Read Khiamniungan Naga Ngiopung Ngiothi 26 Bible Online

Ngiopung Ngiothi 26 - Khiamniungan Naga bible

Ngiopung Ngiothi 26

¹Asaiu nai nyin saotsün tsüdekünai be-eiuyam taoko ah-uotsün khekkü mainga tsak thaiutha alomsan nou tsütin.

²Ni epau maikü tsüdekün lektso athesan nou ni tawai au tsüshio. Nungsoto tilaitso ahü tsüyangkü jeikeitsün liuwaiotso nouso khekkü noin.

³Mokthso nou tü ni ashiuh shiuh au noin, gado nou ta nganphan auo nou pokü theau noin, naiuso mainga hai tü pailai nou thioau noin.

⁴Ni anga sangtsün ngio tsak tü thashi naito, ni lüko nung asangtsün mainga tsak noulilu noin.

⁵Anga sangtsün tsak tü anga athashitsün tsak lükiu, nungaito nung sangtsün khaiunia nou apaüh sangtsün chiai sheikü apa asangpun tsünoi ta ngela-e.

⁶Ni mainga tsak hau ngio chite-i naito, ni achija ahok tappanji; ni bao angja thaiutha sangji.

⁷Chione khaiunia tsaküh apa hok kankeiau montsünli thatso mainga tsaküh ngiopung ngiothi tsak kankeiau shioji.

⁸Mainga tsak hau alomsan kiutsün to menkop nouko lungtso tsak tsantaiutsün khekkü noin.

⁹Jimtuk khaiunia tsaküh apa phamongko tsao tsak thalouau kowetsünli, mainga tsak sonkou nai ngiopung ngiothi nou noin.

¹⁰Sauüh ayankeitsün mainga nouso naiuso thengtuk hoi mephaiu yamji, apa to khaiunia pungkü ün mongyang tawaikiutsün noin.

¹¹Jii tsak meshenüh phusantaiu- tsün tü laolutshitsün khekkü mainga tsaküh ayang tsünoikü angalu chhiji.

¹²Khaiunia ajantso apa angela ti tsünoikünai apaüh ngeji ta yangji apa to thatü thsüokü mainga nou tü ngetso tsüde.

¹³Cholak khaiunia apa tsam ainou tiauta tsaloukü kengchiai tsüshi- khuji? Apa tilon hatji? Chongkhao lon hatji süne?

¹⁴Cholak khaiunia nou then ailu laokü khuji. Apa kou lemlemtsün chiai tsüshikhuji.

¹⁵Khaiunia ajantso to ngüso son ai chih khianthioautso thatü cholakkü noiji.

¹⁶Athsümon khaiunia chinyat sauhaiüh ngüso ayang thaiutha ayam meikü hanau shioji, nungso chiai cholak khaiunia nou apalu thatü athsümon tsak noin ta yangji.

¹⁷Meshen chhisiya yamko ti tsüshimkü ahaiu-etsün ko sau haji, nungto yampun nai tsakeitsün jii noukhan nai thaloutsün khekkü.

¹⁸Khaiunia sauüh ajantso ayam tsüthakü nai nialükhunküta, naiuso apaüh nung alolonyaiji ta ngioji, nung khaiunia nou to ahatting dun tü metsün waiwai khaiunia tsak khekkü.

²⁰Pai tsünoikünai, in nou nyattanji, nungti ngiolopengtsün tsünoikü nai, ali-e nou tsünoiji.

²¹Inkaiu nou in nou hengiji, pai nou in nyai-iji, nungti angem lou- santsün nou ashiuh-etsün tsülaokü noi-iji.

²²Me thaiutha nyankü chitetsün nung thatü anyaothing noin! Samüh titi nung mioli au mongchioji!

²³Mong tsükiukü chitetsün nou ni atsüoting ti yangji nung tsangpokji, naiuso nungto tangkason apia mai nou amai chao pulak nou tü tsomluttsün khekkü noin.

²⁴Akausai khaiunia tsaküh apa achinyan mongyang meshen ngio nai tsangpokji.

²⁵Nung angluaoto amei noi-e, lüko apa da lamonglam, tiautenai apa mongpem achinyan nou ngeshikü noin.

²⁶Apaüh apa mongpem achinyan tsangau shiom, lüko khaiunia pungkü nou apa ün tsümeikün chhisiya eppe.

²⁷Khaiunia sauhaiüh amaohai thaiutha jin jintaiuji, nungko ngüso chija ngüso pem monanji. Khaiunia sauhaiüh saitai tai-iau yachuji, ngüsolu pan nyomanji.

²⁸Yaang chitetsün tsangkü apaüh tawaitaiutsünso chinyanji; Naiuso atailouau nyaothingkü chitetsün son nou alothe sungiji.