Read Khiamniungan Naga Ngiopung Ngiothi 28 Bible Online

Ngiopung Ngiothi 28 - Khiamniungan Naga bible

Ngiopung Ngiothi 28

¹Ngüso tü sauüh tsükumkünai angeihoi nouso kupji, lüko saitha khaiunia tsak to chongkhao tsakli mongsong noin.

²Tilai mele tsaküh angei sunheji, nungko nokpao tsaktso tsak tü thankü tsak ta tsakü tsünoi-e. Lüko tilai mele tsak ko ilatsün naiuso athsümontsün aheihoi noi-e nungto kongkü kiploutsün noi-e.

³Khaiunia tsak sau oukong nai noi taoko angja khaiuniahoi tü thang- mangji apato chihsam khiamsam kutloukü khuwantsün singtsang khekkü noin.

⁴Ni ngiokhem thaiutha awesan tsünoikü naito, ni tsümeikünso dongai nai noin, lüko ni nungso angkü thenaito, ni ngiokhem tsüwesan- künso thako noin.

⁵Tsümeikün khaiunia nousoüh ngiotsüo nou tsüngelaji, lüko sauhaiüh APAOU amkhamji, ngüsoüh nung meikü ngeji.

⁶Memei theküta mong tsükiukü nouko naito, tsosilu theküta mong saitha nou chen.

⁷Pühe khaiunia tsak sauüh ngiokhem angio angji apato ilatsün. Lüko thaikhan haiko haimei shantsünto meshen po lomiamkiuji.

⁸Ni khaiunia ajantso khako oukong kankü chai anüo loutsün tsangkü ni memei iulakü noinaito, amemei jengtsaiu tsosilu hai tü tsüojintsün ajantso dongai khuwane.

⁹Ni ngiokhem angio tsü-angkü naito, Goa nou amisao nouso thatü chinyankü lula-e.

¹⁰Ni mongsaitha khaiunia tsak tsümeikü chhisiya au kausai naito, ni ajin kangko achija mone. Aphio tsülepkün khaiunia nou tengkam amei kame.

¹¹Memei khaiuniahoi nou asaita ngüso ange amon noin ta yangji, lüko tsosilu khaiunia tsak sau saisile amei noin, apa ün ange meitso.

¹²Tilai khaiunia ameihoi nou nokshing noikham nai shi-e; khaiunia apem monglingji, lüko tilai khaiunia tsümeikünsoüh nokshinge, khaiuniahoi nouso pamanji.

¹³Ni nou angei nouso tsangkü wanau kowe naito ni aakih nouko tilaitso ashio tsü-eppe. Nungso lüphekkan, naiuso lakankeishi, nungaito Goa nou ni hau atsüojinyang hane.

¹⁴Asaita APAOU ngio lü-ang, naiuso ni monglingkü noi-e. Ni mongkong naito ni mowane.

¹⁵Tsümeikün nokpao thako tsosilu khaiuniahoi titi theau tsümei; apato angaotsün chongkhao tsüdekünai ajetsün shap tsak khekkü ahat au noin.

¹⁶Angelatsün nai tsüsaiukün nokpao to loüh ajeiat kiutsün asong noin. Sauüh tsüsaithakün tü chinyanji, apaüh laiukü nokshing shinge.

¹⁷Aloattsün ko khaiunia tsak aphio noi nai apaüh meshen ekhan apaüh shiotsün lektso liukü thaiuji. Apa lolaokü wanau lakowe.

¹⁸Saitha lünoi naiuso ni kipsane. Ni saitha tsüdekü naito ni alekta loiane.

¹⁹Chhi kongkü chhitsün eiu-a khaiunia tsaküh ehe au saiukü taim. Khaiunia sauüh atao yaang nai wanji apato asaita tsosilu noi-e.

²⁰Saitha khaiuniahoi aakih nai amongling nou meankü noin. Lüko ni memei iula au liuliu naito, ni angja tsüepkü tsülao-e.

²¹Phaphi phamong nung tsütha. Lüko mikhemtsün ajantsoüh to nekhem paopei ehenthsoting epau lüko tsüthakü chhiji.

²²Mechek khaiunia nousoüh memei iula au jengtsaiu phiai liukü kumkü khuji, naiuso tsosilu nou ngüso tü ti taoko shiuh-e, nungh ngüsoüh tsüngeji.

²³Khaiunia ajantso alotha, naiuso nungphiai apa son nou nyakü chitetsün tü simkü mong nou lenge.

²⁴Khaiunia ajantsoüh apa posinyiu ainou kaoloutsün to aphio tsüde ta yangji, apa lüko amao kao nouso chiai meikü tsüde.

²⁵Mechek nou angjalu lousanji. Lüko sauüh APAOU da amonglam taiu-e apa thatü meijeng.

²⁶Meshen ayang da lu mong- lamtsün nung mainga. Lüko a-nge khaiuniahoi ayamhan tü sau hoilutji apa kipsankü noiji.

²⁷Tsosiluhai hau lükiu naiuso ni tilaitso luatkü tsünoi-e. Ni aniovei tsosiluhai khako maiushikü noian naito, khaiunia piakü nou ni athesan kiu-e.

²⁸Tilai tsümeikün khaiuniahoi nouso nokpao noikham nai shi-e, khaiuniahoi nou pamkü noianji. Lüko tilai ngüso oukong ainou ngüso salianji, loüh asio khaiuniahoi nou nokshinge.