Read Khiamniungan Naga Ngiopung Ngiothi 20 Bible Online

Ngiopung Ngiothi 20 - Khiamniungan Naga bible

Ngiopung Ngiothi 20

¹Theng thatü thsüokü shiutsün nou ni mainga naiuso angem songkü sungitsün tsak hau iula-iji. Tha aiukü tukkattsün to mainga noin.

²Mongmat sungtsün nokpao tsak lon hattsün to chongkhao tsak ngao- tsün khekkü noin. Apa mongmat- itsün to meshen chija singatloutsün khekkü noin.

³Saulünou mainga nou to ali-e yachu-e, lüko nung ainou thakhukü noitsün chhisiya tsak nou to alomsanau maikü noin.

⁴Eiu-a khaiunia tsak meshen eiu ai chhiau atao tongtü nouko nai sau thatü cholak noin apa to be-eiuyam yamau titso tsünoi-e.

⁵Khaiunia tsak ün ngiothang mongyang nung to khiam temkhao aoting nai khiamloitsünli noin, lüko angela noitsün ajantsoühlu nung khaiusanau shioji.

⁶Khaiunia pungkü nou meshen titi saitha naiuso amongkiutsün noin ta chiteji, lüko atsüoting nou nung- bao sau noin nung epsanau lükowe!

⁷Po tsak sauüh ngiotsüo naiuso ayamtha nou chhiji nung thsoso to aküo amei!

⁸Mikhem kiutsün noikham nai nokpao moknoiji naiuso tilai apaüh thapji nungaih apaüh angei nou ngeji.

⁹Ngü jümongpem yanthsüokü shaniu naiuso ngü angei ainou thasiokü noin ta ajantsoüh ngiosome süne?

¹⁰Ngiotsüo tsüdekün tsoithat sauhaiüh kankeiji APAOU nou nung khaiuniahoi chinyanji.

¹¹Methso tsaküh lüko apa ti in noin nung apa chhisiyatsün tsangkü hanji; apa saitha naiuso amei naito ni nung chiteau shio-e.

¹²APAOU nou sam hau a-epau niovei naiuso anglu au noukhan nouso kiukü taim.

¹³Ni asaitsün nai atao wan naito, ni tsosilu iula-e. Tsükengtingkü lünoi naiuso ni eheau saiukü eppe.

¹⁴Atuhloutsün nou asaita jengtsaiu mai nou thatü tsok ta namnamji, lüko apa pungekü khu phiai apaüh nannekü thanyaploutsün thaiutha bülomji.

¹⁵Ni ti thaiutha singioji nung ni nge naito, chaiou lakkeng tsüdekünai chaiou lung chiai ni tso tsak taim.

¹⁶Mesanhai chailaiu thaiutha thsale lokiukü thaloukiutsün to mongyang shilepkü aiutsün khaiunia, nungaito apaüh meshen jengtsaiu lüko tapthamkü wanau noin.

¹⁷Ayam saitha tsüdekün tsangkü ni ti epji, nungko ni heshiu ameitingli monglingau shiom, lüko nungh phiküto singtso phalam tsak khekkü noi-e.

¹⁸Ayamhan amei nou lülo naiuso ni ashio eppe, athattaiu tsünoikü ehlithang nai ehkom lakhu.

¹⁹Ngiolopeng khaiunia tsaküh tilaitso atsangtaiu ngio tsütaiuji. Ngiosingio piatsün khaiuniahoi ainou soikü lünoi.

²⁰Ni aposinyiu athesan kiu naito, ni aa nou anyakhemkü noitsün taoko tson tsak nyattantsün khekkü thonane.

²¹Ni jengtsaiu apia titi siukü epji, nungüh nihau amei nou to chaokü chhikiu-e.

²²Tsüthakün liko tsüthakünlu kiushi-e ta lalou. APAOU nou da amonglam lütaiu naiuso nung apaüh lothakiu-e.

²³APAOU nou ngiotsüo tsüdekü tsoithat kankeitsünso chinyanji.

²⁴Sam tsakeitsün yam nung APAOU nou thatsankü wan; nungaito saulünou apa chija aakih yam nung titi ngela-e?

²⁵Goa hau chaithio kiuau motha- loukün khako paotsangkü lüyanglu. Tsüdekünaito nungthan nai ni yangelat shi-e.

²⁶Angelatsün nokpao tsaküh ayam tsüthakü sauüh chhisiyaji nung epsane; naiuso apa to atsüojinyang tsülepkü angja kiu-e.

²⁷APAOU nou sam hau mong naiu- so mongyang nou kium; samüh sam ainou tsangpokkü taiuau tsüshio.

²⁸Nokpao tsak apa nokshing saitha, asio, naiuso ngiotsüo noitsün lektso to oukong nai tsakü noi-e.

²⁹Pühehoi oukong nung ngüso ajinka naiuso ason hai khaiuthaiu nung ngüso asuhat noin.

³⁰Atao piaküjam sam yam li-eshiau taoko mongai kiakü louji.