Read Khiamniungan Naga Ngiopung Ngiothi 24 Bible Online

Ngiopung Ngiothi 24 - Khiamniungan Naga bible

Ngiopung Ngiothi 24

¹Tsümeikün khaiuniahoi nouso tü lamongngei, naiuso ngüso ko paiusihai shanau lakowe.

²Ngüsoüh yangtsün chikü nung angja lousanaulu noin: ngüso son soptsün pungkü khaiunia ajantso to tawaiaulu noiji.

³Mongthat mongsai naiuso angelatsün chiai noilutkü tsamsigoh nou shanji.

⁴Tilai ange mongyang nou noin, tsampai nouso chaiou lung naiuso aleng amei nousoüh chükü shanji.

⁵Oukong khaiunia nouko naito mongthat mongsai noitsün oukong- tso; ah, oukong nouko naito a-nge mongyang nou atengting.

⁶Apem chiko, ni ehlithang nai ehli khuau nou khako ni chhisiya au nouso pao- tsangkü khemtaiu au noin, naiuso ni ayamhan amei piakü eptsün nou, thatü siudekü ehli shio au noin.

⁷Mongthat mongsai ngio nouso mainga tsaküh ngela au thaiutha thatü achek. Tilai chhisiya atengting thaiutha chite-e apaüh ngiohaau titso tsünoiji.

⁸Ni tsümeikü chhisiya au asaita mongthat that naito, khaiuniahoi nou ni tü ajonjek losantsün khaiunia tsak ta jone.

⁹Mongyang tsünoikün khaiunia tsaküh thattsün to tilünou angei. Amaohai awesan tsünoikün khaiunia nung apin khako achinyan noin.

¹⁰Angja aküo tsak ni tsüshiolokü naito ni atsüoting outsükongkü noin.

¹¹Ngiotsüo khaiunia aphio kiukü loatau noi nai nung kipsanau ni henyikü lanoi.

¹²Ni to nung thsale tsüde ta ngio-e, lüko Goa nou ngeji naiuso amongyang tü thaisanji. Apa ni tü jiokülu noin; apaüh ngeji. Naiuso ni chhisiyatsün tsangkü ni hau apaüh amai kiu-e.

¹³Jüthso, ni liukhiam nou lüshiu, tiautenai nung amei noin. Naiuso liukhiamli atsop nou tü aleikhaiu ai anyaothing noitsün khekkü,

¹⁴a-onthso thaiutha mongthat mong- sai nung amei noin ta ni tsangsheikü lüthe. Mongthat mongsai nou lülo nungaito ashiau nou aküo meikü noi-e.

¹⁵Khaiunia asaitha tsak kaowatau yangtaiutsün akausai khaiunia khekkü ni lathe tsüdekünai apa tsam tü pha lapoh.

¹⁶Asaitha khaiunia tsak to titsojam loi-an lünou, asaita tsashiji, lüko tsümeikün khaiunia to aküothe nou lomowanji.

¹⁷Tilai ni thako tsaotsünsoüh aküothe waoheji nungai lamongling, naiuso tilai apa hokkha thekkü loianji nungai amongpem mong- lingkü lanoi.

¹⁸Ni monglingtsün APAOU nou ngehean-e, naiuso nung apaüh tsüaiuphe nung akausai khaiunia hau tsükiuau shiom.

¹⁹Ni khaiunia tsümeikünso hau yangelatkü lanoi-i; ngüso da mong ngeikü lanoi.

²⁰Khaiunia tsümei- künsoüh kha ai thapau ayangtaiu ti tsünoi.

²¹Jüthso, ni APAOU naiuso nokpao nou thaiutha asuhat kiutsün lütaiu. Ngüso thako khengshitsün khaiuniahoi ko aikü to chhisiya au pokü tsünoi;

²²nungtin khaiuniahoi alekta aküo tsak ko mowane. Nung aküothe Goa tsüdekünai nokpao tsangkü lousan au shiom ta ni yangsanjimo?

²³Nungso lüko mongthat mongsai khaiunia nousoüh ngiotaiutsün noin: Mikhem kiutsün tsaküh mikhem taoko khasinio thaptsün nung aphio noin.

²⁴Apaüh aphio khaiunia tsak tü aphio tsüsun ta welut naito, apa hau khaiunia pungkü nou athesan kiukü chinyane.

²⁵Mikhem kiutsün sauüh aphio nou hau angja kiuji, apato titilünou tsüomei-e naiuso nianmei nouko monglinge.

²⁶Saitha thalatsün tsak nungüh nung atsüoting haimei ta ii hanji.

²⁷Athang si eiu mokhemloukün lektso, naiuso ni eheshiu au saiukü taim ta momonglamkün lektso tsam lümolah naiuso tsamsigoh nou lümoyang.

²⁸Nung koko ta ti tsünoikü ajantso thako mitha nou lakiu, tsüdekünai apa thaiutha aphio ai langio.

²⁹“Apaüh ngü tü ti chhin nung ngü apa tü chhishi-e! ta langio; tsüdekünai ngü apako lüko khu-e ta langio!”

³⁰Ngü cholak naiuso a-aiu khaiunia tsak ün sainaoshep eiu yankü khukü noiküla;

³¹Nung eiu tsao naiuso chih ai nou miankü noiküla. Nungko ngüso lemkü noitsün lungpe nou loi-an.

³²Ngü nung tü thapkü yanglu nai, nungko angela tsak eplou.

³³Ni mongchio naito mongtsamkü lüsaian;

³⁴lüko tilai ni saikü noi-e, tsosilu nou nitü sontheng kankü kaohoi shikü shiolouwantsün khekkü noi-e.