Read Khiamniungan Naga Ngiopung Ngiothi 7 Bible Online

Ngiopung Ngiothi 7 - Khiamniungan Naga bible

Ngiopung Ngiothi 7

¹Jüthso ngü ti ngioji lüyangshi, naiuso ngü nitü ti chhisiya au ngioji nung tilaitso labe-an.

²Ngü thoiluttsün lüchhisiya, naiuso ni aa noi-e. Ni aniovei tü titi uokü paotsangji nungti jü atsandetsün tü hoilutau tsüokü lüthe.

³Jü atsandetsün niko asaita lütaiu, nungso amongpem da satlutkü lütaiu.

⁴Mongthat mongsai noutü anio menyiuthsoli lükankei, naiuso angelatsün nung apaiusihaitengli lükankei.

⁵Tiautenai nungsoüh ayang ngio hatsün menyiuhoi ainou, naiuso amaohai tsammongnyiu ainou ni thakhu-ikü taiu-e.

⁶Jam ngü jütsam koukhantso ainou thapshikü noiküla,

⁷naiuso ngü saitha noitsün pühehoi piakü ep, lüko nungso ongko tekkü tsak angelatsün nou tsüsaiukü, ngü epsankü noiküla.

⁸Apa yamniukun nai menyiu tsak kihtsün, tsam shimkü yanlükhunkü noiküla.

⁹Nung ahsham anyakhem tao noiküla.

¹⁰Naiuso nungko meshen shesinyih janhekü, mewop chhitsün tsakli sheitho tholoukü, akausai mongyang thattsün menyiu tsakko apa pheten.

¹¹Nung menyiu nou amiam tsülepkü sonyamailu tsakeiji,

¹²tsüdekünai sonyamai si chaikam nai, yamniukun pungkü jiokü noiji.

¹³Nung menyiu nou apa phaüh nung pühe nou piplo, küta apatü son nai chep, naiuso apa niovei ai thapkü ngiom,

¹⁴“Ngü lonyi chaithio thiokü noin, naiuso nung aloat chaithio ainou eheau nyih taim.

¹⁵Nungtiphe jütsam ainou ngü nitü yamkü shin. Ngü ni epau mongchiokü noiküla, naiuso ni nungko epiu!

¹⁶Ngü jüthen Ijip ainou aleng potsün ne, amatchai nou shimthiokü taim.

¹⁷Ngü nungtü angan nyamtsün pai, naiuso painek nou shantsün angannyam nou tsomlutkü taim.

¹⁸Ashi! Je asoh chikü atsüojineko. Je tsak si tsak phamongko monglingeko.

¹⁹Tiautenai jü tsammongpo tsamko tsünoi. Apa süme laiukü nai iuwankü noin.

²⁰Apaüh chai saiukü kankü noin, apa anojet nime mongkoto tsüyashi-e.”

²¹Nungti menyiu nou apa alengmei tsangkü nung pühe nou tailou, naiuso nung menyiu ün ngio anyaothing tsangkü apa sailowan-i.

²²Alekta nung pühe nou, jangtsopong tsak apa loat-iau nialükhuntsünli, naiuso jinchai tsak apa thalouau paichin chon,

²³sübao nou apa mongpem ai pepkü langau noin, nungko hamthiotsün khekkü nung menyiuko khuhakü noiküla. Apa aa nung angja nai noin tü tsüngekü, waio tsak nyao tsak mongai nappantsün khekkü apa noiküla.

²⁴Nungtiphe jüthsoso, lo ngütü anglu. Ngü ti ngioji nungtü mong nou akiu.

²⁵Nungtin menyiu tsak hau amongpem lashiolou-i; nungtin menyiu phiai hoilutkü lakhu.

²⁶Nung menyiu nou melohai piakü tawai-in, naiuso aweau tsüshiokü aa piakü lomowaniu.

²⁷Ni nung menyiu tsamai khunaito, ni eantsün goumchi ai khutsün yamai noin. Nung ean au yam anyapting tsak noin.