Read Khiamniungan Naga Ngiopung Ngiothi 8 Bible Online

Ngiopung Ngiothi 8 - Khiamniungan Naga bible

Ngiopung Ngiothi 8

¹Anglu! Mongthat mongsai nou jonji. Angelatsün nou apa chija lula-iji.

²Yam dongko kingson nouso ai, naiuso yamjung nousoko apa tsaji.

³Noknio nai naptsün bekhan dongko, naiuso bekhan nouso phiko noikü apaüh jonji.

⁴“Khaiuniahoiso, ngü asamtü kojaji, goumchiko noitsün khaiunia pungkütü ngü jonji.

⁵Asam moshe süne? shekü lüthe. Asam mainga süne? Ayangloutsün lünoi.

⁶Ngü ün usok ngio nousotü anglu; ngü nihau chitetsün ngio chikü ayam thakü noin.

⁷Ngü ti ngioji nungto ngiotsüo; yaang ngio nousotü ngü chinyanji.

⁸Ngü singiotsün alum ngiotsüo noin, nungko tsüthakün naiuso akausai titso tsünoi.

⁹Angela noitsün khaiunia thaiutha to, nung chikü tsangsheikü noin, alum nge-ankü noitsün khaiunia thaiutha to, nung ayam thakü noin.

¹⁰Tangkason konaito jü ayamhan lücholou; chaiou lakkeng ameiting konaito angeloutsünbao lücholou.”

¹¹“Chaiou lung chiai amei nou jü mongthat mongsai noin; ni mongchiotsün tiühtso ngüko weluau tsüshio.

¹²Ngü mongthat mongsai naiuso angelatsün taim; ngütü angelatsün naiuso waokü janthatsün sun.

¹³APAOU asuhattsünto tsümeikün tü chinyantsün noin; Abülom naiuso tsümeikün yam nouso, naiuso tsütsüokün ngio nouso ngü chinyanji.

¹⁴Ngü thatsanji naiuso nungso chhisiya au iulaji. Ngütü angelatsün noin, naiuso ngü kongkü noin.

¹⁵Ngü nokpao nousotü nokshing au, naiuso nokshing nousotü ngiokhem amei nouso shanau hachuji.

¹⁶Asonghoi naiuso mikhem kiutsünso, goumchiko nokpaohoi pungkü nou jü ahachu tsangkü nok-shingji. Sauhaiüh ngütü tsüojinji, ngüsotü ngü tsüojinji.

¹⁷Sauhaiüh ngütü mongkiukü yamji, ngüsoüh ngü epji.

¹⁸Ngü akiu au memei naiuso nianlom nou taim, naiuso nungko atsüomei si ashio eptsün hakü noin.

¹⁹Ni ngü ainou ti epji nungto ameiteng chaiou lakkeng tü meijeng, naiuso asanglingteng tangkason tü meijeng.

²⁰Ngü asiohoi nouso yamko tsakeiji, ngü ngiotsüo yam nousoko tsakeiji.

²¹Sauhaiüh ngü tsüojinji, ngüso hau memei nou kiuji; naiuso ngüso chaioutaiu tsam lomiankiuji.”

²²Kümei nai chongtengau thekü APAOU nou ngü shan, apa chhisiyaso ongko nung chongteng noiküla.

²³Goumchi nou moshankün khako ngü shankü noiküla.

²⁴Khiamnok nouso khako, naiuso haiungan nouso mochetsankünai ngü chetkü noiküla.

²⁵King asong nouso naiuso choitso nouso, athang moyangkün khako ngü chetkü noiküla.

²⁶Goa nou goh naiuso kengpun nouso, tsüdekünai pu nou phalam, tsak lüko moshankün khako:

²⁷Apaüh maou nou shingthatsün taoko, apaüh niothap thonkü, khiamnok nou chiai maou nou shantaoko ngü noiküla,

²⁸apaüh maou nai thengmia nouso taiutsün taoko, apaüh khiamnok haiungan nouso sopsattsün taoko,

²⁹naiuso khiamnok khiam nouso apa ngio khengai tsüyankü theau ngiokhem kiutsün taoko naiuso Apaüh goh athanya shantsün taoko ngü noiküla.

³⁰Adontsün khaiunia tsak khekkü ngü apa dongko noiküla, apa lomonglingtsün ngü apa dongko asai noiküla.

³¹Goumchi noutü monglingko, naiuso khaiuniathso noutü mongtsam thasangkü noiküla.

³²“Pühehoiso lo, ngütü anglu; ngü ngiotsünli lüchhi, nungai asam monglingkü noi-e.

³³Nihau ti tsandeji nungtü anglu. Mongthat mongsai lünoi; nungtü mongtsükiukü lathe.

³⁴Ajekhaiu pungkü jü koukhan dongko noitsün, jütsamai naptsün koukhanko taiukü noikü, khaiunia sauüh ngütü angji, nung khaiunia nou mongling-e.

³⁵Khaiunia sauüh ngü eplouji apaüh aa nou eplouji, naiuso APAOU nou apako mong lengkü noi-e.

³⁶Khaiunia sauüh ngü tsüeplou apa meshen chija tawailouji; sauüh ngü chinyanji apaüh ean nou tsüojinji.”