Read Khiamniungan Naga Ngiopung Ngiothi 23 Bible Online

Ngiopung Ngiothi 23 - Khiamniungan Naga bible

Ngiopung Ngiothi 23

¹Tilai ni atengting khaiunia tsak ko heshiu au moknoiji, apa sau nung amongai lütaiu.

²Ni thaisam meitsün tsak noi naito, ni achija lüthatsamlou.

³Apaüh waoshentsün chihsikhiam amei thaiutha chinekkü lanoi; tiautenai apaüh ni khunatau ayang noiau shiom.

⁴Memei iula au ni achija latanatlou.

⁵Chai nou tü akoi pokü letche tsakli jeikü khuwantsün khekkü achai niohap tsak ko khuwanau shiom.

⁶Amechek khaiunia tsak ün thaisam puo ai laheshiuha, tsüde- künai apaüh waoshentsün eheshiu amei nou tü lachinek.

⁷“Loüh piakü lüheshi,” tü apaüh ngioji, lüko apa mongto niko tsünoi.

⁸Ni ti hetaim nung ni phusane, naiuso ni ngio anyaothing singio-elattsün chikü asapat.

⁹Mainga tsak ko ila-iau kowekü lachite; apaüh nung tü monglingtsün tsühane.

¹⁰Akeng elung hethat taiutsün tilaitso lasoi-an, tsüdekünai me- jetthso hai thang si eiu lalouwankiu.

¹¹APAOU nou ngüso ün akongting akiploutsün noin, naiuso apaüh athako ngüso mi thaiutha tsakiu-e.

¹²Ni hau tsandetsün tü mong lükiu naiuso ni ashiotsün lektso lüngelou.

¹³Methso tsak thatsangau henyikü lathe. Tiautenai ni apa tü pailai nou shiuhtsün nouto apa tsü-eane.

¹⁴Atsüoting naito nungüh apa aa kipsan-e.

¹⁵Jüthso, ni angelatsün iula naito, ngü thatü monglingatkü noi-e.

¹⁶Tilai ni mongthat mongsai ngio singiotsün lula-e ngü koi-ate.

¹⁷Amongai angeihoi tü chinekkü layang; ni aakih nouko APAOU thaiutha asuhat kiuau ayangtaiu lünoi.

¹⁸Nungti naito, athaiutha ashiau nou aküo meikü noi-e.

¹⁹Jüthso, anglu, mongyang pungkü lünoi naiuso ni akihkih thaiutha meikü lüyanglu.

²⁰Theng thsüokü shiutsün, tsüdekünai thai- sam thsüokü samtsün khaiuniahoi ko la aiha.

²¹Jimtuk hoi naiuso thaikan hoi nouso tsosilu iula-e. Ni ehelu si asaianlu thenaito shakta ni nethe nou tene!

²²Apo ngio lü-ang, apa tsühakü ni aa noiau tsüshio. Tilai anyiu sonane, apa hau ni monglingtsün lühan.

²³Ngiotsüo mongthat mongsai, angeloutsün, naiuso ilatsün amei nungso lütuhlou, lüko nungso jananau amai thatü piakü noin.

²⁴Asio khaiunia tsak ün po monglingau ayam thakü noin. Mongthat mongsai suntsün thso tsak da ni monglingau shiokü noin.

²⁵Apo naiuso anyiu ni shioko lükoi-i; ni anyiu lümongling-i.

²⁶Jüthso, mongkiukü anglu, naiuso jü aa nou ni hau athatlu au tsak lüthe.

²⁷Meshen shesinyih jankü ajisiwop chhi mai hetsün naiuso ajisiwop menyiu nouso thatü tsaokü nou jin tsak noin.

²⁸A-aploutsünso khekkü ngüsoüh ni tü jioji naiuso pohai piakü ngiotsüo tsüdekü iula-iji.

²⁹Sauhaiüh theng ayan ayan ta thatü thsüokü shiuji, nungtin khaiunia ajantso ngü hau ahan, naiuso ngü asam hau meshen thaiutha aküothe nouko ayangelat nou meankü asaita angja lousankü naiuso namnamkü noitsün khaiunia ajantso han-e. Apa niovei shenglakü, naiuso apa pem nai mou nou piakü poji.

³¹Theng aseng ti sübao, thengkam nai chiukü sungji, naiuso nung mioli-an au shioji, nung hau asam tü lalilu-i.

³²Nungthan nyap nai aliule suntsün pao tsak tsangkü asam tü jeitsünli asamüh ngesane.

³³Aniokou ko athanga tsak epi-e, naiuso ni tsangsheikü yangau si chiteau tsüshio-e.

³⁴Ni khiamnok awemteng nai saikü noitsün tsak khekkü noi-e, tsüdekünai khiampek nou kheng asong asao ta thoikeitsün tsak khekkü noi-e.

³⁵Ni ngio-e, ngüsoüh ngü tü shiuh, lüko ngo tsütawai, ngüsoüh ngü woiatkü wan, lüko ngü nung tsüyangsanshi. Tilai ngü thsümone, loüh ngü theng lu yamshi-e.