Read Khiamniungan Naga Achimtsün 1 Bible Online

Achimtsün 1 - Khiamniungan Naga bible

Achimtsün 1

¹Nung mongthat mongsai aokü noitsün David thso sau Yirusalem nai nokpao noiküla, apaüh chimtsün ngio nouso noin.

²Nung üou, ongko üou, ta achimtsün nou ngioji. Aakih nou üou, chikü üou.

³Khaiunia nou aün khemko chhikü tanattsün, apa alesan ti in?

⁴Vetao tsak shiji naiuso khuwanshiji, lüko goumchi nou to asaichi ta nungtilu noiji.

⁵Aje nou peksanji, naiuso nappanshiji, loüh nungtilu apeksantsün thang nailu tsülaokü khushiji.

⁶Ahsheih nou ajepekki nai naiuso ajenapki nai sheihji, loüh nunglu lemkeikü shishiji.

⁷Haiu chikü khiamnok nai tsangthioji, lüko khiamnok nou amiankiu tsüyangji, khiam nou haiu chetngan nai laokü khushiji, naiuso loüh atsangshiau tsaloushiji.

⁸Alum atanat angioau tsüshiokü thatü thsüokü noin. Sam nioveiüh ep lüko nung mongtsam thasangau tilaitso amian tsüyang, tsüdekünai sam noukhanüh tilaitso alukhem tsüyang.

⁹Nung khako ti thawaokü noiküla nung thawaoshi-e. Nung khako ti chhikü noiküla nung chhishi-e. Goumchi apem ai ayan ti tsünoi.

¹⁰Ngüsoüh ngioji, “Athaplu,” “Nungko tso tsak ayan noin!” Lüko nung ti tsüde, sam mochetkü piamkü aita nung shithawaokü noin.

¹¹Ayanan taoko ti thawaokü noiküla, tsakühtso tsüyangsanshi, naiuso ayanan tao si lo thawaotsün nung ashiau taoko nai sauühtso tsüyangshi shi-e.

¹²Ngü, Achimtsün, Yirusalem nai Israel hai chiai nokpao noiküla.

¹³Naiuso goumchi nouko chhitsün chikü thaiutha yamsankü thaluau ngü mong kiukü kowe. Goa nou sam aalo tsünoikü chhiau thsale kiuwaniu.

¹⁴Goumchiko chhisiyakü noitsün alum epkü shin, naiuso ngü ni tü ngioji, nung chikü üou. Nung ahsheih nou ta kumtsün khekkü noin.

¹⁵Kiangkü noitsün ni loluau tsüshio naiuso tsütaiukün jengtsaiu tü ni weluau tsüshio.

¹⁶Ngü jüpem tü ngioloum, “Jü khako Yirusalem nai sauhaiüh nokshingkü shin, ngüso tü simkü mongthat mongsai ngü pungtsokü ngü asong khaiunia tsak iulakü noin, nung ngü ngeji.”

¹⁷Angela si tsüngela, mongthat mongsai naiuso a-aiu nouso jetko amomo ngelouau noitsün ngü mongchiokü noiküla. Nungko lüko ngü ahsheih nou tü kumekeitsünli lu epsan.

¹⁸Ni titithatso mongthat mongsai pungkü iula-e, nungtithatso mongyang nou pia-e; ni titithatso nge-e nungtithatso ni mongyanghetsün pia-e.