Read Khiamniungan Naga Ngiopung Ngiothi 22 Bible Online

Ngiopung Ngiothi 22 - Khiamniungan Naga bible

Ngiopung Ngiothi 22

¹Ni nian mei naiuso atsüomei asong jetko tsak cholou naito, nianmei tsak nou lücholou.

²Memei naiuso tsosilu ne nemtso nungko wekü noin: Nung ngüne nemtso shantsün APAOU nou noin.

³Ilatsün khaiunia nousoüh angja shitsün epji naiuso thakhuji lüko ayanglu tsünoikün khaiunia nou nungko saitha napji küta phikü mongetshiji.

⁴APAOU ngio lü-ang, tsamloukü lüthe, naiuso ni memei, asuhat, naiuso aakihlaiu nou eppe.

⁵Ni aa nou tü tsüojin naito, tsümeikünso yam thathunkü mo- wantsün jin ainou soikü lünoi.

⁶Methso tsak tü apa khuau yam lütsande, naiuso apa shekü iulanai nungko nou tsüpunge-e.

⁷Tsosilu khaiunia nouso memei khaiunia ün sua nouso noin. Chailaiutsün nung chai laiukiutsün sua noin.

⁸Ni ngiotsüo tsüngiokün lelo shiuthio naito, aküothe nou samsane, naiuso ni me thangmangtsün nung thonane.

⁹Mongchiosankü lüthe, naiuso ni nou chihsikhiam tsosiluhai hau lüsonkiu. Nung thaiutha ni ouk noi-e.

¹⁰Meshen thaiuthalu thsüokü yangtsün khaiunia lüle-an, nungaito nungko ngio khengetsün, ali-etsün, tsüdekünai nianjünkü jonetsün tsünoi-e.

¹¹Ni mongpem asangling naiuso atsüojin ngio chitetsün mongpem tsüojin naito, nokpao nou apaiu au iula-e.

¹²A-nge mongyang taiutsün khako APAOU nou jimji; lüko akausai ngio nouso apaüh tsüloukü wananji.

¹³Cholak khaiunia nou tsamai noianji; apa kengchiai khunaito apa loatau chongkhao nou noin ta apaüh ngioji.

¹⁴Tsütsamtsütsüo nungto jin tsak noin- nungüh APAOU mongmattsün khaiuniahoi thalouji.

¹⁵Mainga chhisiyatsün, apaotsang tsüsunkün saisile methsohai tü chija sunkü noin, lüko alothashitsün nou ngüso hau saisile amei tsande-e.

¹⁶Ni memei khaiuniahoi hau paopei shan nai tsüdekünai memei iula au tsosiluhai thangmang naito, ni achija tsosilu iula-e.

¹⁷Anglu, mongthat mongsai noitsün khaiuniahoi nousoüh ti ngiom, nung ngü ni hau tsande-e. Ngüsoüh tsandetsün tü lüyam

¹⁸ni nungso yangshi naito naiuso ngeshiau shionaito ni monglingkü noi-e.

¹⁹Ngü ni nou amonglam APAOU da taiu-iau mongchioji, nungshioko lo ngü nungso nihau chite-e;

²⁰Ngü athaiutha mongthat mongsai ngio nouso aosam sattaim.

²¹Nungsoko angelou naiuso ayamhan amei napkü noin, nungüh nihau ngiotsüo ameiting nou tsande-e. Nungaih tilai ni nung epsanau ngio-e, ni ngioyam atha nou laokü kankü shi-e.

²²Ni shioji taluto tsosiluhai ainou la-aplou; naiuso mikhem khako angja hai tü angja lakiu.

²³Ngüso mi ko ngüso thaiutha APAOU nou tsakiu-e naiuso ngüso aakih thaiutha thangmangtsün saulünou ngüso aakih lüko thangmangshi-e.

²⁴Mongseng, mongpek suntsün khaiuniahoiko paiusihai lashan.

²⁵Tiautenai ni ngüso saisile ngelouküta ali-eshiau tsüshioshi-e.

²⁶Amaohai ajantso chailaiu thaiutha thaloukü thsale lalou.

²⁷Ni nung athamanau tsüshiokü naito ngüsoüh athen saokü kankü khuwane.

²⁸Apaosiposoüh hetthat taiutsün akeng elung tilaitso lasoisoi.

²⁹Chhisiya amei chhitsün khaiunia tsak ngü hau ahan, naiuso ngü nokpaohoi hoikam nouko phopkü maikü naiuso maikü noitsün khaiunia tsak ni hau hane.