Read Khiamniungan Naga Ngiopung Ngiothi 19 Bible Online

Ngiopung Ngiothi 19 - Khiamniungan Naga bible

Ngiopung Ngiothi 19

¹Sonsilei tsütsamloukü mainga atsüotsüdekün chitekeitsün koto, tsosilu lüko mongsaitha nou meitso.

²A-nge tsühakü amongchio asong nou tsümei; tsüjeiloutsün nou ni angja nai niathio-e.

³Khaiunia ajantso ngüso meshen chhisiya ayanghe tsünoikü chhi- siyatsün tsangkü chija lothelouji küta APAOU tü kolutji.

⁴Memei khaiuniahoi nou asaita haimeihoi ayan epji, lüko tsosilu haiüh ngüso haimei thsaothsaokü nou lüko asaita taiuau tsüshioji.

⁵Mikhem khako ni yaang ngio chite naito, ni angja eppe nungko akhulouau tsünoi-e.

⁶Khaiunia pungkü nou ateng khaiuniahoi atsüojinyang epau koweji; khaiunia pungkü nou atsüojinyang hankiutsünso nung momo paiusihaisolu ta yangji.

⁷Tsosilu khaiunia tsak nou to meshen deisiniosoüh lüko chinyanji, angawanau tsüde, apa paiusihaiso lüko tsünoi. Apaüh titi kongkü kowe lünou, apaüh tsaktso tsüshiolouji.

⁸Ni atsüojinyang lünoi naiuso ni shiotsün chikü lüngelou; küta ni ti ngelou nung lüyangsan naiuso ni tsüomeikü khu-e.

⁹Mikhem khako atsüotsüdekü chitetsün tsaktso angja ainou tha- khuau tsüshio; apa to mowanaulu.

¹⁰Maingahoi nou alum tsükhemkü poishikü nai tsükih au noin, naiuso suahoi nousoüh asonghoi khako nokshing tsüshinge.

¹¹Ni athsümon khaiunia tsak nai- to, ni amongmat sungtsün thatsame. Tilai khaiunia ajantsoüh ni tü aphio chhi-e, nung tü awesan tsünoikü wankiuwanau nung ni nou ajinka noi-e.

¹²Nokpao ün amongmat sungtsün nung chongkhao ngaotsün tsak khek- kü noin, lüko apa atsüojin nungto thsanyan chiai khiamle saotsün khekkü.

¹³Mongyang tsünapkün melothso tsak nung apa po tenthiowanau, naiuso namnamlutkü noitsün tsammongnyiu tsak nung jidaochan khekkü.

¹⁴Khaiunia tsaküh apa posinyiu ainou tsam si chai teng kamau shiom, lüko apa hau athsümon tsammong- nyiu tsak nou to APAOU tsangkülu kiuau shiom.

¹⁵Ni mongchio naito, lücholak, asailu lüsai-an, lüko ni naiuatkülu noi-e.

¹⁶Goa ün ngiokhem nouso lükankei naiuso ni aakih laiu-e, ni nungso tsüwesan naito ni eane.

¹⁷Tilai ni tsosiluhai hau kiu-e, nung APAOU hau chailaiu kiutsün khekkü noin, naiuso APAOU nung ni hau laokü kiushi-e.

¹⁸Athsoso ngüso angela taoko lüloutha. Ni nung tsülouthakü naito, ni ngüso lotheanau hachuji.

¹⁹Khaiunia ajantso mongsong noi naito, nung mai nou apa hau lüthe-i. Ni apa angja ainou ataojam kipsan naito, ni loüh müjam nung chhishiau noin.

²⁰Ni ayamhan nou tü anglukü naiuso angelouau mongchiokü noinai, nyitso to ni angelatsün iula-e.

²¹Khaiuniahoi nou alum chhisiya au ayangtaiu noiau shiom, lüko APAOU ün ngiothang noukolu shinapau noin.

²²Thaikhan tsak theau nung amiam tsak; atsüotsüdekünso ko naito tsosiluhai meitso.

²³APAOU tü angio lü-ang naiuso ni aakihlaiukü kih-e, naiuso atawaitsün ainou mongtsamkü aaloukü kih-e.

²⁴Khaiunia ajantso to meshen son ai eheshiu khianthioau tso thatü cholakji.

²⁵Thatü bülomtsün khaiunia to lohat au noin, nungaito ti tsüngekün khaiuniahoi nou nung tsangkü ange- lou tsak noi-e. Ni angelatsün naito, tilai ni lothakiu-e nungai ni ngela-e.

²⁶Amiam lousantsün, naiuso amiamsimo kanküshitsün thso tsakühlu meshen po tü tsümeikü kankeiji naiuso meshen tsam ainou komanji.

²⁷Jüthso, tilai ni angeloutsün laowanji, ni ti ngetaiukü noin, nung lüko ni shakta tsüwesanshi-e.

²⁸Mitha tsaküh tiko amaohai ta- waiau noin nungko ngiotsüo tsünoi. Akausai khaiuniahoi nou tsümeikün tü tapluao tsüojinji.

²⁹Meshen thaiuthalu thatü tsokkü yangtsün mainga tsak to titi lünou ashiuhtsün tsüepkü tsülao-e.