Read Khiamniungan Naga Ngiopung Ngiothi 25 Bible Online

Ngiopung Ngiothi 25 - Khiamniungan Naga bible

Ngiopung Ngiothi 25

¹Nungsoüh Yihudahai Nokpao Hezekia ün mikhem tsam nai khaiuniahoi nou satloukü taiutsün Solomon ün ngiopung ngiothi nouso noin:

²Apaüh ti tsangpokji nung thaiutha samüh Goa lomsanji, lüko ngüsoüh thanekü ti hanji nung thaiutha samüh Goa lomsanji.

³Nokpao tsaküh ti yangji nung ni tilaitso tsüngeji; apa mongyang nouso to sam yankü noin, nung maou atsokting tsüdekünai khiamnok a-auoting nouso khekkü noin.

⁴Tangkason ainou tsüsiokün alouwan nungaito sonlang khaiunia nou aleng meikü shansanau shio-e.

⁵Ayam tsümeikü hantsünso to nokpao ainou pungekü ataiu, nungaito apa nokshing ngiotsüo nou ngesane.

⁶Tilai ni nokpao khako tsa-e, ni apa amongyangko mongchio-iau lakowe, naiuso ni atengting khaiunia tsak ta la-epi.

⁷Anoithang amao ateng khaiunia ajantso hau kiuwan- iau ni tü ngio-itsün ko naito ni tü atsok noithang nai anoi ta ngiotsünbao chen.

⁸Ni epchutsün tso tsak thaiutha mikhem nai khuau thatü to laliuliu. Amao mitha ajantso tsangkü ni aphio noin ta thasan nai, nungaito ni ti chhi-ela?

⁹Ni naiuso aphaosipo aje mongyang tsak ko tsüjeiaikü noi nai, nung asam jetko lükheman naiuso tso akaungio titso lalosan.

¹⁰Tsü- dekünaito, khaiunia pungkü nou ni akaungio kiapkü taiuau tsüshio ta ngela-e, küta ni amiam ainou tilaitso tsüpunge-e.

¹¹Mongyang yam meikü shithsatkü hantsün to tangkason aotsai nai chaiou lakkeng khekkü shantsün tsakli noin.

¹²Ange amon khaiunia tsak tsangkü khaiunia ajantso tü alohat kiutsünko angelouau mongchiotsün- to chaiou lakkeng khiap tsüdekünai chaiou lung nou chaiou lakkeng ameiting tsak chiosantsün khek.

¹³Be-eiuyam ajek taoko khiam- dang khekkü, amonglam au ngem amei kantsün nung apa hongthon- tsün thaiutha aalo noin.

¹⁴Khaiunia sauüh thalouküta tilaitso tsükiukün nungto ah-uo tsünoikün thengmia naiuso ahsheih nouso khekkü noin.

¹⁵Laiukü jeilouau thaloutsün nou nokpao nouso shiolouau monji, naiuso lei anyaothing nou aloyang- tsün akongting nou thapekkü wanau shioji.

¹⁶Ni tü potsün chiai liukhiam tilaitso lashiu; nungtü simkü shiu naito ni phu-e.

¹⁷Aphaosipo tü thatü paikü lasailu, tiautenai apa ni tü chülu-e naiuso chinyankü iula-e.

¹⁸Meshen phaosipo thako yaang mitha kantsünto, athiotsün son, sah tsak, tsüdekünai uokopchon amonteng tsak noin.

¹⁹Angja omhe taoko amonglamau tsünoikün khaiunia da nioluttsün to huo tsüpokü lüko chiuhe au kowetsün tsüdekünai chiukao khaiunia tsak ko tsakeihatsün khek.

²⁰Monghenkü noitsün khaiunia tsak tü jih hangluttsün to chonga taoko apa neshe louwankiutsün khek, tsüdekünai mou tsak ko jem khiam tsomlutkiutsün khekkü noin.

²¹A-eh naiukü noinai, apa hau lüwao; apa khiam nou lekü noi nai, apa hau lüshen.

²²Nung chhi nou apa miame naiuso APAOU nou ni hau amai kiu-e.

²³Shingmi ahsheih nou ah-uo kankü shitsünli, ngiome nou amongmat kankü shiji.

²⁴Anengnengtsün tsammongnyiu tsak hakü kihtsün koto tsamkhaiu nai kih anbao chentso.

²⁵Aphiteng nai, goumchi laiukü ainou ngem amei lutsün to, ni tanatkü naiuso lekü noitaoko khiamdang shiutsün khekkü noin.

²⁶Khaiunia amei tsak nung khaiunia tsümeikün ajantso ko mongsai tsak noitsün to, temchei noitsün temkhao tsak tsüdekünai sheh temkhao tsak khekkü noin.

²⁷Liukhiam thatü thsüokü shiu au tsümei, naiuso nungti alomsan thatü thsüokü epau kowetsün nou tsümei.

²⁸Ni mongmattsün ni thakipau tsüshiokü naito, akhengshitsün thako solouau be tsünoikün noknio tsakli ni noin.