Read Khiamniungan Naga Ngiopung Ngiothi 9 Bible Online

Ngiopung Ngiothi 9 - Khiamniungan Naga bible

Ngiopung Ngiothi 9

¹Mongthat mongsai nou apa tsam lahsaniu, naiuso nung thaiutha lungkheam chinyat langsaniu.

²Apaüh nung sümai thaiutha thainian tsak loat, apaüh theng nouko laoshang laowekü puo nou khemlou-iu.

³Apaüh noksong atsokting athang nai noikü jonau, menyiuthso tsamki nouso hongiu:

⁴“Tsüngelakün khaiuniahoi ashinap!” Naiuso mainga noutü apaüh ngioji,

⁵“Ashi, jü chih lühe naiuso, ngü laowekü taiutsün theng lüshiu.

⁶Tsü-ilakün khaiunia hoikam lüle-an küta aa lükih. Angeyam noutü lühoilut.”

⁷Meshen thaiuthalu yangtsün khaiunia, ni lotha naito apaüh nilu lotsao-e. Ni tsümeikün khaiuniatü thutnai ni lu tawai-e.

⁸Meshen thaiuthalu yangtsün khaiunia tilaitso lalothakiu; tsüdekünaito nung thaiutha apaüh ni chinyane. Lüko ni angelatsün khaiunia lothakiu naito, apa ni lon asuhat-e.

⁹Ange amon khaiunia noutü ni tilüsong ngioji, nungüh loüh apa tekkü ange amon iulashi-e. Asio khaiunia tsak hau ni tilüsong chite-e, nungüh apa angelatsün losingkiu-e.

¹⁰APAOU lon asuhattsünto a-ngelou ayating nou noin. Asio tsak nou ni ngenaito nitü angelatsün noin.

¹¹Mongthat mongsai nou nihau aakihlaiu pon nouso kamlutkiu-e.

¹²Ni mongthat mongsai nou taiu naito alesan eppe, naiuso ni nung tsüloukü nanan naito nilu sapate.

¹³A-aiu nouto, athayamkeitsün ti tsüngekün, naiuso amiam tsünoikün menyiu tsak khekkü noin.

¹⁴Apa tsamai koukhan dongko moknoikü, tsüdekünai noksong atsokting noikham nai moknoikü,

¹⁵Khaiuniahoi momo chhisiya thaiutha akhu ashi, tsakeitsünso tü jonkü ngioji:

¹⁶“Tsüngelakün khaiuniahoi nungai anap!” Mainga noutü apaüh ngioji,

¹⁷“Akaoloutsün khiam nyaothingtso. Naiuso kaoloukü hetsün themtsai samtso noin.”

¹⁸Apa tsamai khutsün khaiuniahoi eanji, naiuso apa tsamai sauhai komthiokü noin, nungsoto eantsün goumchi athanteng nai noin ta ngüsoüh tsünge.