Read Khiamniungan Naga Ngiopung Ngiothi 27 Bible Online

Ngiopung Ngiothi 27 - Khiamniungan Naga bible

Ngiopung Ngiothi 27

¹Lühom thaiutha tilaitso labülom. Tiautenai lo naiuso nungthan jetko ti thawao-e ni tsünge.

²Achija tilaitso nung lachhi: amao khaiunia hau tsüdekünai mesanhoi hau ni lülomsan-i.

³Mainga nou angja lousantsün nungto lung si singtso tsoi alethsang chiai phopkü.

⁴Amongmat nungto amongthe, naiuso alotheantsün, lüko nioveikia nouto tiko welu au tsüshio.

⁵Khaiunia tsaküh ni apa thaiutha ti apaotsang tsünoi ta yangkiu-itsün koto ajantso khakhakü lothakiu naibao chen.

⁶Paiusihai tsaküh tawaikiutsün athat nou amei. Lüko tilai eh tsaküh asangdongkhaiu ai apa pha letaiu-e lütsüolou!

⁷Ni tilai thai miankü noi-e, ni liukhiam nou chinyane, lüko tilai ni naiu-e, akhosak eheshiu lüko ason ai nyaothingkü noi-e.

⁸Khaiunia tsak meshen tsam ainou khukü tsakeitsün to, liu waio tsak meshen ap ainou khukü tsakeitsün khekkü.

⁹Khaiutsom naiuso angannyam nyamitsün nou amongpemai monglingkü yangiji, lüko angja nou aalo mongpem pengpun-iji.

¹⁰Apaiusihaiso tsüdekünai apo ün paiusihaiso labe-an. Ni angja omhe nai, ahachu thaiutha adei ta lasang. Kumai noitsün deisinio tsak ko naito ashimko noitsün aphaoüh ni hachu au shio-e.

¹¹Jüthso, mongyang noikü lüthe, naiuso ngü monglinge. Nungti naito ngü lochitsünso tü ngü thalaau ayam noi-e.

¹²Ilatsün khaiuniahoi nousoüh to angja shitsün epkü nung haiuwane, lüko ayanglu tsünoikün khaiunia to saitha nungko nappane küta phikü yangheshi-e.

¹³Sau lünou thatü thsüokü mai- nga noulu mesanhai tsak ün chailaiu thaiutha thsale louau thaloukü meshen ün tengkhaiu tengkam thaiuthabao amai kiuau thalou-e.

¹⁴Ahom beta chukü sauüh sangh asong nou wekü meshen hai ouk kiuji, nung apa thaiutha athesan ta wesane.

¹⁵Ah-uo taoko ah-uochan tsülaokü chantsün si tsülaokü nengnengtsün tsammongnyiu tsak nungne wekü.

¹⁶Ni apa titi tsamkü noi-iau shio-e? Ahsheih lolaokü taiuau tsüdekünai khaiutsom phamongko semjeikü taiu au ni jam lüko kowekü noimo?

¹⁷Son nou sonühlu shimontsünli, khaiunia tsaküh tsak ainou ngelouji.

¹⁸Phiopai tsak paotsangkü ataiu, naiuso ni phioshep heau eppe. Ayathsüotsün tsak sauüh meshen tsampao paotsangji apa to asuhat eppe.

¹⁹Ni khiam mongai akhasinio lapshikü eptsün nung apim ün akhasinio noin, naiuso amongpem ai ni eptsün nung apim noin.

²⁰Khaiunia ün achinek nung tilaitso amongtsam tsünoi, nungko loüh tsampai apia asaita noishin.

²¹Chaiou lakkeng naiuso tang- kason in nou theluji, nungti khaiunia tsak ün nianlomsong lüko thelu au shioji.

²²Ni mainga tsak tü apa mothalimkün lektso thio lüko, ni apa tü mainga onthso tü to thioau tsüshio-e.

²³A-onnemokhoi naiuso janghoi nou tü ni shiotsün lektso meikü paotsangkü lüthap,

²⁴tiautenai jengtsaiu nou to asaita hau tsüde. Mele nouso lüko asaichita hau tsüde.

²⁵Chiinwon lühe-an naiuso amao chiinwon sungshitsün taoko kingtso nouso ai khengliu nouso lühe-an.

²⁶A-onnemok pun ainou ni aneshe shanau shio-e naiuso a-wonso ajantso jantsün tsangkü ni chai eptsün nou goh tuh au shio-e.

²⁷Won apoi nousoüh ni naiuso atsammong hau anyao nou kiu-e, naiuso nungh atsamki menyiuthso nouso thaiutha lüko noi-e.