Read Khiamniungan Naga Ngiopung Ngiothi 16 Bible Online

Ngiopung Ngiothi 16 - Khiamniungan Naga bible

Ngiopung Ngiothi 16

¹Samüh sam mongthat nouso shanji, lüko ngiothunthe nou to Goa noin.

²Ni chhisiyatsün alum ayam thakü noin ta ni yangau shiom, lüko APAOU nou akhei mongyang thaisanji.

³Ni yangkü thattaiutsünso ouk akiu ta APAOU tü lüsao, naito nungso chhilükhuntsün ko ni ashio nou eppe.

⁴APAOU nou alum athunthe yangkü shan; naiuso akausaihai athunthe to alothe nou noin.

⁵APAOU nou abülom nouso sauhai lünou chinyanji; apaüh tilaitso ngüso angja ainou tsüthakhu-i-e.

⁶Mongsaitha naiuso amongkiutsün lüthe, naiuso Goa nou ni angei wankiu-e. APAOU tü angio angkü lüthe, naito tsümeikün tiühtso ni ta tsüthawao-e.

⁷Tilai ni APAOU monglingi-e, ni a-ehso haimei au shanau shio-e.

⁸Ngiotsüo tsangkü intso taiutsün to ngiotsüo tsüdekü nai alesan piakü eptsün ta meitso.

⁹Ni amongthat chhisiya shanau shiom, lüko Goa nou achhiyam niaji.

¹⁰Nokpao nou asio oukong nouko chiteji, apaüh ngiothun ngio kiutsün asaita ayam thakü noiji.

¹¹APAOU nou tsoi si tsoithat nouso ngiotsüo nai the-iau mongchioji naiuso alum jantsün ko wekü the-iau aiuji.

¹²Nokpaohoi nou tsümeikün jei- taiu au tsüshioji, tiautenai nokshing kongkü shantsün to ngiotsüo nou noin.

¹³Nokpao tsaküh ngiotsüo nou lula au aiuji, naiuso sauhaiüh nung ngioji ngüso tü atsüojinyang noi-e.

¹⁴A-nge khaiunia tsaküh nokpao nou monglingkü taiu au kowe-e, tiautenai nokpao mongmat sung naito, khaiunia ajantso to eane.

¹⁵Nokpao ün atsüojinyang to lesam taoko thengmia nousoüh ah-uo kankü shitsün khekkü noin- naiuso nungko aakih nou noin.

¹⁶Chaiou lakkeng naiuso tangka- son taiutsünko to mongthat mongsai naiuso a-nge taiutsün meitso-nunglu tekkü meitso.

¹⁷Sauhai amei noin nungso to angei tsünoikün yam tsak tü tsakeiji, nungtiphe ni tilai khuji jiokü lünoi-nungüh ni aa nou kipsane.

¹⁸Abülom nou alothetsün yamai niaji, naiuso abülom mekoi nou asaowantsün yamai niaji.

¹⁹Abülom mekoi haiko aploukü thetsün jengtsaiu janetsün ko to, tsamlouküta angja omhekü noianbao meitso.

²⁰Ni hau ti tsandekü noin nung da mong lükiu; naiuso ni tsüomeikü noi-e; APAOU nou da lümonglam naiuso ni monglingkü noi-e.

²¹Angelatsün tsak naiuso nyankü noitsün khaiunia tsak nung apaüh ngelatsün tsangkü ngeji. Ngio titi thatso nyaothinge, nungti thatso apaüh shioloukü shiji.

²²Angela khaiunia tsak hau mong- that mongsai nung aakih haiuchet- khan tsak, lüko maingahoi hau angela-iau kowetsün to atao wanantsün tsak noin.

²³Ilatsün khaiuniahoi nou ngüsoüh mongiokün khako yangluji; nungti memong shioloutsün tsak noiji.

²⁴Atsüojinyangkiu ngio nouso nung liukhiam khekkü noin- ataplu nai nung nyaothingkü naiuso nung apim thaiutha amei noin.

²⁵Khaiunia khako atsüoting khektsün yam tsak noin, lüko nung athon nou to eantsün yam.

²⁶Chhi chhitsün khaiunia tsak nou heau aiutsün nou apa chhisiya kongkü chhiau kiuji, tiautenai apaüh apa naiutsün mongtsamiau aiuji.

²⁷Khaiunia tsümeikünsoüh amao- hai tawaiau thaiutha ayam yamji, ngüso ngio nouso lüko tsümeikü nou nyaikü noiji.

²⁸Tsak si tsak jetko ngio pengtsün nung akausai khaiuniahoi tsangkü lopengji, ngüsoüh angja lousanji naiuso haimei jetko lopek kiuji.

²⁹Mongpek khaiunia nousoüh ngüso haiso kausaiatji naiuso ngüso alekkat nai niathioji.

³⁰Sauhaiüh thatü songkü nyaiji, naiuso niovei nou chikji nung tü tsüokü lüthap; ngüsoüh tso tsümeikü tsak yangtaim.

³¹Aakihlaiu nung asiohoi hau paopei; naiuso khaiuthaiu nung ajinka kandio noin.

³²Amongmat sungtsün yamlukü thetsünto oukongting noutü meitso. Noknio nouso athum khako thashio- loutsün koto apim khako thashiolou- tsün meitso.

³³Khaiuniahoi nou Goa ün mongchio nge au phongdeji, lüko nung thatkiukü thashitsün Goa pem nou noin.