

Ngiopung Ngiothi 15 - Khiamniungan Naga bible

Ngiopung Ngiothi 15

¹Shethupkü thalatsün nou amongmat saiu-iji; lüko ngio jekü thalatsün nou amongmat lochuji.

²Tilai angela khaiunia nou chiteji, ngüsoüh angeloutsün nung chinekkü shanji; lüko a-aiu khaiuniahoi nou- soüh ayang tsüsunkün ngio nouso singioji.

³APAOU nou alumai tilüsong thawaoji nung epji; samüh amei süne tsümeikü chhisiyaji ta apaüh samtü jiokü thapji.

⁴Atsüojinyang ngio nousoüh aa nou kankü shiji; lüko atsao ngio nouso da onthso lothean au sunkü noin.

⁵Meshen poüh ti tsande nung tsüwesantsünto mainga; lüko apaüh lothakiutsün loutsünto angela noin.

⁶Asio khaiuniahoi nousoüh jengtsaiu piakü taiuji, lüko akausai khaiuniahoi nousoüh alesan shitsün koto angja noin.

⁷Angelatsün khaiuniahoi tsangkü angelou nou shiupengji; lüko mainga nousoüh nungti tsüchhiji.

⁸Tilai khaiuniamei hoi nou misaoji APAOU mong lengji; lüko akausai khaiunia nousoüh aloat chaithio apa dongai kankü shitsün chinyanji.

⁹APAOU nou khaiunia tsümeikünso yam chinyanji; lüko sauhaiüh ti ayam tha nou chhisiyaji nungso tsüojinji.

¹⁰Ni ti ayam tsütha nung chhisiya naito, ni alohat thsüokü eppe; ni apim tsülotha lokü naito ni eane.

¹¹Eantsün goumchi nou lüko nungko noitsün ngeau APAOU khako tsangkü wanau tsüshio; nungaito khaiunia tsaküh titi thekü apa mongyang Goa ainou tsangpokkau shio-e?

¹²Meshen thaiuthalu yangtsün khaiuniahoi nou alotha-iau tsümong- chioji; naiuso ngüso khengai angelatsünso ainou ngüsoüh tilaitso ayamhan thaiutha tsüsangji.

¹³Tilai khaiuniahoi monglingji, ngüso nyaiji; lüko tilai ngüso mong- matji ngüso lüko yangelatkü epji.

¹⁴Ilatsün khaiuniahoi nou angelo au mongchioji; lüko mainga nouso to ngüso angetsün nou mongtsamaniu.

¹⁵Tsosilu hai thaiutha aakih nou lolokü jenkü kowe aulu, lüko amongling khaiunia nouso asaita aakih nou monglingatji.

¹⁶Memei theküta angja nouko naito, tsosilu theküta APAOU lon hatkü noi naibao chentso.

¹⁷Nyih ameiting heküta chinyanekü noi nouko to, ni tsüojin- tsün khaiuniahoi ko kiansang hebao chentso.

¹⁸Mongseng mong nou akhenge lousanji; lüko akiplou nou nokmei kankü shiji.

¹⁹Ni cholak khaiunia naito, ni alumai acheklu waohe-e; lüko ni mong saitha khaiunia naito ni angja tsünoi-e.

²⁰Angelatsün melothso tsaküh apa po monglingiji; lüko angela tsünoikün methso tsaküh apa nyiu lochi lotsaoji.

²¹Angela tsünoikün khaiuniahoi ngüso a-aiu nouko monglingji; lüko angela nou to ti ayam thakü noin nung chhisiya-e.

²²Ayamhan chikü ni shiotsün lektso lülou; naiuso ni shio-e, nung tsühakü naito ashio tsü-eppe.

²³Atao tsak thaiutha ngio waokü eploutsün to titi amongling au noin!

²⁴Angela khaiunia tsakeitsün yam nung eantsün dongai nialüthiowan- tsün tsüde; lüko aa dongai niasantsün yam noin.

²⁵APAOU nou abülomhoi tsamkhaiu lomowane; lüko apaüh jihinyiu ün jengtsaiu kipsankiuji.

²⁶APAOU nou tsümeikünso ayang chinyanji, lüko apa haimei ngio nousoko monglingji.

²⁷Ni ngiotsüo yam tsüdekünai alesan epau kowe naito, atsamkhaiu angja nai nappe. Nekhem paopei lalou, nungaito ni aakih laiukü kih-e.

²⁸Khaiunia ameihoi nousoüh ngüsoüh mothalakün khako yangluji. Khaiunia tsümeikünsoüh liukü thashiji, lüko nungüh angja losanji.

²⁹Tilai asio khaiuniahoi nousoüh misaoji, APAOU nou thalaji, lüko apaüh angeihoi nouso misao tsüwe- sanji.

³⁰Khawon iwon nou ni monglingiji, naiuso ngem amei nou nung tü tekkü mongwon-iji.

³¹Ni lothakiutsün taoko mongkiu- kü angnaito, ni mongthat mongsai noitsün khaiunia.

³²Ni angelouau tsümongchio naito, ni achija tawailouji. Ni alotha kiutsün lou naito, ni tekkü mongthat mongsai noitsün iula-e.

³³APAOU lon asuhattsün to nung pem ta angeloutsün noin. Nianlom eptsün khako ni tsamloukü theau noin.