Read Khiamniungan Naga Ngiopung Ngiothi 30 Bible Online

Ngiopung Ngiothi 30 - Khiamniungan Naga bible

Ngiopung Ngiothi 30

¹Nung Masahai Jake thso nou Agur ün ngio nouso noin: “Goa ngüko hakü tsünoi, naiuso ngü ti chhiau tsüshio.

²Ngü khaiunia nouko naito thainian tsakbao khekkü noin; khaiunia tsak da noitsün mongyang ngü tü tsünoi.

³Ngü mongthat mongsai tilaitso tsüngelou, naiuso ngü Goa thaiutha titso tsüngeji.”

⁴Sauüh tilai aün ainou ange amon shiolou? Sauüh tilai apa phamongko ahsheih nou thalou? Tsüdekünai nethe ehen tsakko khiam tsanshiau shiokü noiküla? Tsüdekünai goumchi elung nouso athang nouko sauüh shan? Ni apa ngenaito apa sau? Apa thso sau?

⁵“Goa nou apaüh thaloutaiutsün alum chhiji. Apa yamtsünso chikü thaiutha apa shikhao tsak khekkü noin.

⁶Apaüh tilaitso tsüngiokün tü ngiom ta ni ngio naito, apaüh ni tü thsüokü thut-e küta ni ngiotsüo tsüdekün tsak ta hane.”

⁷Goa, ngü mo-eankün khako ni ainou ngü ayam nime chhikiu-iau sangji:

⁸Ngü ainou ngiotsüo tsüde- kün pungekü ataiukiu, naiuso ngü tsosiluüh tsüde memeiüh tsüdekü athe-i. Nungtiphe ngü potsün chihsikhiamlu ngü hau akiu.

⁹Ngü saiukü taiu naito, ngü ni pokü tsünoi ta ngio-e. Loüh ngü tsosilu naito, ngü kao nou kao-e küta jü Goa khako amiam kankü shi-e.

¹⁰Tsamkih tsak apa tsampao khako tilaitso lalochi. Apaüh ni athesan kiu-e naiuso nung thaiutha ni angja-e.

¹¹Meshen po athesantsün, naiuso meshen nyiu hau amongling tsühan- tsün khaiunia ajantso noin.

¹²Meshen niokou ayanthsüo ta yangtsün khaiunia ajantso noin, lüko tsüyanthsüokü ainou ngüso motsaowan.

¹³Ngüsolu thatü mei ta yangtsün khaiunia ajantso noin, oh, ngüso titi amei ta ngüsoüh yangji!

¹⁴Tsosilu naiuso omhetso nouso khako thatü thsüokü thangmang küta ngüso alesan eptsün khaiunia ajantso noin.

¹⁵Liu-uothso anyiu nime noin, naiuso nungne nemtso “Ngühau akiu!” ta nian. Tilaitso amongtsam tsüyangkün in püle noin:

¹⁶Eantsün goumchi, methso tsüchetkün menyiu tsak, ah-uo pokü noitsün gohwai, naiuso athakippau tsüshiokün in nyai tsak.

¹⁷Sauüh meshen po ko lonyaikü lomji tsüdekünai apa nyiu ason yamko lochiji, apato meahe letche nou he-ane, tsüdekünai apa niovei liu-ai noitsün mükho nousoüh angshi-ane.

¹⁸Jü thaiutha angela au thatü athanga ayam püle noin:

¹⁹Tsak nou-Letche tsak maou nai jeikeitsün, pao tsak lung chiai chinkeitsün, Kheng asong tsaküh khiamnok chinai meshen yam eploutsün, naiuso melo tsak si menyiu tsak tsüojinekü iulatsün.

²⁰Ajisiwop tsammongnyiu tsaküh nungti chhiji: apaüh tsütsamtsütsüo chhiküta khiam pengkü ngioji, “Lüko ngü titso aphio tsüchhisiya!”

²¹“Goum nou akiplouau tsüshiokü ngaongaotsün ayam püle noin:

²²Tsamkih tsak nokpao iula nai, mainga tsak eheshiu nou apa thai miankü heshiu nai,

²³atsüojinau tsünoikün menyiu tsaküh tsammongpo eplou nai, menyiuthso tsamkih tsaküh tsammongnyiu tengkam kam nai.”

²⁴“Goumchiko thainian ehentso püle, lüko ngüso thatü mongsai naptsün noin:

²⁵Mao nouso: ngüso tsaosilao, lüko ngüsoüh asaiu nai chihsikhiam kamtaiuji.

²⁶Lungken nai saitsün uo tsak: Ngüso tsükong lüko ngüsoüh ngüso tsam lung mongai shanji.

²⁷Jongku hoi: Ngüso nokpao tsünoi, lüko ngüso aikü tsapkü keiji.

²⁸Chajeen nouso: Ni ngüso aphamongko thaloukü sem nai, lüko ni ngüso nokpao tsam nai noikü eppe.”

²⁹“Ngüso tsakeitsün tü thapnai uosukkü eptsün uo püle noin:

³⁰Chongkhao hoi: Thainian chikü khako ngüso akongting, naiuso tilon tsühatji.

³¹Bülomkü tsakeitsün waiopong hoi, wonhoi nouso, naiuso meshen khaiunia khako nokpao nouso.”

³²“Amongkan naiuso tsümeikün chhiau thaiutha ni mainga noikü shinaito lülaolou küta lüyanglu!

³³Ni nyao nou cheikü taiu nai, ni ünge nou epji. Ni khaiunia ajantso ngan ai lahnai she nou sheji. Ni amongmat lousan nai, ni angja nai napji.”