Read Khiamniungan Naga Ngiopung Ngiothi 6 Bible Online

Ngiopung Ngiothi 6 - Khiamniungan Naga bible

Ngiopung Ngiothi 6

¹Jüthso, ni loüh ajantso chailaiu thaiutha thsale louau thaloukü taim süne?

²Ni thaloutaiutsün ngio nouso tsangkü, ni monankü noin süne?

³Nungaito jüthso, nung khaiunia oukong tsangkü ni hejeikü taim lüko nungko nou ni thakhuloau nung achhi: apa dongai liukü lükhu küta ni asoktham ta apatü lükoja.

⁴Ni lasaila-an tsüdekünai la-aalouwan.

⁵Liuhom khaiunia tsak ainou thakhutsün jinchai tsak, tsüdekünai waio tsakli nung jin ainou lükhulou.

⁶Cholak khaiuniahoi nousoüh mao nouso aakih saisile ainou ngelouau noin.

⁷Ngüso ün ahei asong tsüdekünai nokpao tsünoi,

⁸Lüko ngüsoüh ah-uo tao thaiutha khemtaiukü, ah-saiu taoko ngüso eheshiu kamsankü taiulouji.

⁹Oh cholak khaiunia ni tilektso then ai saikü noi-e? Ni saitsün ainou tilai chunge-e?

¹⁰Apaüh ngioji, “Ngü atao letletkü thaiutha sailouwan-e. Ngü jüpha nouso lamshiküta atao letletkü thaiutha aalo-e.”

¹¹Lüko tilai apa saikü noiji, kaohaiüh thalouwantsünli tsosilu nou apa thalouwane.

¹²Atheau tsünoikün akausai khaiuniahoi nouso, yaang chitekü tsakeiji.

¹³Ngüsoüh ni sapthio kiuau niovei nou hapji, naiuso ii nou hanji.

¹⁴Ngüso mongpemai akausai noikü, ngüsoüh angei mongthat thatji, naiuso alumai angem nou lousanji.

¹⁵Nung shioko aküothe alekta shi-e, naiuso ngüso alomei au tsüshiokü thsüokü tawai-e.

¹⁶APAOU nou ajeilouau tsüshio- kün achinyan chhisiya chinyat noin: Abülom niothap, yaang chitetsün leikhaiu, aphio tsünoikünhoi loattsün pha nouso, akausai mongthat mongsai, tsümeikü chhiau khaolaotsün hok nouso, atsüotsüdekü mitha kiutsün, naiuso paiusihai ongko angem lousantsün khaiunia.

²⁰Jüthso, apoüh ni hau ti chiteji nung lüchhi, naiuso anyiuüh ni hau ti tsandekü noin nung tilaitso labe-an.

²¹Ngüso ün ngio nouso, amongpemai asaita kiapjeikü lütaiu.

²²Tilai ni tsakeiji ngüsoüh tsandetsün nou ayam nia-e, nungüh asoh asai taoko ni tü jime, naiuso anyi taoko nihau ayam hane.

²³Ngüso ün ngiokhem nouso to awon noin, ngüsoüh lothakiutsün nou ni titi aakih-e nung tsandeji.

²⁴Nungüh ni tsümeikün menyiuhoi ainou, naiuso amaohai ün tsammongnyiuso anyang ngio nouso, ainou pungekü taiuau shio-e.

²⁵Ngüso mesomei tü amongpemai chinekkü layang; tsüdekünai ngüso ün anyang niothap hau ni latailowani.

²⁶Khaiunia tsaküh mewop menyiu tsak, themtsailop tsak nou chenloau shiom, lüko tsütsamtsütsüokü chhi nouto apaüh taiutsün chikü khemthiowanau shiom.

²⁷Aneshe tsüchethekü ni akongai in kankei au shio-e süne?

²⁸Ahok tsüchethekü ni inkaiolam chiai tsakeiau shio-e süne?

²⁹Nung khekkü amaohai tsammongnyiuko emkamtsün ahat tsak noin. Nungti chhitsünsoüh a-angja nou eppe.

³⁰Kao khaiunia tsaküh apa naiu nai, apaüh eheshiu kao naito khaiuniahoi nou nung kaotü tsüchinyanji.

³¹Lüko apa thalouwan naito, apaüh chinyatjam phopkü laokiushiau noin; apaüh taiutsün chikü kiuwanaulu noin.

³²Lüko sau khaiuniaüh tsütsamtsütsüo chhiji, apato mongyang tsünoi. Apaüh meshen pemlu lotheanloji.

³³Apaüh nianlochi naiuso atawaitsün eppe, apaüh amiam eptsün tsüthamokü asaita noi-e.

³⁴Tsammongpo tsak apa mongkiatsün tao mongmat heantsüntü simkü tilaitso apa amongmat tsüsungji, apa phaosantsün alaoau tsüha.

³⁵Aphaotsün apaüh titso tsülou-e; paopei tichantso kiulünou apa mongmat tsüthasang-e.