Read Khiamniungan Naga Ngiopung Ngiothi 21 Bible Online

Ngiopung Ngiothi 21 - Khiamniungan Naga bible

Ngiopung Ngiothi 21

¹APAOU nou haiuthso yam niatsün ko naito nokpao tsak mong thashioloutsün siutso.

²Ni chhisiyatsün alum akhako to ayam thakü noin, lüko nung lüyangshi, APAOU nou amongyang akhei nou thaisanji.

³Apa dongai aloat chaithio kankü shitsün liko to APAOU monglingtsün ayamtha nou naiuso ngiotsüo nou lüchhi.

⁴Tsümeikün khaiuniahoi nou ngüso abülom naiuso amewop tsangkü meankü noin, naiuso nung angei noin.

⁵Paotsangkü lüthattaiu naiuso asamüh saiukü taiu-e, asamüh thatü liukü chhisiya naito, asamüh tilaitso saiukü tsütaiu-e.

⁶Ngiotsüo tsüdekün tsangkü ni memei epnai nung shakta mowane, sauhaiüh nung yamji ngüsoüh eantsün yamji.

⁷Akausaihoi nou ngüso mongmat sungtsün tsangkü mowane; tiautenai ngüsoüh ayamtha nou chhisiya au tsümongchio.

⁸Aphio khaiunia nouso yam tsülu- kün tü tsakeiji, lüko aphio tsünoikün khaiunia nousoüh ayamtha nou chhiji.

⁹Anengnengtsün tsammongnyiu tsak ko kihtsün koto, tsamkhaiu ai kih anbao chen.

¹⁰Akausai khaiuniahoi asaita tsümeikün phiai mongchioji, ngüso sau tü atsüojinyang tsünoi.

¹¹Meshen thaiuthalu thsüokü yangtsün khaiunia ajantsoüh alohat epnai, yangtaiukü tsünoikün khaiu- nia tsaküh lüko angelou tsak eplouji. Angelatsün khaiunia tsak nou apa hau ti tsande nungko nou angela epji.

¹²Goa, sau asio noin, apaüh angeihoi tsamkhaiu nai ti thawaoji nung ngeji, naiuso apaüh tsümei- künso alothe nai kankü shi-e.

¹³Tsosiluhaiüh wetsün sangh tü ni anglu au tsümongchiokü naito, ni apimüh ahachu thaiutha wenai tsülula-e.

¹⁴Khaiunia ajantso niko mongmat naito, aso ai paopei tsak kiutsün nou apa mongmat tsamlou-e.

¹⁵Tilai ngiotsüo nou chhi-e, khaiunia ameihoi monglingji, lüko tsümeikün khaiuniahoi to amonget nai shiji.

¹⁶Ayangloutsün amei ainou sauhai pungekü khuwankü noin, ngüso thaiutha eantsün nou taiukü noin.

¹⁷Asapat amongling nai, theng nai, naiuso memei chihsikhiam nai mongkiutsün nou ni tilaitso tsüomeikü tsü-iula-e.

¹⁸Tsümeikünhoi nou angja ngüso chiai chija kanlutlouji, ngüsoüh khaiunia ameihoi tü lüko thawao-iau koweji.

¹⁹Anengnengtsün naiuso akheng- shitsün tsammongnyiu tsakko kamkihtsün konaito singtso goh nai kih anbao chen.

²⁰Mongthat mongsai noitsün khaiunia kihtsün nai atsüomei naiuso khaiutsom noin; lüko mainga nousoüh ngüso chai epsiep thunkü lopenganji.

²¹Atsüojinyang lünoi naiuso saitha lüthe, naiuso ni aakih laiukü kih-e; amaohaiüh ni hau asuhat kiu-e naiuso ngiotsüo kankei-e.

²²Mongyang amei noitsün süpai ahei tsaküh akongting khaiuniahoi nou lemjeikü taiutsün noknio tsak thalouau shioji, naiuso ngüso monglamkü noitsün dio ai nouso lotheanji.

²³Ni angja ainou thakhukü noiau aiu naito, ni ti singioji nung tü tsüokü paotsangkü lüthe.

²⁴Ngü hau meshen thaiuthalu thsüokü yangtsün khaiunia tsak ahan naiuso ngü ni hau amongpek, abülom, naiuso me thaiutha tsüyangtsün ajantso ni hau hane.

²⁵Chhisiya au tsümongchiotsün cholak khaiunia tsaküh apa chija apa loatlouji.

²⁶Apaüh chhisiyatsün apem nung apaüh ti mongchioji nungh thaiu- thalu noi-e. Asio khaiunia tsaküh monglingkü naiuso mongsakü kiuau shioji.

²⁷Akausai khaiuniahoi nou tilai aloat chaithio thioji, loüh mothikü ngüso mongyang tsüsiokün tü tekkü APAOU nou chinyanji.

²⁸Atsüotsüdekü chitetsün khaiu- nia tsak ün aa mitha tü tsümong- lamji, lüko ajantsoüh tso tsak ta thathunkü yanglutsün to louji.

²⁹Asio khaiuniahoi to ngüso meshen thaiutha penkü noiji, lüko tsüsiokünhoiüh to ngüsoüh shiotsün ameiting lilu hanau koweji.

³⁰APAOU nou ni tü khengshikü noi naito khaiunia ange amon, khüyi meiting naiuso angelatsün nungso ti ahachu tsünoi.

³¹Ni mokthso nouso ehli au thaiutha khemtaiu au shiom, lüko ashioloutsün kiutsün to APAOU nou noin.