Read Khiamniungan Naga Achimtsün 10 Bible Online

Achimtsün 10 - Khiamniungan Naga bible

Achimtsün 10

¹Chinyih mea nou angannyam khaiutsom meng athum achoi nyamiji, nung khekkü a-aiu mongyang intso nou mongthat mongsai athum lomowanji.

²Mongthat mongsai khaiunia nou ayamtha nou chhiau naiuso mainga tsaküh ayam tsüthakü nou chhiau saisile noin.

³Apa a-aiu mongyang nou yamai wantsün mesanhaiüh lüko ngekü wanji; nungti apa mainga ta, khaiunia pungkü hau ngela- aniji.

⁴Anokpao ni tü mongmat sungnai anian wanau thsamsat nou lasat; ni nyaploukü noi naito aphio asong lüko wankiu-e.

⁵Nung goumchi nai nokpaohai tsangkü ayam tsüthakü chhitsün ngü tsak ep.

⁶Nung: memei khaiu- niahoi nou tsüwesankü wanküta mainga nouso hau bao oukong noithang nouso kiuwanji.

⁷Ngü sua nouso mokthso chiai moknoikü ep, naiuso nokpao nouso bao sua hoili hok ko tsakeikü ep!

⁸Ni khan tsak thaiu nai, ni nungko sathio-e, ni pe losat naito, pao tsaküh nitü haiu-e.

⁹Ni lung langh naito, lung nou ni tawai-e. Naiuso ni pai sanpek naito, nungüh ni tawai-e.

¹⁰A-uo tsüshimonkü naito ni nung kankeiau oukong nou phopkü poh-e. Alum thaiutha piamkü khemtaiuwan nai meitso.

¹¹Ni tü pao hau chong haiulouwani naito, pao tai- melouau ngetaiu lüko nung tsüpoh.

¹²Mongsai amei noitsün khaiunia nou apa ngio tsangkü apa dongai nianlom kankü shiji, lüko mainga nouto apa ngioühlu lothelouwanji.

¹³Apaüh mongyang tsüpungkün ngio nou chong chitekü tsalouji küta awai- wai ngio nou thonanji.

¹⁴Mainga tsakto singiolutkü noiji. Nungthanko ti thawao-e sau tsünge-an, naiuso sam eankütün phiai ti thawao-e sauüh ngioau tsüshio.

¹⁵Mainga nouto meshen tsam yamtso tsüngeloushikü tanatanji.

¹⁶Tilai nokpao tsak oum the-e, naiuso apa khemko aheihoi nousoüh ah-thangekü sümai saohekü noi-e, nungaih shingkhannio nou angja nai nappe.

¹⁷Lüko tiai nokpao tsaküh apa chija thatsamau monji, naiuso apa khemko aheihoi nousoüh atao tongtü nai heshiukü naiuso ngüso chija thatsamloukü theng nou tsütukkatkü noiji, nung shing- khannio nou to aküo amei.

¹⁸Tilai khaiunia tsak apa tsam lümshiau thatü cholakji, nungko ah-uo nou chanthioji, naiuso tsam nou loi-anji.

¹⁹Sümai nou ni lomonglingji, naiuso theng nou ni lokoiji, lüko nungne nemtso thaiutha chai pohji.

²⁰Mongyang nai lüko anokpao lalouchi, naiuso ni saitsün tsampai naitso memei hai lalouchi. Waiotso tsaküh ni ngiotsün ngiongem kankü khukü ngüso hau chite-ane.