Read Khiamniungan Naga Ngiopung Ngiothi 3 Bible Online

Ngiopung Ngiothi 3 - Khiamniungan Naga bible

Ngiopung Ngiothi 3

¹Jüthso, ngü nitü ti tsandeji nung labe-an. Ngü nitü ti chhisiya au ngioji nung asaita lüyangshi.

²Jü atsande nou nihau aakihlaiu, naiuso atsüomei aa nou kiu-e.

³Asuhat naiuso amongkiutsün nou ni tilaitso le-ankü lakhu-i. Nungso asang lemkü kelutkü lütaiu; naiuso amongpem da satlutkü lütaiu.

⁴Ni nung chhi naito, Goa naiuso khaiunia nemtsoüh nitü monglinge.

⁵Amongpem chikü ni APAOU da lümonglam. Ni ti ngeji ta yangji nungtü tilaitso laniolut.

⁶Ni chhisiyatsün alumko APAOU lüyangsan, nungaito apaüh nihau yam atha nou hane.

⁷Ni tilaitso meshen chija ni phopkü ngeji ta layang; asaita APAOU tü angio lü-ang, naiuso tsüthakün chhisiya au lamongchio.

⁸Ni nung chhi naito, nung moushe amei sübao nou mou nouso lomeiji, naiuso ni kiatsün ainou aalo-iji nung khekkü noi-e.

⁹A-goumchi ko sungtsün ameiting, ongko chaithio thiotsün tsangkü APAOU lülomsan.

¹⁰Ni nung chhi naito, abei nouso khülam nou meane, naiuso ni theng thatü piakü taiu nou, nung chikü akamlu tsükamtaiukhemkü ngeshikü noi-e.

¹¹Jüthso, tilai APAOU nou ni lothaji, nungtü mongtsüokü lüthe, naiuso nung alotsüo tsakli lülou.

¹²Tititenai po nou meshen monglamtsün thso tsak lothakiutsünli, APAOU nou sau tsüojinji apa tü thutji.

¹³Sauüh angelatsün thaloukü mongthat mongsai epkü iulaji, nung khaiunia nou ouk.

¹⁴Nungko tangkason eptsün chiai alesan noin, athaiutha chaiou lakkeng chiai phopkü alesan apia mai nungko noin.

¹⁵Chaiou lungtü simkü mongthat mongsai nai alesan aphop noin; ni aiutsün jengtsaiu nouso tikotso nung welu au tsüshio.

¹⁶Mongthat mongsai nou ni hau aakihlaiu, memei naiuso asuhat nou kiuji.

¹⁷Mongthat mongsai nou ni aakih nou monglingi-e, naiuso nung chikü ni aalo nai niakei-e.

¹⁸Sauhai mongyang pungkü iulaji ngüso monglingji; tiautenai mongthat mongsai nou ngüso hau aa nou kiu-e.

¹⁹APAOU nou apa mongthat mongsai tsangkü goumchi nou shan, apa a-nge tsangkü maou nou athang tsak ko taiu.

²⁰Apa mongthat mongsai nou haiu nouso tsang-in, naiuso thengmia nouso hau goumchi nai ah nou uo-in.

²¹Jüthso, mongthat mongsai naiuso angelatsün lale-an, nungso tilaitso ni ainou lakhuwan-i.

²²Nungsoüh nihau aa nou kiu-e, naiuso amongling aakih nou kiu-e.

²³Ni ayam ai aalokü khu au shio-e, naiuso tilaitso hokkha tsüthekke.

²⁴Ni saitsün taoko tilon hatkü tsünoi-e, naiuso asoh chikü ni niongao chiikü sai-e.

²⁵Tsümeikünso khako ah-ou-ahsheih tsak shitsün khekkü, alekta ahthe thawaotsün thaiutha ni ti yangelatkü tsünoi-e.

²⁶APAOU nou ni kipsankü taiu-e. Apaüh ni jin nai tsümoni-e.

²⁷Ni chhi au shiokü noitsün taoko, pokü noitsünso hau amei lüchhikiu.

²⁸Ni lo apa tü hachu au shiokü noi naito, lühom saokü ataiukei ta atsamphao tü tilaitso langio.

²⁹Aphaosipo tawai au lümeikü titso layangtaiu; apa ni da monglamkü adongko kihji.

³⁰Khaiunia tsaküh nitü tsümeikü ti tsüchhitaiukü naito, apako hoiküto lashiu-e.

³¹Shelam khaiuniahoi tü laniokia, tsüdekünai ngüsoüh chhitsünli chhiha au lakowe,

³²tiautenai sauhaiüh tsümeikü chhisiyaji, nung khaiuniahoi tü APAOU nou chinyanji, lüko apaüh asio khaiuniahoi apa amonglam nai taiuji.

³³Tsümeikün khaiuniahoi tsam khaiutü APAOU nou atheshanlutkiuji; lüko asio khaiuniahoi tsamkhaiu nouso ouk kiuji.

³⁴Mongkhei bülom khaiunia nouso Apaüh tsüwesanji, lüko sauhai tsamlokü noin nungso hau atsüojinyang hanji.

³⁵Angelatsün khaiuniahoi nou asuhat niansong nou eppe, lüko mainga nousoüh to ngüso chija amiam nou kanlutlouji.