Read Khiamniungan Naga Ngiopung Ngiothi 31 Bible Online

Ngiopung Ngiothi 31 - Khiamniungan Naga bible

Ngiopung Ngiothi 31

¹Nokpao Lamuel ün nyiuüh apa tü ngio mongkü chimtsün ngio nouso:

²“Jü misao thalakü eptsün ni jüthso atsüojin melothso. Ngü ni hau ti in chite-e?

³A-oukong chikü melo menyiu yamko naiuso achai chikü menyiu hau lawan; ngüsoüh nokpao- hoi lotheaniu.

⁴Anglu, Nokpao Lamuel, Nokpaohoi nou theng tsüshiu au noin, tsüdekünai atuk- kattsün thaiutha chinekkü tsünoiau noin.

⁵Tilai ngüsoüh shiuji, ngüsoüh ngiokhem nouso be-ankü khaiu- niahoi nou potsün ayamtha nouso tsüwesankü le-anji.

⁶Atukkat eheshiu nouto eantsün naiuso aküothe nai noitsün khaiuniahoi thaiutha noin.

⁷Ngüso tsosilu naiuso tsümonglingtsün be-anau ngüso hau lüshiu-i.

⁸“Meshen thaiutha ngiolouau tsüshiokün khaiunia nouso thaiutha lüchitekiu. Angjahoi ün ayamtha nou lükiploukiu.

⁹Ngüso thaiutha lüchite naiuso asio mikhemtsün tsak lüthe. Tsosilu si pokü noitsünso ün ayamtha nou kipsankü ataiukiu.”

¹⁰Tinkü naiuso maikü noitsün tsammongnyiu tsak epau titi achek! Tiautenai apato lakkeng chiai chaiou noin!

¹¹Apa tsammongpo mongpem amonglam apa da taiuji, naiuso apa tilaitso tsosilukü tsünoi-e.

¹²Apa aakihlaiu noitsün lektso, apaüh apa tsammongpo tü amei chhiji naiuso tilaitso tsütawaiji.

¹³Ehmok ne naiuso ashethup ne lahtsün tsangkü apa meshen chija tsükengtingkü taiuji.

¹⁴Chailehai jengtsaiu kantsün kheng nouso khekkü athang laiukü ainou apaüh tsamai eheshiu kankü shiji.

¹⁵Apa tsammong thaiutha ehe- shiu khemtaiu au naiuso apa tsamai yathsüotsün menyiuthso nouso hau chhisiyakü taiu au apa ah-mongekü noi taoko chuji.

¹⁶Apaüh goh tü thapküta nung tuhlouji, naiuso apaüh chensantsün chai nou apaüh sainaoshep eiu ahji.

¹⁷Pem kongsimongkü chihsi- khiam lousantsün apa chhipoh menyiu tsak noin.

¹⁸Apaüh shantsün alum thaiutha alesan apaüh ngeji, naiuso apaüh asoh phikü saokü chhisiyaji.

¹⁹Apa ewoi apaüh chija shuji küta apa neshe lahji.

²⁰Tsosiluhai naiuso pokü noi- tsünso hau apaüh mongchiokü kiuji.

²¹Tilai nyin saoji apa yangelatkü tsünoiji, tiautenai apa tsammong thaiutha alam neshe taim.

²²Apaüh thenshim ne shanji naiuso ashethop neshe amei apaüh thoji.

²³Goumchi ahei hoikam nai apa tsammongpo to meikü ngesankü noiji.

²⁴Apaüh neshe naiuso kongwoi nouso shanji, naiuso nungso chailehoi hau janji.

²⁵Apa da oukong naiuso asoh nou noin naiuso ashiau nou atao thaiutha apa hatkü tsünoiji.

²⁶Apaüh mongthat mongsai noikü singioji.

²⁷Apa tsammongüh potsün thaiu- tha paotsangkü asaita tsükengteng- kü noiji.

²⁸Apa thsosoüh ngüso mong lengtsün apa hau hanji, naiuso apa tsammongpoüh apa lomsanji.

²⁹Apaüh ngioji, “Menyiu piakü tsammongnyiu ameihoi noin, lüko nung- so chikü ongko usokkü nou ni lu.”

³⁰Atailoutsün to akausai naiuso alengmei nou mowanji, lüko menyiu tsak sau APAOU lon hatji, apa to lomsan au noin.

³¹Apa phamongko chhisiyakü lesantsün chikü apa hau lükiu. Nung menyiu khaiunia pungkü ainou asuhat epau maikü noin.