Read Khiamniungan Naga Ngiopung Ngiothi 29 Bible Online

Ngiopung Ngiothi 29 - Khiamniungan Naga bible

Ngiopung Ngiothi 29

¹Piaküjam thutnai sauüh mong konge, apa alekta mowane, naiuso alomei nou tsüeppe.

²Ngü hau asio nokpao tsak ahan naiuso ngü ni hau amongling khaiuniahoi hane. Ngü hau angei nokpao tsak ahan naiuso ngü ni hau ashiusong khaiuniahoi hane.

³Ni mongthat mongsai tsüojin naito, ni shioko apo monglinge. Ajisiwop chhi nai chai sauüh wanji nungto mainga.

⁴Tilai nokpao nou ngiotsüo thaiutha tsüojine, mele nou oukonge, lüko tilai nokpao nou chai thaiuthalu tsüojine, apaüh apa goumchi lotheane.

⁵Ni ahaiso tü akausai nou nian- lomsan nai, ni athaiutha jin jintaiuji.

⁶Tsümeikün khaiuniahoi ngüso angei nai monji, lüko saitha khaiuniahoi nouso monglingkü naiuso ngiotsüo noiji.

⁷Khaiunia amei tsaküh tsosiluhai ün ayamtha nou ngeji, lüko akausai khaiunia nousoüh nungtin chhisiya yam tsüngeji.

⁸Amaohai thaiutha asuhat tsünoikün khaiuniahoi nou noknio nouso athum apülai iula-iji. Lüko sauhai angelatsün noin ngüsoüh alum aosangkü kankeiji.

⁹Tilai mongthat noitsün khaiunia nou mainga tsak thako mi kankü shi-e, mainga nou to anyailu nyai-e, mongmate, naiuso aalou tsünoi-e.

¹⁰Shelam khaiunia nousoüh sau- lünou aphio tsüsunkünso chinyanji, lüko nungtin aa nou asio khaiuniahoi kiplou-e.

¹¹Maingahoi nou ngüso mongmat sungtsün khakhakü hanji, lüko angelatsün khaiuniahoi nou kiplouji naiuso tsüngiokü lolaokü wanji.

¹²Nokpao tsaküh tsüthakün ngio- ngem ta mongkiu naito, apa khemko asonghoi apem ngiotsüo tsüdekü noi-e.

¹³Tsosilu khaiunia tsak naiuso apa thangmangtsün ne nung yamko wekü noin: nung APAOU nou ngüne nemtso hau niovei nou kium.

¹⁴Nokpao tsaküh tsosilu tsak ün ayamtha nou kiplou naito, apaüh atao laiukü nokshing shinge.

¹⁵Alothatsün naiuso athatsamtsün nung thsohai thaiutha meikü noin. Methso tsak apa mongchiotsün yam khuwan naito apaüh apa nyiu lomiamji.

¹⁶Tilai angei khaiuniahoi nou nokpao noikham nai noiji, alothetsün shingjikanji. Lüko asiohoi to nungtin khaiunia loiantsün epkü kih-e.

¹⁷Athso lülotha naiuso apaüh ni hau aalou nou kiu-e. Apaüh ni miamiau tilaitso tsükiu-e.

¹⁸Tiai Goa ainou khapiam ngio chimetsün tsünoi, hoi nouso amo- wanao noitsün ainou tenjeiau tsünoi. Lüko sauüh Goa ün ngiokhem kankeiji apato thaiumei!

¹⁹Tsamki tsak ngio noulu lotha au ni tsüshioji. Tiautenai apaüh ngela lüko, apaüh mong tsükiu-e.

²⁰Tsüyanglukü singiotsün khaiunia tsak nouko naito, mainga tsak thaiutha bao ayanglu au piakü noin.

²¹Sauüh tsamki hau ehen nai yakü apaüh aiutsün alum kiu-e, nyitso to apaüh ni taiutsün alum lowane.

²²Mongpek khaiunia nousoüh ali-e naiuso angja thsüokü sungiji.

²³Abülom nou ni saowane, lüko atsamloutsün nou alomsan asuhat nou eppe.

²⁴Kao em khaiunia tsak nou apa ün atsaoting eh noin. Apaüh mikhem nai ngiotsüo chite naito apa angja-e, naiuso apaüh tsüchitekü nai Goa nou apa athesan kiu-e.

²⁵Athaiutha amaohaiüh ti yang- kiuji nung tü yangtsün nung thatü ahat tsak noin, lüko amonglamtsün APAOU da taiu naito kipsankü noi-e.

²⁶Khaiunia pungkü nou nokpao amongmei aiuji, lüko apentsün to ni APAOU ainoulu eppe.

²⁷Asiohoi nou akausai nouso tü chinyanji, nungti akausaihoi nousoüh asiohoi nouso tü chinyanji.