Read Khiamniungan Naga Ngiopung Ngiothi 17 Bible Online

Ngiopung Ngiothi 17 - Khiamniungan Naga bible

Ngiopung Ngiothi 17

¹Tsam tsak ko angemsingem nou meankü sümai noitsünko to, themtsai wontsak mong aaloukü hekü noianbao chentso.

²APAOU tsak ün atheau tsünoikün thso tsak khako mongthat noitsün ayathsüo tsaküh oukong eppe naiuso tengkam haoson tsak epha-e.

³Chaiou naiuso tangkason nou in tsangkü theluji, nungti khaiunia tsak mongpem nung APAOU tsangkü theluji.

⁴Tsümeikün khaiuniahoi nou tsü- meikün mongyang ta angji, nungti atsüo tsüdekünsoüh atsüotsüdekün tü angji.

⁵Ni tsosilu khaiuniahoi tü nyailut naito, Goa sauüh ngüso sheitho, ni apa lochi lotsaoji. Ni ajantso aküothe eptsün khako mongling naito ni angja tsüepkü tsülao-e.

⁶Sonthepao nouso ngüso thsaoso thaiuthako bülomji, nungti melothso nouso ngüso po thaiutha bülomji.

⁷Asuhat kiutsün khaiuniahoi nou- soüh atsüotsüdekü tsüchiteji, naiuso maingahoi nousoüh atheau meikü titso tsüchiteji.

⁸Khaiunia ajantsoüh nekhem paopei chhisiya nung chaiou lung khekkü noin ta yangji; ngüsoüh nung tsangkü alum chhiau shioji ta monglamji.

⁹Khaiuniahoi nou ni aiukü iula-iau ni mongchio naito, ngüsoüh ni tü aphio chhi nai ngüso hau awan lükiu. Aphio nou haimei lopekji ta lüyangsan.

¹⁰Mainga tsaküh tsomtsak jam shiuhküta ngeloutsünko to ilatsün khaiunia tsaküh jam shiuhtsünko apia ngelouji.

¹¹Sauhaiüh asaita angja nou lochuji nung tsümeikün khaiunia nouso dongai mongthe ngiokantsün tsak khekkü eantsün shi-e.

¹²Mainga ajantso ngüso mainga chhisiya tsükengtingkü noikü phetetsün ko to shapnyiu tsak amao ün thso kauloukü khutao pheteau meitso.

¹³Ni amei liko tsümei kiushi naito, atsamkhaiu ainou tsümeikün tilaitso tsüpunge-e.

¹⁴Amongmat yachutsün to khiam temkhao tsak chongting sattsün khekkü noin, nung loüh mosong- lükhunankün khako lülophangan.

¹⁵Asiohoi phio-ikü angeihoi penkiutsün- nemtso APAOU khako achinyan noin.

¹⁶Tiautenai apa angelatsün tsünoiküta angelouau chai wantsün to amei tsüde, nung mainga chhi.

¹⁷Paiusihaiüh asaita ngüso atsüo- jin hanji. Naito angja tsüjaneloutsün deisinioso nung ti alesan?

¹⁸Khaiunia ajantso chailaiu thaiutha thsale lokiuau thaloutsün nungto mongsai tsünapkün khaiunia tsakühlu chhiji.

¹⁹Angei tsüojintsün to angja lousantsün tsüojinji. Ni atao chikü nai bülom naito, ni angja nou tü saoji.

²⁰Sauüh tsümeikün yangji naiuso singioji, apaüh to tso tsak amei eppe ta tsüyangau noin- alekkat nou lu eppe.

²¹Thso tsak sauüh mainga chhi chhiji apa po thaiutha amongkia naiuso amonghen chiai amao titso tsünoi.

²²Amongling mongpem nungto moushe amei. Lüko alothe onthso to wonanji.

²³Ngiotsüo tsüdekün mikhem khaiunia nou nekhem paopei louji, küta ngiotsüo nou tsüchhiji.

²⁴Ilatsün khaiunia tsaküh mongthat amei chhisiya nai thatji, lüko mainga tsaküh ayam piakü nai chhi loujinganji.

²⁵Mainga melothso tsaküh apa po hau amongkia kankü shikiuji, naiuso apa nyiu hau ayangelat akhosak kankü shikiuji.

²⁶Aphio tsünoikün khaiunia tsak hau chai jahetsün kiu-iau ayam tsüde, tilai khaiunia amei nouso angja kiuji, ngiotsüo chhi nou phokleji.

²⁷Angela khaiunia tsaküh meshen ngio loyangji, khaiunia sauhai tsamkü noiji, ngüsoüh atsüoting angela nou taim.

²⁸Mainga tsak lüko apa son kiapjeikü nyankü noi naito, apa lüko angelatsün tsüdekünai ilatsün tsak ta wesanji.