Read Khiamniungan Naga Ngiopung Ngiothi 4 Bible Online

Ngiopung Ngiothi 4 - Khiamniungan Naga bible

Ngiopung Ngiothi 4

¹Jüthsoso, asam poüh ti tsandeji nung anglou. Mong nou akiu naiuso ni angela nou taiu-e.

²Ngü asam tü ti tsandeji nung amei noin, nungtiphe nung chikü labe-an.

³Tilai ngü ehen taoko jüposinyiu thso melothso pemsa noiküla,

⁴Jüpoüh ngütü nungti ngiokü tsandekü noiküla. “Ngü ti ngioji nung lüyangsan, naiuso tilaitso nung labe-an. Ngü ngiotsünli lüchhisiya naito ni aa noi-e.

⁵Mongthat mongsai nou lü-eplou, naiuso angelatsün lü-eplou! Ngü ti ngioji nung labe-an naiuso tsüwesankü lataiuwan.

⁶Mongthat mongsai nou lale-an, apaüh ni kiplou-e, apa lütsüojin, nungaito apaüh ni kipsankü taiu-e.

⁷Mongthat mongsai eptsün nung athaiutha chhi ongko, atengting noin. Naiuso ni amao tsüdekünaiüh a-ngelatsünto lülou.

⁸Mongthat mongsai lütsüojin, nungaito apaüh ni losongkiu-e. Apa lüpiplou, naiuso apaüh ni hau asuhat kankü shi-e.

⁹Apa ni nou ajinka kandio noi-e.”

¹⁰Jüthso ngütü anglu. Ngü nihau ti chiteji nung da mongkiukü lü-ang, naiuso ni aakih laiukü noi-e.

¹¹Ngü ni hau mongthat mongsai, naiuso ayamthakü kih au tsande-iu.

¹²Ni tsüokü tsakei naito, tiühtso ayam kiapkü tsünoi-e, naiuso tilai ni jinge ni hokkha tsüthekke.

¹³Ni ti ngeloukü noin nung lüyangshi. Ni ngeloutsün a-nge nung apem thaiutha aa nou noin, apa tsülekü meikü lühelou.

¹⁴Tsümeikün khaiuniahoi khutsün yam nai lakhu. Akausaihoi nou hantsün yam tü lahoilut.

¹⁵Nung lachhisiya ha! Tsümeikün ainou pungekü anoi! Nungso lüshanan küta ayamai lütsakei.

¹⁶Akausai khaiuniahoi ngüsoüh ayam tsüthakün tso tsak, mochhisiyakün lektso asaila au tsüshioji. Ngüsoüh ajantso motawaikün lektso ngüso tsüsailaji.

¹⁷Akausai naiuso shelamtsün nung ngüso hau eheshiu khekkü noin.

¹⁸Asiohoi tsakeitsün yamto ajepeksantsünli, anyi mosaokün lektso tekkü okü khutsün khekkü noin.

¹⁹Lüko akausaihoi yamto asohli anyakhem noin. Ngüso tiüh hokkha tsüthek, lüko ngüso loi-anji, nungtso tsünge-an.

²⁰Jüthso ngü ti ngioji nung tü mong nou akiu. Jü ngio nouso tü lü-ang.

²¹Nungso ni ainou tilaitso lapunge-i. Nungso amongpem nai yangshikü lütaiu.

²²Tiautenai sauhaiüh nungso ngelaji, ngüso hau aa naiuso ameilei nou kiuji.

²³Ni ayanghetsün nai thatü lütsüo, tiautenai ni yangtsün tsangkü aakih nou shanji.

²⁴Ti atsüotsüde nung tilaitso lasingio. Yaang naiuso asapthio-itsün ngio ainou ni pungekü lünoi.

²⁵Saitha monglamkü kha ai lüthap; amiam nou akhaiu langamthiowan.

²⁶Ni ti chhilünou meikü lüthalu, naiuso ni tilüsong chhi-e nung athaiutha waokü noi-e.

²⁷Tsümeikün wanküta saitha kha ai lükhu. Yam atha ainou hokngam tsak lüko lakhuwan.